ന്യൂദല്ഹി : അയോധ്യ കേസില് സുപ്രീംകോടതി വിധിക്ക് ശേഷവും സമാധാന അന്തരീക്ഷം നിലനിര്ത്തിയതില് ജനങ്ങള്ക്ക് നന്ദി അറിയിക്കുന്നതായി പ്രധാനമന്ത്രി നരേന്ദ്രമോദി. പ്രതിമാസ റേഡിയോ പരിപാടിയായ മന് കി ബാത്തിലുടെയാണ് മോദി ഇക്കാര്യം വെളിപ്പെടുത്തിയത്. രാജ്യം ഉറ്റുനോക്കിയിരുന്ന അയോധ്യ വിധി പ്രസ്താവനയ്ക്കുശേഷം ജനങ്ങള് സ്വീകരിച്ച നിലപാട് ശ്രദ്ധേയമാണ്.
നമ്മുടെ സമാധാനവും ഐക്യവും വൈവിധ്യത്തേയുമാണ് ഇത് സൂചിപ്പിക്കുന്നതെന്നും പ്രധാനമന്ത്രി അറിയിച്ചു. കേസില് സുപ്രീംകോടതി സ്വീകരിച്ചിട്ടുള്ള നിലപാട് രാജ്യത്തെ ജനങ്ങള്ക്ക് നിയമ വ്യവസ്ഥയില് ജനങ്ങള്ക്കുള്ള വിശ്വാസവും വര്ധിപ്പിച്ചിട്ടുണ്ടെന്നും മോദി അറിയിച്ചു.
അതേസമയം ഡിസംബര് ഏഴിന് രാജ്യം സായുധ സേന ദിനമായി ആചരിക്കും. ജനങ്ങള് ഓരോരുത്തരും സായുധ സേന നിര്വ്വഹിക്കുന്ന കടമകളെ കുറിച്ച് ഓര്ക്കേണ്ടതാണ്. സൈനികരുടെ ധീരത, ധൈര്യം, സാഹസികത, ജീവത്യാഗം എന്നിവയെ കുറിച്ചും അദ്ദേഹം മന് കീ ബാത്തില് സംസാരിച്ചു. രാജ്യത്തെ ജനങ്ങള്ക്ക് സംരക്ഷണം നല്കുന്ന സൈനികര്ക്ക് ആദരം അര്പ്പിക്കുന്നതായും പ്രധാനമന്ത്രി അറിയിച്ചു.
കൂടാതെ ഭരണാഘടനാ ദിനമായ നവംബര് 26-നെ കുറിച്ചും അദ്ദേഹം മന് കീ ബാത്തില് സൂചിപ്പിച്ചു. ഫിറ്റ് ഇന്ത്യാ വാരത്തിന് പ്രധാനമന്ത്രി തുടക്കം കുറിച്ചു. രാജ്യത്തെ വിദ്യാലയങ്ങള്ക്ക് ഏത് ആഴ്ച വേണമെങ്കിലും ഫിറ്റ് ഇന്ത്യാ വാരമായി തെരഞ്ഞെടുക്കാമെന്നും അദ്ദേഹം പറഞ്ഞു. മനസും ശരീരവും ആരോഗ്യപരമായി നിലനിര്ത്തണം. നന്നായി ഭക്ഷണം കഴിക്കുക, കൃത്യസമയത്ത് ഉറങ്ങുക, പതിവായി വ്യായാമം ചെയ്യുക തുടങ്ങിയ പ്രവണതകള് ഇതിനു വേണ്ടി ആരംഭിക്കണമെന്നും അദ്ദേഹം സൂചിപ്പിച്ചു.
നദികളുടെ ആരാധന, സംരക്ഷണം എന്നിവയെ കുറിച്ചും പ്രധാനമന്ത്രി സംസാരിച്ചു. നദി ആരാധന ആഘോഷങ്ങളില് തീര്ത്ഥാടന സൗകര്യം ഒരുക്കുന്നതിനും ഉത്സവ ടൂറിസത്തിന്റെ പ്രാധാന്യത്തെ കുറിച്ചും അദ്ദേഹം സംസാരിച്ചു.
ആന്ധ്രാപ്രദേശ് മംഗാമാരിപേട്ട ബീച്ചില് നിന്ന് 4000 കിലോ പ്ലാസ്റ്റ്ക് നീക്കം ചെയ്ത സ്കൂബ ഡൈവേഴ്സിനെ പരിപാടിയില് പ്രശംസിച്ചു. മാതൃഭാഷയായ റാഗ്ലോയെ സംരക്ഷിക്കാന് ധാര്ചുല് നടത്തുന്ന സമരത്തേയും അദ്ദേഹം പ്രശംസിച്ചു. ലിപിയില്ലാത്ത റാംഗ്ലോ ഭാഷയെ നിലനിര്ത്താന് ജനങ്ങള് ശ്രമിക്കണമെന്നും അദ്ദേഹം പറഞ്ഞു.
എക്സാം വാരിയര് എന്ന പേരില് വിദ്യാര്ത്ഥികള്ക്കായി തയ്യാറാക്കുന്ന അടുത്ത എപ്പിസോഡ് പരീക്ഷയ്ക്ക് മുമ്പു തന്നെ പ്രക്ഷേപണം ചെയ്യുമെന്ന് അദ്ദേഹം പറഞ്ഞു. വിദ്യാര്ഥികളുമായി സംവദിക്കുന്നതിനിടെയാണ് ഇക്കാര്യം വ്യക്തമാക്കിയത്. കൊഹിമ, ന്യൂദല്ഹി, റോഹ്താക് എന്നിവിടങ്ങളില് നിന്നുള്ള എന്സിസി കേഡറ്റുകളുമായി പരിപാടിയില് മോദി സംസാരിച്ചു. കൂടാതെ എന്സിസി കേഡറ്റായി പ്രവര്ത്തിക്കേ തനിക്കുണ്ടായ അനുഭവങ്ങളും അദ്ദേഹം വിദ്യാര്ത്ഥികളുമായി പങ്കുവെച്ചു.
