തിരുവനന്തപുരം: പൗരത്വ ബില്‍ സംബന്ധിച്ച യഥാര്‍ത്ഥ വസ്തുതകള്‍ എന്തെന്ന് പോലും മനസിലാക്കാതെ പ്രതിഷേധവും ഭീതി പടര്‍ത്തുന്ന പ്രതികരണവുമായി സജീവമാണ് ചില സിനിമ-സാംസ്‌കാരിക പ്രവര്‍ത്തകര്‍. അതില്‍ മുന്‍പന്തിയിലാണ് സംവിധായകന്‍ ആഷിഖ് അബു. പൗരത്വ ബില്ലിനെതിരേ വസ്തുത വിരുദ്ധമായ ഒരു പോസ്റ്റ് പിന്നീട് തെറ്റാണെന്ന് മനസിലാക്കി ആഷിഖ് അബു ഡീലീറ്റ് ചെയ്തിരുന്നു. എന്നാല്‍, അസമില്‍ നടക്കുന്ന പ്രക്ഷോഭത്തിന്റെ മറ്റൊരു ചിത്രമാണ് മണിക്കൂറുകള്‍ക്ക് മുന്‍പ് ആഷിഖ് അബു പോസ്റ്റ് ചെയ്്തിരിക്കുന്നത്.
ഈ ചിത്രം ചരിത്രത്തില്‍ ഇടംനേടുമെന്ന് തലക്കെട്ടോടെ ഉള്ളതാണ് ചിത്രം അടങ്ങിയ പോസ്റ്റ്. പൂണൂല്‍ ധരിച്ച യുവാവ് ഷര്‍ട്ടൂരി പോലീസിനു നേരേ കൈഉയര്‍ത്തി നില്‍ക്കുന്നതാണ് ചിത്രം. മുസ്ലിങ്ങള്‍ മാത്രം നടത്തുന്ന സമരമായി മാത്രം പ്രക്ഷോഭത്തെ കണക്കാക്കരുതെന്ന് വ്യക്തമാക്കുന്നതാണ് ചിത്രമെന്നാണു അതില്‍ പറയുന്നത്.
എന്നാല്‍, ആഷിഖ് അബുവിന് അമളി പിണഞ്ഞതാണെന്നു സോഷ്യല്‍ മീഡിയ വ്യക്തമാക്കുന്നു. പൗരത്വ ബില്ലിനെതിരേ ശക്തമായ പ്രതിഷേധം ഉയര്‍ത്തുന്ന സംവിധായകനാണ് ആഷിഖ് അബു. അസമില്‍ നടക്കുന്ന പ്രക്ഷോഭം ആകട്ടെ അവിടെക്ക് മുസ്ലിം, ക്രിസ്ത്യന്‍, ഹിന്ദു അടക്കം ഒരു മതക്കാരേയും പ്രവേശിപ്പിക്കരുതെന്നും പൗരത്വം നല്‍കരുതെന്നും ആവശ്യപ്പെട്ടുള്ള സമരമാണ്. അസമിലേക്ക് ഒരു കുടിയേറ്റക്കാരേയും അനുവദിക്കില്ലെന്നാണ് ഇവരുടെ ആവശ്യം. ചുരുക്കത്തില്‍ ആഷിഖ് അബുവിന്റെ പ്രതിഷേധത്തിന്റെ നേര്‍വിപരീത ചിത്രമാണ് സംവിധായകന്‍ ഫേസ്ബുക്ക് ഷെയര്‍ ചെയ്തിരുക്കുന്നത്. ചിത്രം അമളിയാണെന്നും പോസ്റ്റ് ഡീലീറ്റ് ചെയ്തു മുങ്ങിക്കോളാനുമാണ് കമന്റുകളില്‍ ഭൂരിപക്ഷവും.
ഇതേവിഷയത്തില്‍ പ്രതികരണവുമായി പോലീസ് മുന്‍ മേധാവി സെന്‍കുമാറും രംഗത്തെത്തിയിരുന്നു. ദേശീയ പൗരത്വ ഭേദഗതി ബില്ലിനെ ചൊല്ലി രാജ്യത്തിന്റെ വിവിധയിടങ്ങളില്‍ ചിലര്‍ സംഘടിപ്പിക്കുന്ന പ്രതിഷേധങ്ങള്‍ വ്യത്യസ്ത ആവശ്യങ്ങള്‍ ഉയര്‍ത്തിയാണെന്ന് മനസിലാക്കണമെന്ന് പോലീസ് മുന്‍ മേധാവി ടി.പി. സെന്‍കുമാര്‍ ആവശ്യപ്പെട്ടത്. ഏറ്റവും അധികം പ്രക്ഷോഭം നടക്കുന്ന അസമിലേത് അഭയാര്‍ഥികള്‍ക്ക് പൗരത്വം നല്‍കണമെന്ന് ആവശ്യപ്പെട്ടല്ല. മറിച്ച് ആര്‍ക്കും പൗരത്വം കൊടുക്കരുതെന്ന് ആവശ്യപ്പെട്ടാണ്. എന്നാല്‍, മാധ്യമങ്ങള്‍ ജനങ്ങളെ തെറ്റിദ്ധരിപ്പിക്കുകാണ്.കേരളത്തിലെ പ്രതിഷേധം ആകട്ടെ എല്ലാ പാക്കിസ്ഥാനി, ബംഗ്ലാദേശി, അഫ്ഗാനി സ്വദേശികള്‍ക്ക് പൗരത്വം നല്‍കണമെന്ന് ആവശ്യപ്പെട്ടാണ്. മലയാള മാധ്യമങ്ങള്‍ പ്രതിഷേധം കനക്കുന്നു എന്ന് പറയുമ്പോള്‍ രണ്ടും ഒന്നാണെന്ന് തെറ്റിദ്ധരിക്കരുതെന്നും സെന്‍കുമാര്‍ ഫേസ്ബുക്ക് പോസ്റ്റിലൂടെ വ്യക്തമാക്കി.
