കണ്ണൂര്: കാസര്കോട് നിന്ന് മംഗലാപുരത്തേക്ക് പോയി വരാന് നൂറ്റിപ്പതിനഞ്ച് കിലോമീറ്റര് ദൂരത്തില് തുടര്ച്ചയായ നാല് ട്രിപ്പില് നാനൂറ്റി അറുപത് കിലോമീറ്റര് കെഎസ്ആര്ടിസി ബസ് ഓടിക്കാന് ഒരു ഡ്രൈവര് മാത്രം. മൂന്ന് ട്രിപ്പിന് പുറമേ അഡീഷണല് ട്രിപ്പ് എന്ന നിലയിലാണ് നാലാമത്തെ ട്രിപ്പില് ഒരേ ഡ്രൈവര് തന്നെ തുടര്ച്ചയായി ജോലി ചെയ്യുന്നത്. ബസ്സുകളുടെ എണ്ണം വര്ധിപ്പിക്കാതെ ട്രിപ്പ് കൃത്യമാക്കുന്നതിന് വേണ്ടിയാണ് ഒരു ബസ്സ് തന്നെ കൂടുതല് തവണ ഓടുന്നത്. എന്നാല് അഡീഷണല് ട്രിപ്പില് വേറെ ഡ്രൈവറെ നിയോഗിക്കുന്നുമില്ല.
കാസര്കോട് നിന്ന് മംഗലാപുരത്തേക്ക് പോകുന്ന ബസ്സിന് രണ്ട് മണിക്കൂര് അഞ്ച് മിനുട്ടാണ് യഥാര്ത്ഥ റണ്ണിംഗ് സമയം. എന്നാല് സാധാരണയായി ഒരു മണിക്കൂര് 35 മിനുട്ടാണ് അനുവദിക്കുന്നത്. കണ്ടക്ടര്ക്ക് നല്കുന്ന വേ ബില്ലില് 424 കിലോമീറ്ററാണ് കാണിക്കുന്നതെങ്കിലും യഥാര്ത്ഥത്തില് ബസ് ഓടുന്നത് 460 കിലോമീറ്ററാണ്. ഒരു മണിക്കൂര് 35 മിനുട്ട് കൊണ്ട് ഓടിയെത്താന് സാധിക്കാത്തതിനാല് ഭക്ഷണം കഴിക്കുന്നതിനും പ്രാഥമിക കൃത്യം നടത്തുന്നതിനുമുള്ള സമയം കൂടി ഓട്ടത്തിനായി ഉപയോഗിക്കണം. ഇത്തരത്തില് തുടര്ച്ചയായി സര്വ്വീസ് നടത്തുന്ന ബസ്സിലെ ജീവനക്കാര്ക്ക് പ്രാഥമിക കൃത്യം ചെയ്യാന് പോലും സാധിക്കാറില്ല. ഒന്നുകില് ഭക്ഷണം കഴിക്കാം അല്ലെങ്കില് പ്രാഥമിക കൃത്യം നടത്താം രണ്ടും സാധിക്കില്ലെന്നാണ് ബസ്സ് ജീവനക്കാരിലൊരാള് പറഞ്ഞത്. വനിതാ കണ്ടക്റ്റര്മാരാണ് ഇതില് ഏറെ ദുരുതത്തിലാകുന്നത്.
ഓട്ടത്തിനിടയില് ലീഫ് പൊട്ടുകയോ വാഹനത്തിന് ഏതെങ്കിലും തരത്തിലുള്ള ഡയമേജ് വരികയോ ചെയ്താല് ഇതിനാവശ്യമായ ചെലവ് ഡ്രൈവര്മാരില് നിന്ന് ഡയമേജ് കോസ്റ്റ് എന്ന നിലയില് ഈടാക്കുകയാണ് പതിവ്. വാഹനം ഓവര് സ്പീഡിലോടിച്ചാല് വരുന്ന പിഴയും ഡ്രൈവര്മാരുടെ വേതനത്തില്നിന്ന് പിടിക്കും. മിന്നല് പോലുള്ള അതിവേഗ ദീര്ഘദൂര ബസ്സ് ഡ്രൈവര്മാര്ക്കാണ് ഇത്തരത്തില് ഭീമമായ ചെലവുണ്ടാകുന്നത്. ഇതിനെല്ലാം പുറമെയാണ് കൃത്യസമയത്ത് ശമ്പളം ലഭിക്കാത്ത പ്രശ്നങ്ങള്.
ക്രഡിറ്റ് ലീവ് ഉണ്ടായിട്ട് പോലും ശമ്പളം തടഞ്ഞ് വെച്ചതാണ് കഴിഞ്ഞ ദിവസം ഒരു ഡ്രൈവറുടെ ആത്മഹത്യയില് കലാശിച്ചത്. തുടര്ച്ചയായി വിശ്രമമില്ലാതെ വാഹനമോടിക്കുന്നത് ഡ്രൈവര്മാരുടെ മാനസിക സമ്മര്ദ്ദം വര്ധിപ്പിക്കുകയും അപകടങ്ങളുണ്ടാക്കുകയും ചെയ്യും. അപകടം നടന്നാല് കോടതിയിലും മോട്ടോര് വാഹനവകുപ്പിലും മറുപടി പറയേണ്ടതും വക്കീലിനെ ഏര്പ്പാടാക്കേണ്ടതും ഡ്രൈവര് തന്നെയാണ്. ഇത്തരമൊരു സാഹചര്യത്തിലാണ് ഡ്രൈവര്മാര് വാഹനമോടിക്കുന്നത്.
