പാനൂര്: മൊകേരിയില് പണവുമായി പോവുകയായിരുന്ന യുവാവിനെ ബൈക്ക് തടഞ്ഞ് പണം തട്ടിപ്പറിച്ച സംഭവത്തില് സിപിഎമ്മുകാരായ മൂന്നുപേര് പോലീസ് പിടിയിലായി. സിഐ ടി.പി. ശ്രീജിത്തിന്റെ നേതൃത്വത്തിലുള്ള പോലീസ് സംഘമാണ് ക്രിമിനല് സംഘത്തെ പിടികൂടിയത്. സജീവ സിപിഎം പ്രവര്ത്തകരായ മുത്താറിപ്പീടികയിലെ തെക്കിലാണ്ടിയില് ജുബീഷ് (28), മൊകേരി കടേപ്രത്തെ ബൈത്തുല് സൈനയില് എം.പി. ഷിനോസ് (25), കടേപ്രത്തെ കൃഷ്ണാലയത്തില് കെ.എം. സനില് (24) എന്നിവരാണ് പിടിയിലായത്.
കുഴല്പണ ഇടപാടുമായി ബന്ധമുള്ള ഷിനോസ് മറ്റ് പ്രതികളെ സംഘത്തില് ചേര്ത്ത് കവര്ച്ച നടത്തുകയായിരുന്നു. പിടിയിലായവര്ക്ക് ലഭിച്ച വിഹിതം ഇവരുടെ വീടുകളില് നിന്നും പോലീസ് കണ്ടെടുത്തു. ഹവാല പണം തട്ടിയെടുത്ത് ആര്ഭാട ജീവിതം നയിക്കലാണ് പ്രതികളുടെ രീതിയെന്ന് പോലീസ് വെളിപ്പെടുത്തി. കണക്കില്ലാത്ത പണമായതിനാല് കവര്ച്ചക്കിരയാവുന്നവര് പരാതി നല്കാന് കൂട്ടാക്കാത്തത് ഇത്തരം പിടിച്ചുപറിക്കാര്ക്ക് തുണയാവുകയാണ്.
കഴിഞ്ഞ 26ന് രാവിലെ 11 മണിയോടെ ചമ്പാട് അരയാക്കൂല് സ്വദേശി അഷ്റഫ് ലത്തീഫില് നിന്നാണ് പ്രതികള് പണം തട്ടിപ്പറിച്ചത്. കൂരാറ-മാക്കൂല്പ്പീടിക റോഡില് ഗവ. ഹോമിയോ ഡിസ്പന്സറിക്കടുത്ത് വെച്ചാണ് 8,64,000 രൂപ തട്ടിയെടുത്തത്. സംഘത്തില് പെട്ട നാലുപേര് ഒളിവിലാണുള്ളതെന്നും ഇവരെയും ഉടന് പിടികൂടുമെന്നും പോലീസ് അറിയിച്ചു. ഇതില് സിപിഎം, ഡിവൈഎഫ്ഐ നേതാക്കളും ഉള്ളതായി സൂചനയുണ്ട്. മൊകേരിയിലെ സിപിഎം നേതാക്കള് ഹവാല പണക്കാരുമായി ഇടപ്പെട്ട് കേസ് ഒതുക്കാനും ശ്രമിച്ചിരുന്നു. സിസിടിവി ക്യാമറയില് നിന്ന് ലഭിച്ച ദൃശ്യങ്ങളുടെ അടിസ്ഥാനത്തിലാണ് പ്രതികളെക്കുറിച്ചുള്ള വിവരങ്ങള് പോലീസിന് ലഭിച്ചത്.
പാനൂര് മേഖലയില് കുഴല്പ്പണക്കാരില് നിന്നും പണം തട്ടുന്ന സംഘത്തിനെതിരെ പാനൂര് സിഐയുടെ നേതൃത്വത്തില് ശക്തമായ നടപടിയെടുത്ത് നിരവധി പേരെ അറസ്റ്റു ചെയ്തെങ്കിലും പണം തട്ടല് വീണ്ടും കൂടുതല് സജീവമാകുകയാണ്. അറസ്റ്റിലായ പ്രതികള് ബിജെപി പ്രവര്ത്തകരെ അക്രമിച്ച സംഭവത്തിലടക്കം പ്രതികളാണ്. പാത്തിപാലം, മുത്താറിപ്പീടിക ഭാഗത്തെ സ്ഥിരം ക്രിമിനിലുകളാണിവര്.
