ചെന്നൈ: ഇന്ത്യന് സൂപ്പര് ലീഗില് കേരള ബ്ലാസ്റ്റേഴ്സിന് തോല്വി. ജവഹര്ലാല് നെഹ്റു സ്റ്റേഡിയത്തില് നടന്ന പോരാട്ടത്തില് ചെന്നൈയിന് എഫ്സി ഒന്നിനെതിരെ മൂന്ന് ഗോളുകള്ക്കാണ് ബ്ലാസ്റ്റേഴ്സിനെ തകര്ത്തത്. നാലു ഗോളുകളും ആദ്യ പകുതിയിലാണ് പിറന്നത്.ചെന്നൈയിനായി ചെമ്പ്രി, ലാല്ലിന്സുല ചങ്തെ, നെറിജസ് വല്സ്കിസ് എന്നിവരാണ് ഗോളുകള് നേടിയത്.
ബ്ലാസ്റ്റേഴ്സിന്റെ ആശ്വാസ ഗോള് ഒഗ്ബെച്ചേയുടെ ബൂട്ടില് നിന്നാണ് പിറന്നത്. ഈ വിജയത്തോടെ ചെന്നൈയിന് എട്ട് മത്സരങ്ങളില് ഒമ്പത് പോയിന്റുമായി എട്ടാം സ്ഥാനത്തേക്ക് ഉയര്ന്നു. അതേസമയം ബ്ലാസ്റ്റേഴ്സ് ഒമ്പതാം സ്ഥാനത്തേക്ക് പിന്തള്ളപ്പെട്ടു. ഒമ്പത് മത്സരങ്ങളില് അവര്ക്ക്് ഏഴു പോയിന്റാണുള്ളത്.
മത്സരത്തിന്റെ തുടക്കത്തില് തന്നെ ചെന്നൈയിന് എഫ്സി ലീഡ് നേടി. നാലാം മിനിറ്റില് ആന്ദ്രെ ചെമ്പ്രിയാണ് ആതിഥേയരെ മുന്നിലെത്തിച്ചത്. റാഫേല് നീട്ടിക്കൊടുത്ത പന്ത് ചെമ്പ്രി ഗോളിലേക്ക് തിരിച്ചുവിടുകയായിരുന്നു.ഗോള് വീണതോടെ പോരാട്ടംമുറുക്കിയ ബ്ലാസ്റ്റേഴ്സ് പത്ത് മിനിറ്റിനുള്ളില് ഗോള് മടക്കി സമനില നേടി. പതിനാലാം മിനിറ്റില് ഒഗ്ബച്ചേയാണ് ബ്ലാസ്റ്റേഴ്സിനായി ചെന്നൈയിന് എഫ്സിയുടെ വലകുലുക്കിയത്. മുപ്പതാം മിനിറ്റില് ചെന്നൈയിന് എഫ്സി വീണ്ടും ലീഡ് നേടി. ഇത്തവണ ലാലിന്സുല ചങ്തെയാണ് ഗോളടിച്ചത്.
ഇടവേളയ്ക്ക് അഞ്ചു മിനിറ്റുശേഷിക്കെ ചെന്നൈയിന് മൂന്നാം ഗോളും കുറിച്ചു. നെറിജസ് വല്സ്കിസാണ് സ്കോര് ചെയ്തത്. ആദ്യ പകുതി അവസാനിക്കുമ്പോള് ചെന്നൈയിന് 3-1 ന് മുന്നില്.
