ഗുരുവായൂര്: ഏകാദശിവ്രതം നോല്ക്കാനെത്തുന്ന ഭക്തജനസഹസ്രം നാളെ ഗുരുവായൂരിലേക്ക് ഒഴുകിയെത്തും. ഏകാദശിദിനമായ നാളെ, ഗുരുവായൂര് ദേവസ്വം വക ഉദയാസ്തമയ പൂജയോടെയുള്ള വിളക്കാഘോഷമാണ്. ഗജരാജസ്മരണ ഇന്ന്. രാവിലെ 9ന് തിരുവെങ്കിടാചലപതി ക്ഷേത്രാങ്കണത്തില്നിന്ന് പാര്ഥസാരഥി ക്ഷേത്രം വഴിയുള്ള ഗജഘോഷയാത്രയില് ദേവസ്വത്തിലെ ഗജകേസരികള് പങ്കെടുക്കും. ഘോഷയാത്ര തീര്ഥക്കുളം വലംവെച്ച് ശ്രീവത്സം ഗസ്റ്റ്ഹൗസ് വളപ്പിലെ കേശവന്റെ പ്രതിമയില് പുഷ്പാര്ച്ചന നടത്തും. തുടര്ന്ന് ആനയൂട്ട്.
15 ദിവസത്തെ സംഗീതോത്സവത്തിലെ പ്രധാന ഇനമാണ് ഇന്നത്തെ പഞ്ചരത്നകീര്ത്തനാലാപനം. തെന്നിന്ത്യയിലെ 100-ലേറെ പ്രഗദ്ഭരായ സംഗീത പ്രതിഭകള് ഒന്നിച്ചിരുന്ന് ആലപിക്കുന്ന കീര്ത്തനാലാപനം ആസ്വദിക്കാന് വിദേശികളടക്കം നിരവധിപേര് മേല്പ്പത്തൂര് ഓഡിറ്റോറിയത്തില് തിങ്ങിനിറയും. ആകാശവാണിയും, ദൂരദര്ശനും സംഗീതപരിപാടി തത്സമയം സംപ്രേക്ഷണം ചെയ്യും.
നാളെ രാവിലെ പെരുവനം കുട്ടന്മാരാരുടെ മേളപ്രമാണത്തില് നടക്കുന്ന പ്രൗഢഗംഭീരമായ കാഴ്ചശീവേലിക്ക്, ദേവസ്വം ആനതറവാട്ടിലെ കാരണവര് ഗജരത്നം പത്മനാഭന് സ്വര്ണകോലമേറ്റും. ഉച്ചതിരിഞ്ഞുള്ള കാഴ്ചശീവേലിക്ക് കോട്ടപ്പടി സന്തോഷ് മാരാരുടെ നേതൃത്വത്തിലുള്ള മേളം അകമ്പടിയാകും. സന്ധ്യക്ക് പാര്ഥസാരഥി ക്ഷേത്രത്തിലേക്ക് നാമജപ ഘോഷയാത്രയും, പാര്ഥസാരഥിയില് നിന്ന് ഗുരുവായൂര് ക്ഷേത്രത്തിലേക്ക് രഥമെഴുന്നള്ളിപ്പും നടക്കും. ഇത്തവണ രണ്ടുദിവസം ദശമി വരുന്നതിനാല് രണ്ടു ദിവസങ്ങളിലായി ദശമി വിളക്കാഘോഷം നടക്കും. ഇന്നലെ ദേവസ്വം ഭരണസമിതിയും, വെല്ഫെയര് കമ്മിറ്റിയും സംയുക്തമായാണ് വിളക്കാഘോഷം നടത്തിയത്. ഇന്ന് തിരുനാമാചാര്യന് ആഞ്ഞം മാധവന് നമ്പൂതിരി രൂപീകരിച്ച ശ്രീഗുരുവായൂരപ്പന് സങ്കീര്ത്തന ട്രസ്റ്റിന്റെ വകയായുള്ള വിളക്കാഘോഷമാണ്. ഇന്ന് പുലര്ച്ചെ 3ന് നടതുറന്നാല് ദ്വാദശി ദിവസമായ തിങ്കളാഴ്ച രാവിലെ 8നാണ് ക്ഷേത്രനട അടക്കുക.
ദ്വാദശി ദിവസം രാവിലെ 8ന് നട അടച്ചാല് വൈകിട്ട് 3.30ന് നട തുറക്കുകയുള്ളു. ചൊവ്വാഴ്ചത്തെ ത്രയോദശി ഊട്ടോടെ ഏകാദശി വ്രതം പൂര്ത്തിയാക്കി ഈ വര്ഷത്തെ ഏകാദശി മഹോത്സവത്തിന് പരിസമാപ്തിയാകും.
