കൊച്ചി: ശബരിമല തീര്ഥാടകര്ക്ക് സഹായമൊരുക്കി കൊച്ചി വിമാനത്താവളത്തില് 24 മണിക്കൂര് പ്രവർത്തിക്കുന്ന പ്രത്യേക കൗണ്ടര് തുറന്നു. ഡൊമസ്റ്റിക്ക് ടെര്മിനലിന്റെ പ്രവേശന ഭാഗത്താണ് കൗണ്ടര് പ്രവര്ത്തിക്കുന്നത്. മണ്ഡലകാലം സൗകര്യപ്രദമാക്കുക എന്ന ലക്ഷ്യത്തിന്റെ ഭാഗമായാണ് 24 മണിക്കൂര് കൗണ്ടര് ആരംഭിച്ചത്.
തിരുവിതാംകൂര് ദേവസ്വം ബോര്ഡിനു വേണ്ടി ധനലക്ഷ്മി ബാങ്ക് ആരംഭിച്ചിരിക്കുന്ന കൗണ്ടറില് നിന്നും അപ്പം, അരവണ, നെയ്യ് അഭിഷേകം എന്നിവയ്ക്കുള്ള കൂപ്പണുകളും ലഭ്യമാണ്. തീര്ഥാടകര്ക്കാവശ്യമായ നിര്ദ്ദേശങ്ങളും കൗണ്ടറില് നിന്നു വാങ്ങാം. കഴിഞ്ഞ ദിവസമാണ് ദേവസ്വം ബോര്ഡ് പ്രസിഡന്റ് എന് വാസുവാണ് കൗണ്ടര് ഉദ്ഘാടനം ചെയ്തത്.
