തൃശൂര്: മാധ്യമ പ്രവര്ത്തനം നിഷ്പക്ഷവും സുതാര്യവുമാകണമെന്ന് കേന്ദ്രമന്ത്രി. വി. മുരളീധരന്. അസഹിഷ്ണുത പ്രകടിപ്പിച്ച് മന്ത്രിയെ തടയാനുള്ള ഒരു വിഭാഗം മാധ്യമപ്രവര്ത്തകരുടെ ശ്രമം വിഫലമായി. സംഭവത്തില് പത്രപ്രവര്ത്തക യൂണിയന് സമ്മേളനത്തില് രൂക്ഷവിമര്ശനം. മന്ത്രിയെ തടയാന് ശ്രമിച്ചവര് ഒറ്റപ്പെട്ടു.
ഇന്നലെ തൃശൂരിലാരംഭിച്ച യൂണിയന് സംസ്ഥാന സമ്മേളനത്തില് ആദരസഭയുടെ ഉദ്ഘാടനം നിര്വഹിച്ച് സംസാരിക്കുകയായിരുന്നു വി. മുരളീധരന്. കേരളത്തിലെ ഒരു വിഭാഗം മാധ്യമപ്രവര്ത്തകരെങ്കിലും നിഷ്പക്ഷമായല്ല വാര്ത്തകള് കൈകാര്യം ചെയ്യുന്നത്. ആളും തരവും നോക്കി ഇടപെടുന്ന രീതി ശരിയല്ല. അടുത്തിടെ തിരുവനന്തപുരം പ്രസ് ക്ലബ്ബില് നടന്ന സംഭവങ്ങള് ഉദാഹരണമാണ്. സമാനമായ നിരവധി കേസുകളില് വനിതകള് പരാതിപ്പെട്ടിട്ടും ഒരിടപെടലുമുണ്ടായിട്ടില്ല. എല്ലാ പ്രശ്നങ്ങളിലും ഇടപെടല് നിഷ്പക്ഷവും നീതിപൂര്വവുമാകണം. രാഷ്ട്രീയ ലാഭത്തിനുവേണ്ടി തെറ്റിദ്ധാരണ പരത്തുന്ന വാര്ത്തകള് സൃഷ്ടിക്കുന്നവരെ സമൂഹം തിരിച്ചറിയുമെന്നും മുരളീധരന് പറഞ്ഞു.
പൗരത്വ ഭേദഗതി ബില്ലിനെക്കുറിച്ച് തെറ്റായ വിവരങ്ങള് പ്രചരിപ്പിക്കാനും ആശങ്ക പരത്താനും ശ്രമം നടത്തുകയാണെന്നും കേന്ദ്രമന്ത്രി പറഞ്ഞു. മുഖ്യമന്ത്രി പിണറായി വിജയന് ഇല്ലാത്ത ആശങ്ക സൃഷ്ടിക്കാന് ശ്രമിക്കുകയാണ്. എല്ഡിഎഫും യുഡിഎഫും ചേര്ന്ന് നടത്തുന്ന നുണ പ്രചരണം ജനം തിരിച്ചറിയുമെന്നും അദ്ദേഹം പറഞ്ഞു.
ഈ പരാമര്ശങ്ങളാണ് സിപിഎം, ജമാഅത്തെ ഇസ്ലാമി അനുകൂലികളായ മാധ്യമപ്രവര്ത്തകരെ ചൊടിപ്പിച്ചത്. കേന്ദ്രമന്ത്രി വേദി വിട്ടിറങ്ങിയപ്പോല് ഇവര് പ്രതിഷേധവുമായി രംഗത്തെത്തി. നിങ്ങള്ക്ക് പറയാനുള്ളത് പറഞ്ഞോളൂ, കേള്ക്കാം എന്ന് മന്ത്രി പറഞ്ഞിട്ടും ഇവര് ബഹളം തുടര്ന്നു. ഇതോടെ യൂണിയന് നേതാക്കള് ഇടപെട്ട് മന്ത്രിയെ പുറത്തേക്ക് നയിച്ചു.
തുടര്ന്ന് നടന്ന പ്രതിനിധി സമ്മേളനത്തില് പ്രതിഷേധക്കാര്ക്കെതിരെ രൂക്ഷ വിമര്ശനമുയര്ന്നു. ക്ഷണിച്ചുവരുത്തിയ അതിഥിക്ക് നേരെ നടന്ന പ്രതിഷേധം അങ്ങേയറ്റത്തെ അസഹിഷ്ണുതയാണെന്നും ഫാസിസമാണെന്നും പ്രതിനിധികള് വിമര്ശിച്ചു. ഇത്തരക്കാര്ക്കെതിരെ നടപടി വേണമെന്നും ആവശ്യമുയര്ന്നു.
തിരുവനന്തപുരം പ്രസ് ക്ലബ് സെക്രട്ടറിയായിരുന്ന രാധാകൃഷ്ണന് വനിതാ മാധ്യമ പ്രവര്ത്തകര്ക്ക് നേരെ സദാചാരപോലീസ് ചമഞ്ഞ് ഉപദ്രവിച്ച സംഭവത്തില് രാധാകൃഷ്ണനെ യൂണിയന് പുറത്താക്കിയിരുന്നു. തിരുവനന്തപുരത്ത് തന്നെ മുതിര്ന്ന ചില മാധ്യമ പ്രവര്ത്തകര്ക്കെതിരെ വനിതാ മാധ്യമപ്രവര്ത്തകര് ലൈംഗിക പീഡനത്തിന് പരാതി നല്കിയിട്ടും ഒരു നടപടിയും ഉണ്ടായിട്ടില്ല. ഈ വൈരുദ്ധ്യമാണ് വി. മുരളീധരന് പ്രസംഗത്തില് ചൂണ്ടിക്കാട്ടിയത്.
മുതിര്ന്ന മാധ്യമ പ്രവര്ത്തകരെ യോഗത്തില് ആദരിച്ചു. ഗവ. ചീഫ് വിപ്പ് കെ. രാജന് അധ്യക്ഷനായി. യൂണിയന് നേതാക്കളായ കമാല് വരദൂര്, സി. നാരായണന് തുടങ്ങിയവരും സംസാരിച്ചു.
