മയ്യില്: ഭാരതത്തേയും ആയുര്വേദത്തേയും ഏറെ ഇഷ്ടപ്പെടുന്ന ഡോ.അന്റോണിയോ മൊറാന്റിയും, കാര്മന് ടോസ്ടോയും ആയുര്വേദ നേത്രചികിത്സയുടെ അറിവുകള് തേടി കണ്ണൂര് ജില്ലയിലെ മയ്യില് ഇടൂഴി നേത്രചികിത്സാലയത്തിലെത്തി.
ഇറ്റാലിയന് ന്യൂറോളജിസ്റ്റായ ഡോ.അന്റോണിയോ മൊറാന്റി തന്റെ ഗവേഷണപ്രവര്ത്തനങ്ങള്ക്കിടയിലാണ് ആയുര്വേദത്തെ കൂടുതല് പഠിക്കുവാനും പ്രയോഗിക്കുവാനുമുള്ള ശ്രമം ആരംഭിച്ചത്. കഴിഞ്ഞ മുപ്പത് വര്ഷക്കാലമായി ആയുര്വേദം പഠിക്കുകയും നിരവധി ഗവേഷണപ്രവര്ത്തനങ്ങള്ക്ക് നേതൃത്വം നല്കിവരികയും ചെയ്യുന്നു. ഇന്ന് ഇറ്റലിയിലെ മിലാനില് സ്വന്തമായ് ആയുര്വേദിക് പോയിന്റ് എന്ന ഒരു ആയുര്വേദ കോളേജ് തന്നെ നടത്തിവരുന്നു. അദ്ദേഹത്തിന് കൂട്ടായി യോഗ അധ്യാപിക കൂടിയായ കാര്മന് ടോസ്ടോവും ഒപ്പമുണ്ട്. നാലു വര്ഷം നീണ്ടുനില്ക്കുന്ന ആയുര്വേദ കോഴ്സാണ് ഇറ്റലിയില് നടക്കുന്നത്. ഇന്ന് ഇറ്റലിയിലെ അലോപ്പതി ഡോക്ടര്മാരടക്കം ആയുര്വേദത്തെ മനസ്സിലാക്കുവാനും പഠിക്കാനും ഈ കോളേജില് എത്താറുണ്ട്. രോഗിയെ കൂടതല് അടുത്തറിയാന് ആയുര്വേദപഠനം കൊണ്ട് സാധിക്കുന്നു എന്നാണ് യൂറോപ്പിലെ അലോപ്പതി ഡോക്ടര്മാരുടെ അഭിപ്രായം. മിലാന്ന്റോ സ്റ്റേറ്റ് യൂണിവേഴ്സിറ്റിയില് ഇപ്പോള് അലോപ്പതി മെഡിസിന് പഠനത്തില് അവസാന രണ്ടുവര്ഷം ആയുര്വേദത്തിന്റെ പ്രാഥമികപാഠങ്ങളും പഠിപ്പിക്കുന്നുണ്ട്.
തൃശ്ശൂരിലെ എസ്എന്എ ഔഷധശാലയുമായി ചേര്ന്നുകൊണ്ടാണ് അക്കാഡമിക്ക് പ്രവര്ത്തനങ്ങള് സംയോജിപ്പിക്കുന്നത്. ഇവര്ക്ക് വേണ്ട പ്രായോഗികപരിശീലനം, ഡോ.എ.എന്. നാരായണന് നമ്പിയുടെ നേതൃത്വത്തില് തൃശ്ശൂര് എസ്എന്എ ഔഷധശാലയില് നടക്കുന്നുണ്ട്. ആയുഷ് മന്ത്രാലയം ആയുര്വേദിക് പോയിന്റിനെ ഇറ്റലിയിലെ അംഗീകൃത ആയുര്വേദകേന്ദ്രമാക്കി അംഗീകരിച്ചിട്ടുണ്ട്. ലോകാരോഗ്യ സംഘടനയുടേയും അംഗീകൃത കേന്ദ്രംകൂടിയാണിത്.
ആയുര്വേദിക് പോയിന്റിന്റെ അക്കാഡമിക് പ്രവര്ത്തനങ്ങളുടെ ഭാഗമായി ആയുര്വേദ നേത്രചികിത്സ പഠനങ്ങള്ക്ക് ഡോ. ഇടൂഴി ഉണ്ണികൃഷ്ണന് നമ്പൂതിരി കഴിഞ്ഞ പത്തുവര്ഷക്കാലമായി നേതൃത്വം നല്കാറുണ്ട്. കേരളത്തിലെ പാരമ്പര്യനേത്രചികിത്സാകുടുംബമായ ഇടൂഴി ഇല്ലവും ആയുര്വേദ ആശുപത്രിയും, മറ്റ് പഠനങ്ങളും പ്രവര്ത്തനങ്ങളും നേരിട്ടറിയാനായി കഴിഞ്ഞ ദിവസം ഡോ. അന്റോണിയോ മൊറാന്റിയും, കാര്മന് ടോസ്ടോവും മയ്യിലിലെത്തി. തിുരുകുല പഠനരീതിയെക്കുറിച്ചും നേത്രചികിത്സ, പഞ്ചകര്മ്മചികിത്സ രീതികളെക്കുറിച്ചും അവര് നേരിട്ട് മനസ്സിലാക്കി. ഇടൂഴി ഇല്ലത്തെ അഷ്ടാംഗഹൃദയമടക്കമുള്ള താളിയോലഗ്രന്ഥങ്ങള് ഏറെ അത്ഭുതത്തോടുകൂടിയാണ് അവര് കണ്ട് മനസ്സിലാക്കിയത്. ആയുര്വേദ ഗുരുകുലത്തിലെ ആചാര്യനായ ഡോ. ഇടൂഴി ഭവദാസന് നമ്പൂതിരിയുടെ അരനൂറ്റാണ്ട് പിന്നിട്ട ചികിത്സാനുഭവങ്ങള് ചോദിച്ചറിയാനും ഡോ.മൊറാന്റി സമയം കണ്ടെത്തി. നേത്രചികിത്സാരംഗത്തെ ഗവേഷണങ്ങള്ക്ക് യോജിച്ച പ്രവര്ത്തനങ്ങള് ആവശ്യമാണെന്ന് ഡോ. അന്റോണിയോ മൊറാന്റി അഭിപ്രായപ്പെട്ടു.
