മുംബൈ: മഹാരാഷ്ട്രയില് സര്ക്കാര് ഉണ്ടാക്കാന് ഇനി ശിവസേനയ്ക്ക് സമയം അനുവദിക്കില്ലെന്ന് വ്യക്തമാക്കി രാജ്ഭവന്. മൂന്നാമത്തെ എറ്റവും വലിയ ഒറ്റകക്ഷിയായ എന്സിപിയെ സര്ക്കാര് ഉണ്ടാക്കാന് ഗവര്ണര് ക്ഷണിച്ചു. 24 മണിക്കൂറിനുള്ളില് എന്സിപി സര്ക്കാരുണ്ടാക്കാനുള്ള ശക്തി തെളിയിക്കാനാണ് ഗവര്ണര് ആവശ്യപ്പെട്ടിരിക്കുന്നത്. സര്ക്കാരുണ്ടാക്കാന് ശിവസേനയ്ക്ക് നല്കിയ സമയം ഇന്ന് വൈകിട്ട് എട്ടിന് അവസാനിച്ചതിന് പിന്നാലെയാണ് എന്സിപിയെ ഗവര്ണര് ക്ഷണിച്ചിരിക്കുന്നത്. എന്സിപിയും കോണ്ഗ്രസും ശിവസേനയ്ക്ക് സര്ക്കാരുണ്ടാക്കാന് പിന്തുണക്കത്ത് നല്കില്ലത്തതാണ് സര്ക്കാര് ഉണ്ടാക്കാനുള്ള ശ്രമങ്ങള്ക്ക് തിരിച്ചടിയായത്. സര്ക്കാരുണ്ടാക്കാന് രണ്ടുദിവസത്തെ സമയം കൂടി അനുവദിക്കണമെന്ന് ഗവര്ണറോട് ശിവസേന ആവശ്യപ്പെട്ടിരുന്നു. എന്നാല്, ഗവര്ണര് ഇതു തള്ളി.
മഹാരാഷ്ട്രയില് ഏറ്റവും വലിയ ഒറ്റകക്ഷിയായ ബിജെപി സര്ക്കാര് രൂപീകരിക്കാനില്ലെന്ന് ഗവര്ണറെ അറിയിച്ചതോടെയാണ് രണ്ടാമത്തെ ഒറ്റകക്ഷിയായ ശിവസേന സര്ക്കാരുണ്ടാക്കാന് ഗവര്ണ്ണറെ ക്ഷണിച്ചത്. ഇന്നു രാത്രി എട്ട് മണിയ്ക്ക് മുന്പ് ഭൂരിപക്ഷം തെളിയിക്കണമെന്നാണ് മഹാരാഷ്ട്ര ഗവര്ണ്ണര് ശിവസേനയോട് നിര്ദേശിച്ചത്. എന്നാല്, ഇതിന് ശിവസേനയ്ക്ക് സാധിച്ചില്ല. 2014 ല് ബിജെപി ചെയ്തപോലെ ന്യൂനപക്ഷ സര്ക്കാര് രൂപീകരിച്ച് വിശ്വാസ വോട്ടെടുപ്പ് നേരിടാനാണ് ശിവസേന ശ്രമിച്ചത്. എന്നാല്, എന്.സി.പിയും കോണ്ഗ്രസും പിന്തുണക്കാത്തതാണ് ശിവസേനയെ വെട്ടിലാക്കിയത്. ഇതോടെ ആരും പിന്തുണക്കാതെ താക്കറെ കുടുംബം പെരുവഴിയിലായി. മഹാരാഷ്ട്രയില് സര്ക്കാര് രൂപീകരിക്കാനില്ലെന്ന് ബിജെപി കഴിഞ്ഞ ദിവസം അറിയിച്ചിരുന്നു. കേവല ഭൂരിപക്ഷം ഇല്ലാത്ത സാഹചര്യത്തിലാണ് തീരുമാനം. ശിവസേനയുടെ നിലപാട് ജനഹിതത്തിന് വിരുദ്ധമെന്ന് ബിജെപി ആരോപിച്ചിരുന്നു. മുന്നണിയായി മത്സരിച്ച് ശിവസേന പിന്നില് നിന്നും കുത്തിയെന്നും ബിജെപി കുറ്റപ്പെടുത്തിയിരുന്നു.
