ന്യൂദല്ഹി: കോണ്ഗ്രസിന്റെ കുത്തക മണ്ഡലമായ റായ്ബറേലിയിലെ യുവ എംഎല്എ അയോഗ്യയാക്കാന് പാര്ട്ടി തീരുമാനം. കോണ്ഗ്രസിലെ യുവനേതാവായ അദിതി സിങിനെതിരെയാണ് കോണ്ഗ്രസിന്റെ പ്രതികാരനടപടി. എംഎല്എയെ അയോഗ്യയാക്കണമെന്നാവശ്യപ്പെട്ട് കോണ്ഗ്രസ് നിയമസഭാ കക്ഷി നേതാവ് ആരാധന മിശ്ര ഉത്തര്പ്രദേശ് സ്പീക്കര്ക്കാണ് കത്ത് നല്കിയെന്ന് ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
കോണ്ഗ്രസ് നിലപാടിനെ പരസ്യമായി തള്ളി അദിതി സിങ് നേരത്തെ രംഗത്തെത്തിയത് പ്രിയങ്ക വദ്രയെ പ്രകോപിപ്പിച്ചിരുന്നു. കോണ്ഗ്രസ് ബഹിഷ്കരിക്കാന് ആഹ്വാനം ചെയ്ത യോഗി സര്ക്കാരിന്റെ ഗാന്ധി ജയന്തി ദിനത്തിലെ പരിപാടിയില് പൂര്ണ്ണമായും അദിതി പങ്കെടുത്തതാണ് പ്രിയങ്കയെ ചൊടിപ്പിച്ചത്. പാര്ട്ടി വിപ്പ് ലംഘിച്ച് ഒക്ടാബര് രണ്ടിന് നടന്ന പ്രത്യേക നിയസഭാ സമ്മേളനത്തില് അദിതി സിങ് പങ്കെടുത്തതാണ് അയോഗ്യത പരാതിക്കാധാരമായതെന്ന് കോണ്ഗ്രസുമായിട്ടുള്ള അടുത്ത വൃത്തങ്ങള് വ്യക്തമാക്കുന്നു.
ഇതിനെ തുടര്ന്ന് പ്രിയങ്കയുടെ നേതൃത്വത്തില് ലഖ്നൗവില് കോണ്ഗ്രസ് നടത്തിയ പരിപാടിയില് അദിതി പങ്കെടുത്തില്ല. തുടര്ന്ന് കോണ്ഗ്രസിന്റെ ഗുണ്ടാപ്പട ഇവരുടെ വീടിന് മുന്നില് വെല്ലുവിളി നടത്തിയിരുന്നു. ഇതിനു പിന്നാലെ തനിക്ക് സുരക്ഷ വര്ധിപ്പിക്കണമെന്ന് അദിതി സര്ക്കാരിനോട് അഭ്യര്ഥിച്ചിരുന്നു. അപേക്ഷ പരിഗണിച്ച യോഗി ആദിത്യനാഥ് സര്ക്കാര് അതിദിക്കു വൈ പ്ലസ് സുരക്ഷ അനുവദിക്കുകയും ചെയ്തു.ഒക്ടോബര് 22 മുതല് 24 വരെ നടന്ന പാര്ട്ടി പരിശീലന പരിപാടിയില് നിന്നും അദിതി വിട്ട് നിന്നു. ഇതിന് നല്കിയ കാരണം കാണിക്കല് നോട്ടീസിനും അവര് മറുപടി നല്കിയിരുന്നില്ലന്നുമാണ് കോണ്ഗ്രസ് ആരോപിക്കുന്നത്.
ഗാന്ധി കുടുംബവുമായി അടുത്ത ബന്ധമുള്ള അഖിലേഷ് സിങ്ങിന്റെ മകളാണ് അദിതി. റായ്ബറേലി ലോക്സഭാ മണ്ഡലത്തില് അഞ്ച് നിയമസഭാ മണ്ഡലങ്ങളാണുള്ളത്. അതില് രണ്ടെണ്ണം കോണ്ഗ്രസിനൊപ്പവും രണ്ടെണ്ണം ബി.ജെ.പിക്കൊപ്പവും ഒരെണ്ണം സമാജ്വാദി പാര്ട്ടിക്കൊപ്പവുമാണുള്ളത്. നിയമസഭാ സമ്മേളനത്തില് പങ്കെടുത്ത് തന്റെ മണ്ഡലത്തിലെ കുടിവെള്ള, ശുചിത്വ പ്രശ്നങ്ങള് അദിതി ചൂണ്ടിക്കാട്ടി. മണ്ഡലത്തിലെ പ്രശ്നങ്ങള് മുന്നിരയിലേക്ക് കൊണ്ടുവരുന്നതിന് ഇത് നല്ലൊരവസരമായി കണ്ടുവെന്ന് പിന്നീട് ന്യൂസ്18ന് നല്കിയ പ്രത്യേക അഭിമുഖത്തിനിടെ അവര് പ്രതികരിച്ചിരുന്നു. വികസനം കൊണ്ടുവരാനാണ് ജനങ്ങള് വോട്ട് ചെയ്ത് എന്നെ തിരഞ്ഞെടുത്തത്. പാര്ട്ടി എടുക്കുന്ന തീരുമാനം അനുസരിക്കാന് ഞാന് ബാധ്യസ്ഥയാണ്. അതേ സമയം എനിക്ക് ശരിയെന്ന് തോന്നുന്ന കാര്യങ്ങള് ഞാന് ചെയ്തുവെന്നും അദിതി പറഞ്ഞു.
ജമ്മുകശ്മിരിന് പ്രത്യേക പദവി നല്കുന്ന 370ാം അനുച്ഛേദം എടുത്ത് കളഞ്ഞ കേന്ദ്ര സര്ക്കാര് നടപടിയേയും അവര് നേരത്തെ പിന്തുണച്ചിരുന്നു. 2017ല് നടന്ന നിയമസഭാ തെരഞ്ഞെടുപ്പില് 90,000ത്തോളം വോട്ടുകള്ക്കാണ് അദിതി ജയിച്ചത്. യു.പി നിയമസഭയിലെ ഏറ്റവും പ്രായം കുറഞ്ഞ എം.എല്.എമാരില് ഒരാളാണ് 31കാരിയായ അദിതി. നെഹ്റു കുടുംബത്തോടെ ഏറ്റവും അടുപ്പമുള്ള എം.എല്.എയായിരുന്നു അദിതി സിങ്. എന്നാല്, പ്രിയങ്ക വദ്ര യു.പിയുടെ ചുമതല ഏറ്റെടുത്തതോടെ ഇവര് നേതൃത്വവുമായി ഇടയുകയായിരുന്നു. അദിതി സിങിനെതിരെ പാര്ട്ടി നീങ്ങുന്നതില് പ്രവര്ത്തകര് പ്രതിഷേധം ഉയര്ത്തിയിട്ടുണ്ട്.
