ന്യൂദല്‍ഹി: അയോധ്യക്കേസിലെ ചരിത്രപരമായ വിധിയില്‍ സുപ്രീം കോടതി നടത്തിയ ചില സുപ്രധാന നിരീക്ഷണങ്ങള്‍ ഉടന്‍ പരിഗണിക്കുന്ന ശബരിമല കേസിലും ബാധകമാകുമോ എന്ന തരത്തില്‍ ചര്‍ച്ച സജീവമാകുന്നു. സോഷ്യല്‍ മീഡിയയിലും നിയമവൃത്തങ്ങള്‍ക്കിടയിലുമാണ് ഈ ചര്‍ച്ച സജീവമാകുന്നത്. ചീഫ് ജസ്റ്റിസ് രഞ്ജന്‍ ഗൊഗോയ് വിരമിക്കും മുന്‍പ് ദിവസങ്ങള്‍ക്കകം ശബരിമലയിലെ യുവതി പ്രവേശനം അനുവദിച്ച സുപ്രീം കോടതി വിധിക്കെതിരായ പുനപരിശോധന ഹര്‍ജികള്‍ കോടതി പരിഗണിക്കാന്‍ ഇരിക്കുകയാണ്.
ഇന്നു വിധി പ്രസ്താവിച്ച അയോധ്യ തര്‍ക്ക ഭൂമി കേസില്‍ കോടതിയുടെ നിരീക്ഷണങ്ങളില്‍ സുപ്രധാനം ഇതായിരുന്നു. രാമജന്മഭൂമി എന്നത് നിയമപരമായി നിലനില്‍ക്കില്ലായിരിക്കും. എന്നാല്‍, ശ്രീരാമന്‍ എന്ന ആരാധാനമൂര്‍ത്തിക്ക് നിയമപരമായ വ്യക്തിത്വമുണ്ട്. ശ്രീരാമന്‍ ജനിച്ചത് അയോധ്യയിലാണെന്നതില്‍ തര്‍ക്കമില്ല. ഹിന്ദുക്കളെല്ലാം അങ്ങനെ വിശ്വസിക്കുകയും ആരാധിക്കുകയും ചെയ്യുന്നുണ്ട്. വിശ്വാസവും ആരാധനയും അംഗീകരിക്കാന്‍ കോടതി ബാധ്യസ്ഥമാണെന്നും വിധി പ്രസ്താവിക്കവേ ചീഫ് ജസ്റ്റിസ് വ്യക്തമാക്കിയിരുന്നു.
ശബരിമല യുവതി പ്രവേശന കേസിലും തന്ത്രികുടുംബം അടക്കം വാദിച്ചിരുന്ന സുപ്രധാന കാര്യം അയ്യപ്പന്‍ നൈഷ്ഠിക ബ്രഹ്മചാര്യയാണെന്നും ആരാധാനമൂര്‍ത്തിയുടെ ആ നിയമപരമായ അവകാശം കാത്തുസൂക്ഷിക്കണമെന്നുമായിരുന്നു. എന്നാല്‍, മൗലിക അവകാശങ്ങളുടെ പേരിലുള്ള ഹര്‍ജികള്‍ പരിഗണിക്കവേ അന്നു സുപ്രീം കോടതി ഭരണഘടന ബെഞ്ച് ഇക്കാര്യം പരിഗണിച്ചിരുന്നില്ല. ആരധനമൂര്‍ത്തിയായ വിഗ്രഹത്തിനും അവകാശങ്ങളുണ്ടെന്നും അയ്യപ്പന്‍ പ്രായപൂര്‍ത്തിയാകാത്ത മൂര്‍ത്തി ആയതിനാല്‍ രക്ഷിതാക്കളായ തന്ത്രി കുടുംബത്തിനാണ് അയ്യപ്പന്റെ അവകാശങ്ങള്‍ സംരക്ഷിക്കാന്‍ അധികാരമെന്നുമായിരുന്നു വാദം. ഇപ്പോള്‍ അയോധ്യ കേസിന്റെ വിധിയുടെ പശ്ചാത്തലത്തില്‍ ആരാധനമൂര്‍ത്തിക്കും നിയമപരമായി വ്യക്തിത്വമുണ്ടെന്ന സുപ്രീം കോടതി നിരീക്ഷണം ശബരിമലയിലെ അയ്യപ്പന്റെ നിയമപരമായ അവകാശങ്ങള്‍ക്കും ബാധകമാകുമെന്ന വിലയിരുത്തലാണ് വിവിധ കേന്ദ്രങ്ങളില്‍ നിന്നുയരുന്നത്.
