വയനാട്: വിവാദ ആത്മകഥ പ്രകാശനത്തിനു പിന്നാലെ സിസ്റ്റര് ലൂസി കളപ്പുരയ്ക്കെതിരെ പ്രതിഷേധ സംഗമവുമായി ഒരു വിഭാഗം വിശ്വാസികള്. സിസ്റ്റര് ലൂസിയുടെ ആത്മകഥയിലെ പരാമര്ശങ്ങള് വസ്തുത വിരുദ്ധമാണെന്നും കത്തോലിക്കാസഭയെ അവഹേളിക്കാനാണ് ഇങ്ങനെയൊരു നീക്കമെന്നും ആരോപിച്ചാണ് പ്രതിഷേധം.
എഫ്സിസി സന്യാസിന് മഠം സ്ഥിതി ചെയ്യുന്ന കാരയ്ക്കാമലയിലെ വിശ്വാസികളാണ് കഴിഞ്ഞ ദിവസം ലൂസി കളപ്പുരയ്ക്കെതിരെ പ്രതിഷേധ സംഗമം നടത്തിയത്. കത്തോലിക്കാ സഭകളില് നടക്കുന്ന നിയമവിരുദ്ധ പ്രവര്ത്തനങ്ങളെ കുറിച്ചും പീഡനങ്ങളെകുറിച്ചുമാണ് സിസ്റ്റര് ലൂസി കളപ്പുരയുടെ ആത്മകഥ പറയുന്നത്.
ഏതാനും നാട്ടുകാര് ചേര്ന്ന് രൂപീകരിച്ച വിശ്വാസ സംരക്ഷണ സമിതിയുടെ നേതൃത്വത്തിലാണ് കഴിഞ്ഞ ദിവസം പ്രതിഷേധ പരിപാടികള് നടന്നത്. വിശ്വാസികളും ഒരുവിഭാഗം നാട്ടുകാരും ചടങ്ങില് പങ്കെടുത്തു. സഭയെ വിമര്ശിക്കുന്ന നിലപാട് സിസ്റ്റര് ലൂസി കളപ്പുര അവസാനിപ്പിച്ചില്ലെങ്കില് വരും ദിവസങ്ങളില് പ്രതിഷേധം കടുപ്പിക്കാനാണ് ഇവരുടെ ആഹ്വാനം.
