ഇടുക്കി: സിപിഎം സഹകരണ ആശുപത്രി പ്രവര്ത്തിക്കുന്നത് വ്യാജ രേഖയുണ്ടാക്കി ഭൂമി തട്ടിയെടുത്താണെന്ന് ആരോപണം. കട്ടപ്പനയിലെ മുന് സിഐടിയു നേതാവ് ലൂക്ക ജോസഫിന്റെ നേതൃത്വത്തില് മറ്റൊരാളുടെ ഭൂമി തട്ടിയെടുത്താണ് ആശുപത്രി കെട്ടിടം പ്രവര്ത്തിക്കുന്നത്. 2010 വരെ കരടമടച്ച ഭൂമിയുടെ തണ്ടപ്പേര് തിരുത്തി വ്യാജ രേഖയുണ്ടാക്കിയാണ് ഇയാള് ഭൂമി തട്ടിയെടുത്തത്.
ഭൂമിയുടെ വില്ലേജ് ഓഫീസ് രേഖകളില് നിന്നും ഇയാള് യഥാര്ത്ഥ തണ്ടപ്പേര് കീറിമാറ്റി ലൂക്ക ജോസഫിന്റെ പേര് ഒട്ടിച്ചു ചേര്ക്കുകയായിരുന്നു. മുന് വില്ലേജ് ഓഫീസറുടെ സഹായത്തോടെയാണ് ഈ തട്ടിപ്പ് നടത്തിയതെന്നും ആരോപണമുണ്ട്. സ്വകാര്യമാധ്യമമാണ് ഇതുസംബന്ധിച്ചുള്ള റിപ്പോര്ട്ട് പുറത്തുവിട്ടത്.
വാഴവര സ്വദേശി സിബി 2006 ഏപ്രിലില് വാങ്ങുകയും 2010 വരെ കരമടക്കുകയും ചെയ്തിരുന്ന ഭൂമിയിയില് 2010 വരെ തുടര്ച്ചയായി കരം അടച്ചിരുന്നു. അതിനുശേഷം മുടങ്ങിപ്പോയ കരം വീണ്ടും അടക്കാന് ചെന്നപ്പോഴാണ് ആ തണ്ടപ്പേരില് അങ്ങനെ ഒരു ഭൂമിയേ ഇല്ലെന്നാണ് കട്ടപ്പന വില്ലേജ് ഓഫീസ് അറിയിച്ചത്. ഇതിനെ തുടര്ന്ന് സിബിയുടെ പരാതിയില് വില്ലേജ് ഓഫീസര് നടത്തിയ പരിശോധനയില് ഇതേ തണ്ടപ്പേരില് മറ്റൊരു ഭൂമിക്ക് ലൂക്ക ജോസഫ് എന്നയാള് കരമടക്കുന്നതായി കണ്ടെത്തുകയായിരുന്നു. എന്നാല് തണ്ടപ്പേരില് മാത്രമാണ് മാറ്റം സംഭവിച്ചിരിക്കുന്നത്. അല്ലാതെ ഭൂമി സ്വന്തമാണെന്ന് തെളിയിക്കുന്നതിന്റെ രേഖകളൊന്നും ലൂക്കയുടെ പക്കലില്ല.
രേഖകളൊന്നുമില്ലാത്തതിനാല് ഈ കെട്ടിടം പണിയുന്നതിന് ആദ്യം കട്ടപ്പന മുന്സിപ്പാലിറ്റി അനുമതി നിഷേധിച്ചിരുന്നു. ഇതോടെ വര്ഷങ്ങളായി കരമടക്കാതെ കിടന്നിരുന്ന ഒരു ഭൂമിയുടെ തണ്ടപ്പേര് അടിച്ചുമാറ്റി ലൂക്ക അവിടെ സഹകരണ ആശുപത്രി പ്രവര്ത്തനം ആരംഭിക്കുകയായിരുന്നു.
മൂന്ന് വര്ഷം മുമ്പ് നടന്ന തട്ടിപ്പിന് ലൂക്കയ്ക്ക് എല്ലാ ഒത്താശയും ചെയ്തു കൊടുത്തത് മുന് വില്ലേജ് ഓഫീസര് ആന്റണിയാണ്. ജില്ലയിലെ ഉന്നത സിപിഎം നേതാക്കളുടെ പിന്തുണയിലാണ് ലൂക്ക ഈ തട്ടിപ്പ് നടത്തിയതെന്നാണ് ആരോപണം.
