വിന്‍ഡീസിന് ജയം

ചെന്നൈ: ഓപ്പണര്‍ ഷായ് ഹോപ്പിന്റെയും മധ്യനിരബാറ്റ്‌സ്മാന്‍ ഹെറ്റ്‌മെയറിന്റെയും സെഞ്ചുറികളില്‍ വിന്‍ഡീസിന് തകര്‍പ്പന്‍ വിജയം. ആദ്യ ഏകദിനത്തില്‍ അവര്‍ ഇന്ത്യയെ എട്ട് വിക്കറ്റിന് തോല്‍പ്പിച്ചു. ഇതോടെ മൂന്ന് മത്സരങ്ങളുടെ പരമ്പരയില്‍ വിന്‍ഡീസ് 1-0 ന് മുന്നിലെത്തി. 

288 റണ്‍സ് വിജയലക്ഷ്യം പിന്തുടര്‍ന്ന വിന്‍ഡീസ് 47.5 ഓവറില്‍ രണ്ട് വിക്കറ്റ് നഷ്ടത്തില്‍ 291 റണ്‍സ് നേടി വിജയിച്ചു. ആദ്യം ബാറ്റേന്തിയ ഇന്ത്യ 50 ഓവറില്‍ എട്ട് വിക്കറ്റിന് 287 റണ്‍സാണെടുത്തത്. 

തകര്‍ത്തടിച്ച ഹെ്റ്റ്‌മെയര്‍ 106 പന്തില്‍ 139 റണ്‍സ് നേടി. പതിനൊന്ന് ഫോറും ഏഴു സിക്‌സറും അടിച്ചു. ഷായ് ഹോപ്പ് 102 റണ്‍സുമായി പുറത്താകാതെ നിന്നു. 151 പന്ത് നേരിട്ട് ഹോപ്പ് ഏഴു ഫോറും ഒരു സിക്‌സറും അടിച്ചു. നിക്കോളസ് പൂരന്‍ 22 പന്തില്‍ 25 റണ്‍സുമായി കീഴടങ്ങാതെ നിന്നു.

പതിനൊന്ന് റണ്‍സ് എടുക്കുന്നതിനിടെ വിന്‍ഡീസിന് ഓപ്പണര്‍ സുനില്‍ അംബ്രിസിനെ നഷ്ടമായി. പക്ഷെ മൂന്നാമനായി ക്രീസിലെത്തിയ ഹെറ്റ്‌മെയര്‍ ഓപ്പണര്‍ ഷായ് ഹോപ്പിനൊപ്പം പിടിച്ചുനിന്ന് വിന്‍ഡീസിന്റെ സ്‌കോര്‍ ഉയര്‍ത്തി. രണ്ടാം വിക്കറ്റില്‍ ഇവര്‍ 218 റണ്‍സിന്റെ കൂട്ടുകെട്ടുണ്ടാക്കി വിന്‍ഡീസിന്റെ വിജയത്തിന് അടിത്തറയിട്ടു. ടോസ് നഷ്ടപ്പെട്ട് ബാറ്റ് ചെയ്ത ഇന്ത്യ ഋഷഭ് പന്ത്, ശ്രേയസ് അയ്യര്‍ എന്നിവരുടെ അര്‍ധ സെഞ്ചുറികളിലാണ് 50 ഓവറില്‍ എട്ട് വിക്കറ്റിന് 287 റണ്‍സ് എടുത്തത്.മോശം ഫോമിന് ഏറെ പഴികേട്ട പന്ത് 69 പന്തില്‍ 71 റണ്‍സ് നേടി. ഏഴ് ഫോറും ഒരു സിക്‌സറും അടിച്ചു. ഏകദിനത്തില്‍ പന്തിന്റെ ആദ്യ അര്‍ധ സെഞ്ചുറിയാണിത്. 

ശ്രേയസ് അയ്യര്‍ 88 പന്തില്‍ 70 റണ്‍സ് നേടി. അഞ്ചു ഫോറും ഒരു സിക്‌സറും നേടി. അയ്യരുടെ തുടര്‍ച്ചയായ മൂന്നാം അര്‍ധ ശതകമാണിത്. നാലാം വിക്കറ്റില്‍ അയ്യരും പന്തും 114 റണ്‍സ് അടിച്ചെടുത്തു. രണ്ടിന് 25 റണ്‍സെന്ന നിലയില്‍ തകര്‍ന്ന ഇന്ത്യയെ പന്തും അയ്യരുമാണ് കരകയറ്റിയത്.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യക്ക് തുടക്കത്തിലേ തിരിച്ചടിയേറ്റു. ആറു റണ്‍സ് എടുത്ത കെ.എല്‍. രാഹുലിനെ ക്രോട്രല്‍ പുറത്താക്കി. ഇന്ത്യ ഒന്നിന് 21 റണ്‍സ്. ക്യാപ്റ്റന്‍ കോഹ്‌ലിക്കും പിടിച്ചുനില്‍ക്കാനായില്ല. കോട്രലിന്റെ പന്ത് ബാറ്റില്‍ കൊണ്ട് വിക്കറ്റിലേക്ക് കയറി. കോഹ്‌ലിയുടെ സമ്പാദ്യം നാലു റണ്‍സ്. ഓപ്പണര്‍ രോഹിത് ശര്‍മ 36 റണ്‍സ് നേടി.

അടിച്ചു തകര്‍ത്ത കേദാര്‍ ജാദവ് 35 പന്തില്‍ മൂന്ന് ഫോറും ഒരു സിക്‌സറും അടക്കം 40 റണ്‍സ് എടുത്തു. രവീന്ദ്ര ജഡേജ 21 പന്തില്‍ രണ്ട് ഫോറുകളുടെ പിന്‍ബലത്തില്‍ 21 റണ്‍സ് കുറിച്ചു.വിന്‍ഡീസിനായി ഷെല്‍ഡണ്‍ കോട്രല്‍, കീമോ പോള്‍, അല്‍സാരി ജോസഫ് എന്നിവര്‍ രണ്ട് വിക്കറ്റ് വീതം വീഴ്‌ത്തി.ടോസ് നേടിയ വിന്‍ഡീസ് ക്യാപ്റ്റന്‍ കീറോണ്‍ പൊള്ളാര്‍ഡ് ഇന്ത്യയെ ബാറ്റിങ്ങിനയച്ചു.