കാസര്കോട്: അറുപതാമത് സംസ്ഥാന സ്ക്കൂള് കലോത്സവത്തില് മത്സരിക്കാനെത്തുന്ന മുഴുവന് കുട്ടികള്ക്കും കാസര്കോട് കലോത്സവം ഓര്ത്ത് വെക്കത്തക്ക വിധം ഓര്മ്മ ട്രോഫി നല്കി സന്തോഷിപ്പിക്കാന് പന്തീരായിരം ട്രോഫികള് പണിപ്പുരയില് ഒരുങ്ങുകയാണ്. ഏഷ്യയിലെ ഏറ്റവും വലിയ കൗമാര കലാമേളയില് സംസ്ഥാന തലത്തിലെ പങ്കാളിത്തം തന്നെ കഴിവിന്റെയും മികവിന്റെയും അളവും, അടയാളവുമാണെന്നിരിക്കെ, കപ്പിനും ചുണ്ടിനും ഇടയില് ഭാഗ്യം കൈവിട്ടുപോയാലും പങ്കാളിത്ത മികവിന്റെ പ്രോത്സാഹന ട്രോഫി പന്ത്രണ്ടായിരത്തോളം വരുന്ന പ്രതിഭാധനരായ മത്സരാര്ത്ഥികള്ക്ക് ആശ്വാസവും ആനന്ദവും നല്കും.
കാസര്കോടിന്റെ വിനോദ സഞ്ചാര പശ്ചാത്തലത്തിലൊരുങ്ങുന്ന ഓര്മ്മ ട്രോഫി ജില്ലയെയും മേളയെയും ഓര്ത്ത് വെക്കാന് ഉതകുന്നതാകും. അര്ഹരായ മത്സരാര്ത്ഥികള്ക്കുള്ള മുഴുവന് സര്ട്ടിഫിക്കറ്റുകളും പൊടി പുരളാതെ സംസ്ഥാന അതിര്ത്തിയായ വടക്കെ അറ്റത്ത് നിന്ന് നാട്ടിലേക്ക് കൊണ്ടു പോകാന് പേപ്പര് കവറില് നല്കാനും ഒരുക്കങ്ങള് പൂര്ത്തിയായി വരുന്നു. സംസ്ഥാന ജേതാക്കള്ക്കുള്ള 117 പവന് തനിത്തങ്ക സ്വര്ണ്ണക്കപ്പിന് കാലിക്കടവ് മുതല് രാജകീയ വരവേല്പ്പ് നല്കാനുള്ള നല്ല ഒരുക്കവും പൂര്ത്തിയായി.
‘സ്വര്ണ്ണക്കപ്പിന്റെ നാള്വഴികള്’ എന്ന ഡൊക്യുമെന്ററി പ്രദര്ശനത്തോടെയായിരിക്കും സ്വര്ണ്ണക്കപ്പ് വരവേല്പ്പ്. പിലിക്കോട്, ചെറുവത്തൂര് കൊവ്വല്, നീലേശ്വരം, ഹോസ്ദുര്ഗ് എന്നിവിടങ്ങളിലാണ് ഡൊക്യുമെന്ററിയുടെ പ്രദര്ശനം. ചെയര്മാന് റസാഖ് തായലക്കണ്ടി കണ്വീനര് യഹ് യഖാന് , സഹ ഭാരവാഹികളായ ഹക്കീം മാടക്കാല്, നാസര് കല്ലൂരാവി,അഡ്വ. വേണുഗോപാല്, ഇസ്മയില് കക്കുന്നം, ഹസന് ഇരിയ, നസീമ ടീച്ചര് എന്നിവരുടെ നേതൃത്വത്തില് പ്രവര്ത്തനങ്ങള് പുരോഗമിക്കുന്നു.
