കുറ്റ്യാടി(കോഴിക്കോട്): നിയമവിരുദ്ധ ഹര്ത്താല് ദിനത്തില് സര്വീസ് നടത്തിയ ബസ്സിലെ ജീവനക്കാരന് മര്ദ്ദനം. കേമിയോ ബസിലെ ക്ലീനര് മണിയൂര് പതിയാക്കര ചേരിക്കല്ലുകുനിയില് ഷിജിന് (32) ആണ് മര്ദ്ദനമേറ്റത്. എസ്ഡിപിഐക്കാര് ബസ് തടഞ്ഞുനിര്ത്തി മര്ദ്ദിക്കുകയായിരുന്നു. തൊട്ടില്പ്പാലത്തു നിന്നും വടകരയ്ക്ക് പോകുമ്പോള് തളീക്കരയില് വെച്ചായിരുന്നു മര്ദ്ദനം. പരിക്കേറ്റ ഷിജിനെ കുറ്റ്യാടി താലൂക്ക് ആശുപത്രിയില് പ്രവേശിപ്പിച്ചു. ഇന്ന് ഉച്ചയ്ക്ക് രണ്ടുമണിയോടെയായിരുന്നു അക്രമം. യാത്രക്കാരെ കയറ്റുബോള് പിറകിലെ വാതില് വഴി കയറിയ രണ്ടുപേര് ഷിജിന്റെ തലയ്ക്ക് കമ്പി കൊണ്ട് അടിക്കുകയും ഓടി രക്ഷപ്പെടുകയായിരുന്നു. ഹര്ത്താല് ദിനത്തില് ഷിജിന് ബസില് ഉണ്ടായിരുന്നില്ല.
ഹര്ത്താല് ദിനത്തില് സര്വീസ് നടത്തിയ കേമിയോ ബസ് എസ്ഡിപിഐ ക്കാര് തടയുകയും ജീവനക്കാരെ ഭീഷണിപ്പെടുത്തുകയുമായിരുന്നു. ബസ് ജീവനക്കാരെ ഭീഷണിപ്പെടുത്തിയ അക്രമികളെ അന്ന് കസ്റ്റഡിയില് എടുക്കാന് പോലീസ് തയ്യാറായിരുന്നില്ല. അക്രമികള് ഭീഷണിപ്പെടുത്തുന്ന ദൃശ്യങ്ങള് സാമൂഹ്യമാധ്യമങ്ങളില് പ്രചരിച്ചതോടെ പോലീസ് കേസ് എടുക്കുകയും അക്രമികളില് നാലുപേരെ അറസ്റ്റു ചെയ്യുകയും ചെയ്തു. എടക്കാട്ടില് ജലീല്, കോമത്ത് മീത്തല് ഇതുല് ലക്കിബ്, കോമത്ത് സ്വാലിഹ്, കാരഞ്ഞക്കടുത്ത് നൗഷാദ് എന്നിവരെയാണ് ചൊവ്വാഴ്ച അറസ്റ്റ് ചെയ്തത്. അന്നത്തെ സംഭവത്തില് 10 പേര്ക്കെതിരെ പോലീസ് കേസെടുത്തിരുന്നു.
