തിരുവനന്തപുരം: ഇന്ത്യ-വെസ്റ്റ് ഇന്ഡീഡ് രണ്ടാം ട്വന്റി20 മത്സരത്തിന് ആശംസകളുമായി മുഖ്യമന്ത്രി പിണറായി വിജയന്. കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടക്കുന്ന മത്സരത്തില് മികച്ച പ്രകടനം കാഴ്ച വെക്കാന് ഇന്ത്യ, വെസ്റ്റ് ഇന്ഡീസ് ടീമുകള്ക്ക് എല്ലാ ആശംസകളും നേരുന്നുവെന്ന് പിണറായി പറഞ്ഞു. മത്സരം ഗ്രീന് പ്രോട്ടോക്കോള് അനുസരിച്ച് നടപ്പാക്കാനാണ് സംഘാടകര് തീരുമാനിച്ചിരിക്കുന്നത്. മത്സരം കാണാനെത്തുന്ന ക്രിക്കറ്റ് പ്രേമികള് പ്ലാസ്റ്റിക് ഒഴിവാക്കി സംഘാടകരോട് സഹകരിക്കണമെന്നും മുഖ്യമന്ത്രി ആഭ്യര്ത്ഥിച്ചു.
വൈകിട്ട് ഏഴിന് നടക്കുന്ന മത്സരം കാണാന് ക്രിക്കറ്റ് ആരാധകരുടെ ഒഴുക്കാണ് തലസ്ഥാനത്തേക്ക്. മലയാളികളെ സംബന്ധിച്ച ആഹ്ലാദകരായ ചില റിപ്പോര്ട്ടുകളാണ് ഇന്ത്യന് ടീമില് നിന്നു പുറത്തുവരുന്നത്. മലയാളി താരം സഞ്ജു സാംസണ് ആദ്യ ഇലവനില് ഇടംപിടിക്കുമെന്ന സൂചനയാണ് ലഭ്യമാകുന്നത്. ഓള് റൗണ്ടര് വാഷിങ്ടണ് സുന്ദറിനു പകരം സഞ്ജുവിനെ ടീം പരീക്ഷിക്കുമെന്നാണു റിപ്പോര്ട്ട്. വാഷിങ്ടണ് സുന്ദര്, ശിവം ദുബെ എന്നിവരില് ഒരാളെ ഒഴിവാക്കി സ്വന്തം നാട്ടില് സഞ്ജുവിനെ ഇറക്കാനാണ് ടീം മാനെജ്മെന്റ് ആലോചിക്കുന്നത്. റണ്ണൊഴുകുന്ന പിച്ചാണ് ഗ്രീന്ഫീല്ഡിലേതെന്നാണു ക്യൂറേറ്റര്മാര് നല്കുന്ന സൂചന.
ഉച്ച തിരിഞ്ഞു ടീം പ്രതിനിധികള് പിച്ച് പരിശോധിക്കാന് എത്തുന്നുണ്ട്. അതിനു ശേഷമാകും സുന്ദര്, ദുബെ എന്നിവരില് ആരെ ഒഴിവാക്കി സഞ്ജുവിനെ ഉള്പ്പെടുത്താന് ആകും എന്നതു തീരുമാനിക്കുക. എന്നാല്, വിക്കറ്റ് കീപ്പറായ ഋഷഭ് പന്തിനു പകരം സഞ്ജുവിനെ ഉള്പ്പെടുത്താനുള്ള സാധ്യത വളരെ വിരളവുമാണ്. അതേസമയം, കഴിഞ്ഞ മത്സരത്തില് മികച്ച പ്രകടനം കാഴ്ചവയ്ക്കാന് സാധിക്കാതിരുന്ന ഫാസ്റ്റ് ബൗളര്മാരായ ഭുവനേശ്വര് കുമാര്, ദീപക് ചഹാര് എന്നിവരില് ഒരാളെ ഒഴിവാക്കി മുഹമ്മദ് ഷമിക്ക് അവസരം നല്കുമെന്നും സൂചനയുണ്ട്.
