തിരുവനന്തപുരം: വാളയാര് പീഡനക്കേസില് വനിതാ കമ്മീഷന് ഇടപെടേണ്ട സാഹചര്യമില്ലെന്ന് അധ്യക്ഷ എം.സി.ജോസഫൈന്. പോക്സോ കേസുകളില് വനിതാ കമ്മീഷന് ഇടപെടാറില്ല. സ്വമേധയാ പോലും കേസെടുക്കേണ്ട ആവശ്യമില്ല. വിഷയങ്ങളില് വൈകാരികമായി വനിതാ കമ്മീഷന് ഇടപെടില്ല. പ്രോസിക്യൂഷന് ഏതെങ്കിലും തരത്തില് വീഴ്ചയുണ്ടെങ്കില് അത് പരിശോധിക്കണം. അതിനാല് തന്നെ വാളയാര് കേസില് എന്തിന് വനിതാ കമ്മിഷന് ഇടപെടണമെന്നും അവര് ചോദിച്ചു. എല്ലാവരുംകൂടി കമ്മിഷനു മേല് കുതിരകയറിയിട്ട് കാര്യമില്ല. സംഭവം ഉണ്ടായപ്പോള് സ്ഥലം സന്ദര്ശിക്കാന് തനിക്ക് സമയം ലഭിച്ചിരുന്നില്ല. പകരം കമ്മിഷന് അംഗം അവിടെ എത്തിയിരുന്നു എന്നും പറഞ്ഞ എം.സി.ജോസഫൈന് കേസില് പുനരന്വേഷണം വേണമെന്നും മനോരമ ന്യൂസിന് നല്കിയ അഭിമുഖത്തില് അവര് വ്യക്തമാക്കി.
അതേസമയം, വാളയാറില് സഹോദരിമാര് ലൈംഗികപീഡനത്തിന് ഇരയായി മരണപ്പെട്ട സംഭവത്തില് പ്രതിഷേധത്തിന്റെ ഭാഗമായി യുഡിഎഫ് ഹര്ത്താലിന് ആഹ്വാനം ചെയ്തു. നവംബര് അഞ്ചിന് പാലക്കാട് ജില്ലയിലാവും യുഡിഎഫ് ഹര്ത്താല് ആചരിക്കുക. ഇന്ന് ചേര്ന്ന യുഡിഎഫ് യോഗത്തിലാണ് ഇക്കാര്യം സംബന്ധിച്ച തീരുമാനം നേതൃത്വം എടുത്തത്. നേരത്തെ മന്ത്രി എ.കെ ബാലന്റെ വസതിയിലേക്ക് എബിവിപി നടത്തിയ മാര്ച്ചിനു നേരെ പോലീസ് അതിക്രമം അഴിച്ചുവിട്ടിരുന്നു. എബിവിപി സംസ്ഥാന സെക്രട്ടറി വി. മനുപ്രസാദ് ഉള്പ്പടെയുള്ള പ്രവര്ത്തകരെ പോലീസ് അറസ്റ്റ് ചെയ്തു. നിരവധി പേര്ക്ക് പരിക്കേറ്റു.
സ്റ്റേഷനില് എത്തിച്ച എബിവിപി പ്രവര്ത്തകരോട് പോലീസ് വളരെ മോശമായാണ് പെരുമാറിയത്. യാതൊരു വിധ മാനുഷിക പരിഗണനയും ഇവര്ക്ക് ലഭിച്ചില്ല. വാളയാര് കേസില് ഉന്നതതല അന്വേഷണം വേണമെന്നാവശ്യപ്പെട്ടാണ് നിയമ മന്ത്രി എ.കെ ബാലന്റെ വസതിയിലേ്ക്ക് എബിവിപി മാര്ച്ച് നടത്തിയത്. വാളയാര് വിഷയത്തില് പാലക്കാട് എസ്പി ഓഫീസിലേയ്ക്ക് യുവമോര്ച്ച നടത്തിയ മാര്ച്ചിലും സംഘര്ഷമുണ്ടായിരുന്നു. മാര്ച്ച് പോലീസ് തടഞ്ഞതിനെ തുര്ന്നാണ് സ്ഥലത്ത് സംഘര്ഷം ഉണ്ടായത്. പാലക്കാട് വാളയാറിലെ സഹോദരിമാരുടെ ദുരൂഹ മരണത്തില് പുനരന്വേഷണം വേണമെന്ന് ബിജെപിയും ആവശ്യപ്പെട്ടിരുന്നു.
