തിരുവനന്തപുരം: അയോധ്യ വിധിയുടെ പശ്ചാത്തലത്തില് സോഷ്യല് മീഡിയയില് അടക്കം സംഘര്ഷപരമായ പരാമര്ശം പാടില്ലെന്ന് മുഖ്യമന്ത്രി പിണറായി വിജയനും കേരള പോലീസും പലതവണ ആവര്ത്തിച്ചിരുന്നു. എന്നാല്, കേരളത്തിലെ സിപിഎം എംഎല്എ ആയ എ. സ്വരാജിന് അതൊന്നും ബാധകമല്ല. അയോധ്യയില് ചരിത്രവിധി പുറത്തുവന്ന ശേഷം സ്വരാജ് ഫേസ്ബുക്കില് കുറിച്ചത് ഇങ്ങനെ- വര്ത്തമാന ഇന്ത്യയില് മറിച്ചൊരു വിധിയുണ്ടാകുമെന്ന് നിഷ്കളങ്കരേ നിങ്ങളിപ്പോഴും പ്രതീക്ഷിച്ചിരുന്നുവോ? എന്നാണ്. സ്വരാജിന്റെ പോസ്റ്റിനു താഴെ രൂക്ഷമായ വിമര്ശനമാണ് ഉയരുന്നത്. നാണമില്ലേ, തമ്മിത്തല്ലിക്കാനുള്ള കുത്തിത്തിരിപ്പ് ഉണ്ടാക്കാന് എന്നാണ് ഭൂരിപക്ഷം പേരും ചോദിക്കുന്നത്. കേരള പോലീസിനെ ടാഗ് ചെയ്ത് പലരും സ്വരാജിന്റെ പോസ്റ്റ് ഉയര്ത്തിക്കാട്ടുന്നുണ്ട്.
സോഷ്യല്മീഡിയ പോസ്റ്റുകള് സംബന്ധിച്ച് കേരള പോലീസിന്റെ മുന്നറിയിപ്പ് ഇത്തരത്തിലായിരുന്നു. -അയോധ്യ കോടതി വിധിയില് സംഘര്ഷപരമായ പരാമര്ശം സോഷ്യല് മീഡിയയില് നടത്തുന്നവരെ ജാമ്യമില്ലാ വകുപ്പുചുമത്തി കേസെടുക്കുമെന്ന് പോലീസ്. ഇതിനുള്ള നിര്ദ്ദേശം പോലീസിന്റെ എല്ലാ വിഭാഗത്തിനും നല്കിയിട്ടുണ്ട്. ഇത്തരം സന്ദേശങ്ങള് ഫോര്വേഡ് ചെയ്യുന്നവരെയും അറസ്റ്റ് ചെയ്ത് പ്രോസിക്യൂട്ട് ചെയ്യുന്നതാണ്. ഇവര്ക്കെതിരെയും ജാമ്യമില്ലാ വകുപ്പുകള് ചുമത്തുന്നതാണ്. എല്ലാ സാമൂഹ്യ മാധ്യമങ്ങളുടെയും എല്ലാത്തരം അക്കൗണ്ടുകളും 24 മണിക്കൂറും കേരളാ പോലീസിന്റെ സൈബര് സെല്, സൈബര് ഡോം, സൈബര് പോലീസ് സ്റ്റേഷനുകള് എന്നിവയുടെ നിരീക്ഷണത്തിലാണ്. സാമുദായിക സംഘര്ഷം വളര്ത്തുന്ന തരത്തില് സന്ദേശം പരത്തുന്നവരെ ഉടനടി കണ്ടെത്താന് സഹായിക്കുന്ന ആധുനിക സാങ്കേതിക വിദ്യയുടെ സേവനം പോലീസ് ഉപയോഗിക്കുന്നുണ്ടെന്ന് അറിയിച്ചിട്ടുണ്ട്. എന്നാല്, ഇതൊന്നും ബാധകമല്ലെന്നാണ് സ്വരാജിന്റെ പോസ്റ്റ് വെളിപ്പെടുത്തുന്നത്.
