ന്യൂദല്‍ഹി: ടെസ്റ്റ് ക്രിക്കറ്റിലെ ഏറ്റവും ഉയര്‍ന്ന വ്യക്തിഗത സ്‌കോറെന്ന റെക്കോഡ് ഇപ്പോഴും വിന്‍ഡീസ് ഇതിഹാസം ബ്രയാന്‍ ലാറയ്‌ക്ക് സ്വന്തം. 2004 ല്‍ ഇംഗ്ലണ്ടിനെതിരെ 400 റണ്‍സുമായി പുറത്താകാതെ നിന്നാണ് ലാറ റെക്കോഡ് കുറിച്ചത്.
ആക്രമിച്ച് കളിക്കുന്ന കളിക്കാരിലാരെങ്കിലും തന്റെ റെക്കോഡ് തകര്‍ക്കുമെന്ന് ലാറ മാധ്യമങ്ങളോട് പറഞ്ഞു. ഇന്ത്യന്‍ ക്യാപ്റ്റന്‍ വിരാട് കോഹ്‌ലിയോ രോഹിത് ശര്‍മയോ ഭാവിയില്‍ തന്റെ റെക്കോഡ് പഴങ്കഥയാക്കുമെന്ന് ലാറ വെളിപ്പെടുത്തി.
അടുത്തിടെ പാക്കിസ്ഥാനെതിരായ ടെസ്റ്റില്‍ ഓസീസ് ഓപ്പണര്‍ ഡേവിഡ് വാര്‍ണര്‍ ലാറയുടെ റെക്കോഡ് തകര്‍ക്കുമെന്ന് കരുതി. പക്ഷെ വാര്‍ണര്‍ 335 റണ്‍സുമായി പുറത്താകാതെ നില്‍ക്കുമ്പോള്‍ ഓസീസ് ക്യാപ്റ്റന്‍ ടിം പെയ്ന്‍ ഇന്നിങ്‌സ് ഡിക്ലയര്‍ ചെയ്തു. ഇതോടെ വാര്‍ണര്‍ക്ക് റെക്കോഡ് തകര്‍ക്കാനുള്ള അവസരം നഷ്ടമായി.
ടിം പെയ്ന്‍ ഇന്നിങ്‌സ് ഡി്ക്ലയര്‍ ചെയ്തതിനെതിരെ ഓസ്‌ട്രേലിയയുടെ മുന്‍ താരങ്ങള്‍ രംഗത്തുവന്നിരുന്നു. ടീം മാനേജ്‌മെന്റിന്റെ തീരുമാനമനുസരിച്ചാണ് ഇന്നിങ്‌സ് അവസാനിപ്പിച്ചതെന്ന് പെയ്ന്‍ വ്യക്തമാക്കി.
