ന്യൂദല്ഹി : രാജ്യം ആകാംക്ഷയോടെ കാത്തിരുന്ന അയോധ്യ കേസിലെ വിധി പുറത്തുവരാന് നിമിഷങ്ങള് മാത്രം. രാവിലെ പത്തര മണിക്ക് ചീഫ് ജസ്റ്റിസ് രഞ്ജന് ഗൊഗോയി അധ്യക്ഷനായ അഞ്ചംഗ ഭരണഘടന ബെഞ്ചാണ് കേസില് വിധി പറയുക.
വിധി പ്രസ്താവനയ്ക്കായി ചീഫ ജസ്റ്റിസ് രഞ്ജന് ഗൊഗോയ് അടക്കമുള്ള ജഡ്ജിമാര് എത്തിക്കഴിഞ്ഞു. വിധി പ്രസ്താവന ഉടന്. അയോധ്യയിലെ 2.77 ഏക്കര് വരുന്ന തര്ക്കഭൂമി മൂന്നായി വിഭജിക്കാനുള്ള അലഹാബാദ് ഹൈക്കോടതി വിധി ചോദ്യം ചെയ്തുള്ള ഹര്ജികളിലാണ് ഭരണഘടന ബെഞ്ച് വിധി പറയുക. ഇതിന്റെ പശ്ചാത്തലത്തില് രാജ്യത്തെ സുരക്ഷ ശക്തമാക്കിയിട്ടുണ്ട്.
സുപ്രീംകോടതി ചീഫ് ജസ്റ്റിസ് രഞ്ജന് ഗൊഗോയ് വിരമിക്കുന്ന സാഹചര്യത്തില് അവധി ദിവസമായ ഇന്ന് പ്രത്യേക സിറ്റിങ് വിളിച്ചുചേര്ത്താണ് കേസില് വിധി പറയുന്നത്. ആറ് നൂറ്റാണ്ട് പഴക്കമുള്ള തര്ക്കത്തിനും നിയമപോരാട്ടത്തിനും തീര്പ്പ് കല്പ്പിക്കാന് പോവുകയാണ്. സുപ്രീംകോടതിയുടെ ചരിത്രത്തില് തന്നെ രണ്ടാമത് ഏറ്റവും കൂടുതല് വിചാരണ കേട്ട കേസ് കൂടിയാണ് ഇത്.
ചീഫ് ജസ്റ്റിസ് രഞ്ജന് ഗൊഗോയി അധ്യക്ഷനായ അഞ്ചംഗ ഭരണഘടന ബെഞ്ച് ഓഗസ്ത് ഏഴ് മുതല് ഒക്ടോബര് ഏഴ് വരെ 40 പ്രവര്ത്തി ദിനങ്ങളില് തുടര്ച്ചയായി വാദം കേട്ടു. മധ്യസ്ഥശ്രമത്തിലൂടെ അയോധ്യ തര്ക്കം തീര്ക്കാന് ആദ്യം ഭരണഘടന ബെഞ്ച് ശ്രമിച്ചെങ്കിലും ഒത്തുതീര്പ്പില് എത്താന് സാധിച്ചില്ല. അതിനായി റിട്ട. ജസ്റ്റിസ് ഖലീഫുള്ള അധ്യക്ഷനായ മൂന്നംഗ സമിതിക്ക് രൂപ നല്കി. മധ്യസ്ഥ ശ്രമം പരാജയപ്പെട്ടെന്ന് ചൂണ്ടിക്കാട്ടി സുന്നി വഖഫ് ബോര്ഡ് ഒഴികെയുള്ള കക്ഷികള് കോടതിയിലെത്തിയതോടെയാണ് കേസില് വാദം കേള്ക്കാനുള്ള തീരുമാനം ചീഫ് ജസ്റ്റിസ് എടുത്തത്.
അയോധ്യ വിധി പ്രഖ്യാപിക്കുന്ന പശ്ചാത്തലത്തില് സുപ്രീംകോടതിയില് സുരക്ഷ ശക്തമാക്കി. സുപ്രധാന വിധി വരുന്നതിന് മുന്നോടിയായി എന്തെങ്കിലും തരത്തിലുള്ള സുരക്ഷാ പ്രശ്നങ്ങള്ക്കുള്ള സാധ്യത പൂര്ണ്ണമായും ഒഴിവാക്കാന് മുന്കരുതല് നടപടി എന്ന നിലയില് കോടതിയിലേക്കുള്ള റോഡുകള് അടച്ചു. ചീഫ് ജസ്റ്റിസ് രഞ്ജന് ഗൊഗോയിയുടെ ദല്ഹിയിലെ വസതിക്ക് മുന്നിലും പൊലീസ് സുരക്ഷ കൂട്ടിയിട്ടുണ്ട്. ചീഫ് ജസ്റ്റിസ് അടക്കം ഭരണഘടനാ ബെഞ്ചിലെ ജഡ്ജിമാരുടെ സുരക്ഷാ സംവിധാനങ്ങള് കഴിഞ്ഞ ദിവസം തന്നെ കൂട്ടിയിരുന്നു.
രാജ്യമൊട്ടാകെ കനത്ത സുരക്ഷയാണ് വിധിയുടെ പശ്ചാത്തലത്തില് ഒരുക്കിയിട്ടുള്ളത്. തര്ക്ക ഭൂമിയില് മാത്രം 5000 സുരക്ഷാ ഭടന്മാരെ നിയോഗിച്ചിട്ടുണ്ട്. തര്ക്കഭൂമിക്ക് ഒന്നര കിലോമീറ്റര് മുന്പ് മുതല് ആര്ക്കും പ്രവേശനമില്ല. ഇതോടൊപ്പം ആകാശ നിരീക്ഷണവും ശക്തമാക്കിയിട്ടുണ്ട്. പ്രശ്നസാധ്യതകള് മുന്നില് കണ്ട് വേണ്ടി വന്നാല് ഇന്റര്നെറ്റ് ബന്ധം വിച്ഛേദിക്കുമെന്നും ഉത്തര്പ്രദേശ് ഡിജിപി ഒ.പി. സിങ് വ്യക്തമാക്കി. ജനങ്ങള് ശാന്തരായി ഇരിക്കണമെന്ന മുഖ്യമന്ത്രി ആദിത്യനാഥും ആഹ്വാനം ചെയ്തു.
ഉത്തര്പ്രദേശിലും ജമ്മു കശ്മീരിലും നിരോധനാജ്ഞ പ്രഖ്യാപിച്ചിരിക്കുകയാണ്. അതിര്ത്തികളില് കര്ശന പരിശോധനയോടെയാണ് വാഹനങ്ങള് കടത്തിവിടുന്നത്. ബസ് സ്റ്റാന്കുളും റെയില്വേ സ്റ്റേഷനുകളും നിരീക്ഷണത്തിലാണ്. കനത്ത ജാഗ്രത പാലിക്കാന് സേനയ്ക്ക് നിര്ദേശം നല്കി. പ്രശ്നസാധ്യത മേഖലകളില് ആവശ്യമെങ്കില് ആളുകളെ കരുതല് തടങ്കലില് പാര്പ്പിക്കാനും നിര്ദ്ദേശം ഉണ്ട്. നവ മാധ്യമങ്ങളും നിരീക്ഷണത്തിലാണ്. മതസ്പര്ധയ്ക്കും സാമുദായിക സംഘര്ഷങ്ങള്ക്കും ഇടയാക്കുന്ന തരത്തില് സന്ദേശം തയ്യാറാക്കുന്നവര്ക്കെതിരെയും പ്രചരിപ്പിക്കുന്നവര്ക്കെതിരെയും ജാമ്യമില്ലാ വകുപ്പ് ചുമത്തി നടപടിയെടുക്കും.
