സംഗ്രൂര്‍ (പഞ്ചാബ്): ദേശീയ സ്‌കൂള്‍ അത്‌ലറ്റിക്‌സ് ചാമ്പ്യന്‍ഷിപ്പിന്റെ ജൂനിയര്‍, സബ് ജൂനിയര്‍ വിഭാഗങ്ങളില്‍ പിന്നിലായ കേരളം ഇന്ന് സീനിയര്‍ വിഭാഗത്തില്‍ കിരീടം ലക്ഷ്യമിട്ട് ഇറങ്ങുന്നു. 35 വീതം ആണ്‍കുട്ടികളും പെണ്‍കുട്ടികളുമടക്കം 70 പേരടങ്ങുന്നതാണ് കേരള സംഘം. കോതമംഗലം മാര്‍ബേസില്‍ എച്ച്എസ്എസിലെ അഭിഷേക് മാത്യുവാണ് കേരള ടീം ക്യാപ്റ്റന്‍. തിരുവനന്തപുരം സായിയിലെ പ്രസ്‌കില്ല ഡാനിയേല്‍ വൈസ് ക്യാപ്റ്റന്‍. അഞ്ച് ദിവസമായി നടക്കുന്ന മീറ്റില്‍ ആകെ 40 ഫൈനലുകളാണ് ഉള്ളത്.
മൂന്നുവര്‍ഷത്തെ ഇടവേളയ്‌ക്കുശേഷം ആദ്യമായി ഇത്തവണ അത്‌ലറ്റിക്‌സിന് ഓവറോള്‍ കിരീടം ഉണ്ട്. സബ്ജൂനിയര്‍, ജൂനിയര്‍ വിഭാഗങ്ങളുടെ മത്സരങ്ങള്‍ അവസാനിച്ചപ്പോള്‍ കേരളം ഓവറോള്‍ തലത്തില്‍ നാലാമതാണ്. ഒന്നാമതുള്ള ഹരിയാനയേക്കാള്‍ 27 പോയിന്റ്
പിന്നില്‍. ഹരിയാനയെയും ഉത്തര്‍പ്രദേശിനെയും മഹാരാഷ്‌ട്രയെയും പിന്തള്ളിദേശീയ സ്‌കൂള്‍ അത്‌ലറ്റിക്‌സിലെ ഓവറോള്‍ കിരീടം നേടുക എന്ന വന്‍ വെല്ലുവിളിയാണ് സീനിയര്‍ താരങ്ങള്‍ക്കുള്ളത്.
സംഗ്രൂരിലെ വാര്‍ ഹീറോസ് സ്റ്റേഡിയത്തില്‍ രാവിലെ ഒമ്പതിന് ആണ്‍കുട്ടികളുടെ 3000 മീറ്റര്‍ ഫൈനലോടെയാണ് മത്സരങ്ങള്‍ക്ക് തുടക്കമാകുന്നത്. ആദ്യദിവസമായ ഇന്ന് നാല് ൈഫനലുകള്‍ നടക്കും. ആണ്‍കുട്ടികളുടെയും പെണ്‍കുട്ടികളുടെയും 3000 മീറ്റര്‍, പെണ്‍കുട്ടികളുടെ ഹൈജമ്പ്, ആണ്‍കുട്ടികളുടെ ഡിസ്‌കസ് ത്രോ എന്നിവയാണ് ഇന്നത്തെ ഫൈനലുകള്‍.
മൂവായിരം മീറ്ററിലും ഹൈജമ്പിലും കേരളം തികഞ്ഞ പ്രതീക്ഷയിലാണ്. ആണ്‍കുട്ടികളുടെ വിഭാഗത്തില്‍ എറണാകുളം മാര്‍ബേസില്‍ എച്ച്എസ്എസിലെ അമിത്. എന്‍.വിയും കണ്ണൂര്‍ എളയാവൂര്‍ സിഎച്ച്എംഎച്ച്എസ്എസിലെ വിഷ്ണു ബിജുവും പ്രതീക്ഷകളുമായി ഇറങ്ങും. പെണ്‍കുട്ടികളുടെ വിഭാഗത്തില്‍ പാലക്കാട് കല്ലടി എച്ച്എസ്എസിലെസി. ചാന്ദ്‌നി, തിരുവനന്തപുരം സായ്‌യിലെ മിന്നു പി. റോയ് എന്നി
വരാണ് കേരളത്തിന്റെ ഉറച്ച മെഡല്‍ പ്രതീക്ഷകള്‍. ഹൈജമ്പില്‍ ഇരിങ്ങാലക്കുട എന്‍എച്ച്എസ്എസിലെ മീര ഷിബു, തൃശൂര്‍ പന്നിത്തടം കോണ്‍കോഡ് ഇംഗ്ലീഷ് സ്‌കൂളിലെ സാലിഹ. കെ.എച്ച് എന്നിവരും മെഡല്‍ പ്രതീക്ഷയുമായി ഇറങ്ങും. ആണ്‍കുട്ടികളുടെ ഡിസ്‌കസ് ത്രോയില്‍ എറണാകുളം മണീട് ജിഎച്ച്എസിലെ അലക്‌സ് ജോസഫ്, പാലക്കാട് വാണിയംകുളം ടിആര്‍കെഎച്ച്എസ്എസിലെ ദിജിത്ത്. എയും ഇന്ന് ഇറങ്ങും.
