ന്യൂദല്ഹി : ഇന്ത്യയില് നിന്നുള്ള വിവരങ്ങള് ചോര്ത്താന് പാക്കിസ്ഥാന്റെ ചാര സംഘടന ഐഎസ്ഐ ശ്രമം നടത്തുന്നു. സമൂഹ മാധ്യമങ്ങള് വഴി പ്രതിരോധ ഉദ്യോഗസ്ഥരെ ലക്ഷ്യംവെച്ച് ഇവര് പ്രവര്ത്തിക്കുന്നതെന്നാണ് റിപ്പോര്ട്ട്. വാര്ത്ത ഏജന്സിയാണ് ഇതുസംബന്ധിച്ചുള്ള വാര്ത്ത പുറത്തുവിട്ടത്.
പാക്കിസ്ഥാന് രഹസ്യാന്വേഷണ പ്രവര്ത്തകന് ഇന്ത്യന് ആര്മി ഓഫിസറെ ഒരു വാട്സാപ് ഗ്രൂപ്പില് ചേര്ത്തതായി കണ്ടെത്തിയിരുന്നു. ഇതിന്റെ അടിസ്ഥാനത്തില് നടത്തിയ അന്വേഷണത്തിലാണ് ഇന്ത്യന് പ്രതിരോധ ഉദ്യോഗസ്ഥരെ ലക്ഷ്യമിട്ട് ഐഎസ്ഐ പ്രവര്ത്തിക്കുന്നത് ശ്രദ്ധയില് പെടുന്നത്. ഇതോടെ ഉദ്യോഗസ്ഥരോട് അവരുടെ വാട്സാപ് സെറ്റിങ്സ് അടിയന്തരമായി മാറ്റാന് ഉപദേശം നല്കിക്കഴിഞ്ഞു. ഉദ്യോഗസ്ഥരോട് ജാഗ്രത പാലിക്കാന് കരസേന മുന്നറിയിപ്പ് നല്കി.
പാക്കിസ്ഥാനില് നിന്നുള്ള +9230332569307 എന്ന നമ്പറാണ് സൈനികനെ വാട്സാപ് ഗ്രൂപ്പിലേക്ക് ചേര്ത്തത്. പാക് ഗ്രൂപ്പിന്റെ വിവരങ്ങള് സ്ക്രീന്ഷോട്ട് എടുത്ത ശേഷം സൈനികന് ഗ്രൂപ്പില് നിന്ന് പുറത്തുകടക്കുകയും ചെയ്തു. ഇത് സൈനികന് ഉന്നത വൃത്തങ്ങള്ക്ക് കൈമാറിയതോടെ ഈ മാസം 11 ന് ഉദ്യോഗസ്ഥരും അവരുട കുടുംബാംഗങ്ങളും വാട്സാപ് സെറ്റിങ്സ് മാറ്റാന് ആവശ്യപ്പെട്ട് കരസേന നോട്ടീസ് നല്കുകയായിരുന്നു.
രണ്ട് കരസേന ജവാന്മാര് പാക് ചാരസംഘടയുടെ ഹണി ട്രാപ്പില്പ്പെടുത്താന് ശ്രമം നടത്തിയതായി ഇതിനു മുമ്പ് റിപ്പോര്ട്ടുകള് പുറത്തുവന്നിരുന്നു. കൂടാതെ കഴിഞ്ഞ കുറച്ച് വര്ഷങ്ങളായി ഇന്ത്യന് ഉദ്യോഗസ്ഥരെ വശീകരിച്ച് വിവരങ്ങള്ചോര്ത്താനുള്ള നിരവധ ിപാക് ശ്രമങ്ങള് പുറത്തുവന്നിരുന്നു.
അതേസമയം വാട്സ് ആപ്പ് എത്രയും പെട്ടെന്ന് നീക്കം ചെയ്യണമെന്ന് ടെലിഗ്രാം സ്ഥാപകന് പാവെല് ദുരോവ്. ഉപയോക്താക്കളുടെ സ്വകാര്യ വിവരങ്ങള് ചോര്ത്താന് വാട്സ് ആപ്പ് നിരന്തരം ഉപയോഗിക്കപ്പെടുമെന്ന് ചൂണ്ടിക്കാട്ടിയാണ് ടെലിഗ്രാം സ്ഥാപകന്റെ മുന്നറിയിപ്പ്.
