ന്യൂദല്ഹി: പ്രമുഖ ഭരതനാട്യ നര്ത്തകിയും കേന്ദ്ര സംഗീത നാടക അക്കാദമി മുന് അധ്യക്ഷയുമായ ലീല സാംസണിനെതിരെ സിബിഐ കേസെടുത്തു. ചെന്നൈ കലാക്ഷേത്ര ഫൗണ്ടേഷന്റെ കൂത്തമ്പലം ഓഡിറ്റോറിയം പുനരുദ്ധാരണത്തിന്റെ മറവില് 7.02 കോടി ചെലവിട്ടുവെന്നാണ് കേസ്.
പദ്മശ്രീ നേടിയ ലീല കേന്ദ്ര സെന്സര് ബോര്ഡ് മുന് അംഗം കൂടിയാണ്. ഇവര്ക്കു പുറമേ ചീഫ് അക്കൗണ്ട്സ് ഓഫീസര് ടി.എസ്. മൂര്ത്തി, അക്കൗണ്ട്സ് ഓഫീസര് എസ്. രാമചന്ദ്രന്, എന്ജിനീയറിങ് ഓഫീസര് വി. ശ്രീനിവാസന് എന്നിവര്ക്കെതിരെയും കേസെടുത്തിട്ടുണ്ട്.
സാംസ്കാരിക മന്ത്രാലയം ചീഫ് വിജിലന്സ് ഓഫീസര് നല്കിയ പരാതി പ്രകാരമാണ് കേസ്. ചട്ടം ലംഘിച്ച് നവീകരണക്കരാര് കാര്ഡെന്ന സ്ഥാപനത്തിന് നല്കിയെന്നും എസ്റ്റിമേറ്റിലുള്ള തുകയേക്കാള് 62 ലക്ഷം രൂപ കൂടുതലാണ് ഇതിന് ചെലവിട്ടതെന്നും പ്രാഥമിക അന്വേഷണത്തില് കണ്ടെത്തിയിരുന്നു. കൂടുതല് തുകയ്ക്കാണ് കരാറുകള് നല്കിയതെന്നും കണ്ടെത്തിയിട്ടുണ്ട്. 84 വര്ഷം പഴക്കമുള്ള അഡയാറിലെ കലാക്ഷേത്ര രുഗ്മിണി ദേവി അരുണ്ഡേല് സ്ഥാപിച്ചതാണ്. 2005 മെയ് ആറു മുതല് 2012 ഏപ്രില് 30 വരെയാണ് ലീല ഇതിന്റെ ഡയറക്ടറായിരുന്നത്.
