തിരുവനന്തപുരം: അയോധ്യ കോടതി വിധിയില് സംഘര്ഷപരമായ പരാമര്ശം സോഷ്യല് മീഡിയയില് നടത്തുന്നവരെ ജാമ്യമില്ലാ വകുപ്പുചുമത്തി കേസെടുക്കുമെന്ന് പോലീസ്. ഇതിനുള്ള നിര്ദ്ദേശം പോലീസിന്റെ എല്ലാ വിഭാഗത്തിനും നല്കിയിട്ടുണ്ട്. ഇത്തരം സന്ദേശങ്ങള് ഫോര്വേഡ് ചെയ്യുന്നവരെയും അറസ്റ്റ് ചെയ്ത് പ്രോസിക്യൂട്ട് ചെയ്യുന്നതാണ്. ഇവര്ക്കെതിരെയും ജാമ്യമില്ലാ വകുപ്പുകള് ചുമത്തുന്നതാണ്. എല്ലാ സാമൂഹ്യ മാധ്യമങ്ങളുടെയും എല്ലാത്തരം അക്കൗണ്ടുകളും 24 മണിക്കൂറും കേരളാ പോലീസിന്റെ സൈബര് സെല്, സൈബര് ഡോം, സൈബര് പോലീസ് സ്റ്റേഷനുകള് എന്നിവയുടെ നിരീക്ഷണത്തിലാണ്.
സാമുദായിക സംഘര്ഷം വളര്ത്തുന്ന തരത്തില് സന്ദേശം പരത്തുന്നവരെ ഉടനടി കണ്ടെത്താന് സഹായിക്കുന്ന ആധുനിക സാങ്കേതിക വിദ്യയുടെ സേവനം പോലീസ് ഉപയോഗിക്കുന്നുണ്ടെന്ന് അറിയിച്ചിട്ടുണ്ട്. സംസ്ഥാനത്ത് കാസര്കോട് അഞ്ച് പൊലീസ് സ്റ്റേഷന് പരിധിയില് നിരോധനാജ്ഞയും പ്രഖ്യാപിച്ചിട്ടുണ്ട്. മഞ്ചേശ്വരം, കുമ്പള, കാസര്കോട്, ചന്ദേര, ഹോസ്ദുര്ഗ് എന്നിവിടങ്ങളിലാണ് നിരോധനാജ്ഞ ഏര്പ്പെടുത്തിയത്. ഈ മാസം 11 വരെയാണ് നിരോധനാജ്ഞ ഏര്പ്പെടുത്തിയിരിക്കുന്നത്. അടിയന്തര സാഹചര്യം നേരിടാന് എക്സിക്യൂട്ടീവ് മജിസ്ട്രേറ്റുമാരെയും ജില്ലയില് നിയമിച്ചിട്ടുണ്ട്. സാമൂഹ്യ മാദ്ധ്യമങ്ങള് കര്ശനമായി നിരീക്ഷിക്കുമെന്നും പോലീസ് അറിയിച്ചു. കൂടാതെ ജില്ലയിലെ എല്ലാ മദ്യശാലകളും പടക്കം വില്പ്പന കടകളും പൂട്ടാന് നിര്ദ്ദേശം നല്കിയിട്ടുണ്ട്. കാസര്കോട് ജില്ലയില് നടന്നു കൊണ്ടിരിക്കുന്ന സ്കൂള് കലോത്സവ പരിപാടികള്ക്ക് നിരോധനാജ്ഞ ബാധകമല്ലെന്ന് ജില്ലാ കളക്ടര് അറിയിച്ചിട്ടുണ്ട്.
