ന്യൂദല്‍ഹി: എസ്പിജി സുരക്ഷ പ്രധാനമന്ത്രിക്കും അദ്ദേഹത്തിനൊപ്പം താമസിക്കുന്ന കുടുംബാംഗങ്ങള്‍ക്കും മാത്രമാക്കിക്കൊണ്ടുള്ള നിയമ ഭേദഗതി ബില്ലിന് രാഷ്ട്രപതി രാംനാഥ് കോവിന്ദ് അംഗീകാരം നല്‍കി. ഇതോടൊപ്പം ദാദ്ര ആന്റ് നാഗര്‍ഹവേലി, ദാമന്‍ ദിയു എന്നീ കേന്ദ്രഭരണ പ്രദേശങ്ങളെ ഒറ്റ കേന്ദ്രഭരണ പ്രദേശമാക്കിയുള്ള ബില്ലിനും രാഷ്ട്രപതി അംഗീകാരം നല്‍കി. നേരത്തെ നിയമഭേദഗതി ബില്ല് പാര്‍ലമെന്റ് പാസാക്കിയിരുന്നു. ഇതിനാണ് രാഷ്‌ട്രപതിയുടെ അംഗീകാരം കൂടി ലഭിച്ചിരിക്കുന്നത്.
നിയമ ഭേദഗതിയും ഗാന്ധി കുടുംബത്തിന് നല്‍കിയിരുന്ന എസ്പിജി സുരക്ഷ പിന്‍വലിക്കലും തമ്മില്‍ ഒരു ബന്ധവുമില്ലെന്ന് കേന്ദ്ര ആഭ്യന്തരമന്ത്രി അമിത്ഷാ രാജ്യസഭയില്‍ വ്യക്തമാക്കിയിരുന്നു.
നിലവിലെ പ്രധാനമന്ത്രി, പ്രധാനമന്ത്രിയുടെ ഔദ്യോഗിക വസതിയില്‍ താമസിക്കുന്ന അടുത്ത ബന്ധുക്കള്‍, മുന്‍ പ്രധാനമന്ത്രിമാര്‍ സ്ഥാനമൊഴിഞ്ഞ് അഞ്ചുവര്‍ഷം വരെ, മുന്‍ പ്രധാനമന്ത്രിക്ക് അനുവദിച്ച ഔദ്യോഗിക ബംഗ്ലാവില്‍ താമസിക്കുന്ന അടുത്ത ബന്ധുക്കള്‍ക്ക് അഞ്ചുവര്‍ഷം എന്നിങ്ങനെയാണ് ഭേദഗതി പ്രകാരം എസ്പിജി സംരക്ഷണം വ്യവസ്ഥ ചെയ്തിരിക്കുന്നത്. പ്രധാനമന്ത്രി നരേന്ദ്രമോദിക്കൊപ്പം അടുത്ത ബന്ധുക്കളാരും തന്നെ താമസിക്കുന്നില്ലാത്തതിനാല്‍ മോദിക്ക് മാത്രമേ എസ്പിജി സംരക്ഷണം നല്‍കൂ. മുന്‍ പ്രധാനമന്ത്രി മന്‍മോഹന്‍ സിങിന്റെ കാലാവധി കഴിഞ്ഞ് അഞ്ചുവര്‍ഷം പിന്നിട്ടതിനാല്‍ അദ്ദേഹത്തിന് എസ്പിജി സേവനം ലഭ്യമല്ല.
പഴയ നിയമ പ്രകാരം മുന്‍ പ്രധാനമന്ത്രിമാരുടെ കുടുംബാംഗങ്ങള്‍ക്ക് ഒരുവര്‍ഷം മാത്രമായിരുന്നു എസ്പിജി സംരക്ഷണം. അവര്‍ എവിടെ താമസിക്കുന്നു എന്നത് വ്യവസ്ഥ ചെയ്തിരുന്നില്ല. എല്ലാവര്‍ഷവും രഹസ്യാന്വേഷണ വിഭാഗത്തിന്റെ റിപ്പോര്‍ട്ട് പ്രകാരമായിരുന്നു ഇവരുടെ എസ്പിജി സംരക്ഷണം പുതുക്കി നിശ്ചയിച്ചിരുന്നത്. മുന്‍ പ്രധാനമന്ത്രി രാജീവ് ഗാന്ധിയുടെ ഭാര്യ, മക്കള്‍ എന്ന നിലയിലായിരുന്നു സോണിയാഗാന്ധി, രാഹുല്‍ഗാന്ധി, പ്രിയങ്കാ വാദ്ര എന്നിവര്‍ക്ക് എസ്പിജി സംരക്ഷണം നല്‍കിക്കൊണ്ടിരുന്നത്. എന്നാല്‍ പുതിയ നിയമ പ്രകാരം അഞ്ചുവര്‍ഷ പരിധിയില്‍ ഗാന്ധി കുടുംബം ഉള്‍പ്പെടില്ല.
സോണിയാ ഗാന്ധി, രാഹുല്‍ ഗാന്ധി, പ്രിയങ്കാ ഗാന്ധി, മുന്‍ പ്രധാനമന്ത്രി ഡോ.മന്‍മോഹന്‍ സിംഗ് എന്നിവര്‍ക്കുള്ള എസ്പിജി സുരക്ഷ നേരത്തെ എടുത്തു കളഞ്ഞിരുന്നു. നെഹ്റു കുടുംബത്തിന് ഇപ്പോള്‍ സിആര്‍പിഎഫ് സുരക്ഷയാണ് നല്‍കുന്നത്.
