തിരുവനന്തപുരം: വേദമന്ത്രങ്ങളുടെ മുഖരിതത്താല് ശ്രീപദ്മനാഭസ്വാമി ക്ഷേത്രത്തില് മുറജപത്തിന് തുടക്കമായി. ആറുകൊല്ലത്തിലൊരിക്കല് നടക്കുന്ന മുറജപം 2020 ജനുവരി 15ന് നടക്കുന്ന ലക്ഷദീപത്തോടെയാണ് സമാപിക്കുക. രാജ്യത്തിന്റെ ക്ഷേമത്തിനായി തിരുവിതാംകൂര് രാജാക്കന്മാര് നൂറ്റാണ്ടുകള്ക്ക് മുമ്പ് ആരംഭിച്ചതാണ് മുറജപം. ഇന്നലെ പുലര്ച്ചെ മുതല് ക്ഷേത്രമതിലകത്തെ മണ്ഡപങ്ങളില് വേദമന്ത്രങ്ങള് ആരംഭിച്ചിരുന്നു.
രാവിലെ 5ന് തന്ത്രി തരണനല്ലൂര് സതീശന് നമ്പൂതിരിപ്പാടിന്റെ നേതൃത്വത്തില് ഗണപതിഹോമത്തോടെയാണ് ചടങ്ങുകള് ആരംഭിച്ചത്. മുന്കൂട്ടി നിശ്ചയിച്ച മണ്ഡപങ്ങളില് 6.15ന് വൈദികരുടെ നേതൃത്വത്തില് മുറജപം ആരംഭിച്ചു. കുലശേഖരമണ്ഡപത്തില് നടന്ന സഹസ്രനാമജപത്തില് ഭക്തരും പങ്കെടുത്തു. നിരവധി ഭക്തര് മുറജപം കാണാനും വേദോച്ചാരണം കേള്ക്കാനും മതിലകത്തെത്തിയിരുന്നു.
10 മണിക്ക് ജപം അവസാനിച്ചപ്പോള് വൈദികര്ക്ക് ക്ഷേത്രം അധികൃതര് ദക്ഷിണ നല്കി. വൈകിട്ട് 6ന് പദ്മതീര്ഥക്കുളത്തിന്റെ തെക്കും കിഴക്കും കല്പ്പടവുകളില് ജലജപം നടന്നു. മുറജപത്തില് പങ്കെടുക്കുന്ന വൈദികരെല്ലാം ജലജപത്തിലും അണിനിരന്നു. പതിറ്റാണ്ടുകള്ക്ക് ശേഷം നടക്കുന്ന ജലജപം കാണാനെത്തിയ ഭക്തരെക്കൊണ്ട് പദ്മതീര്ഥക്കര നിറഞ്ഞിരുന്നു.
ക്ഷേത്രം എക്സിക്യൂട്ടീവ് ഓഫീസര് വി. രതീശന്, മാനേജര് ബി. വിജയകുമാര്, ഭരണസമിതി അംഗം എസ്. വിജയകുമാര് എന്നിവര് ചടങ്ങുകളില് പങ്കെടുത്തു. എട്ടുദിവസം കൂടുന്ന ആദ്യമുറ 28ന് അവസാനിക്കും. രാത്രി 8.30ന് അനന്തവാഹനത്തില് മുറശീവേലി നടക്കും. 29ന് രണ്ടാം മുറജപം ആരംഭിക്കും.
