പാലക്കാട്: വാളയാര് കേസില് പ്രതികളെ വെറുതെ വിട്ട സംഭവത്തില് പ്രതിഷേധം ശക്തമാകുന്നു. കേസ് നടത്തിപ്പില് പോലീസും സര്ക്കാരും കാട്ടിയ അലംഭാവം നേരത്തേ വിമര്ശനവിധേയമായിരുന്നു. ഇതിനിടെയാണു വാളയാര് പെണ്കുട്ടികള്ക്ക് നീതി വേണമെന്ന് ആവശ്യവുമായി ബാലികമാര് സോഷ്യല്മീഡിയയിലൂടെ രംഗത്തു വന്നിരിക്കുന്നത്. 15 വയസിനു താഴെയുള്ള പെണ്കുട്ടികളാണു മുഖ്യമന്ത്രി പിണറായി വിജയനോട് പെണ്കുട്ടികള്ക്ക് നീതി നല്കണം എന്ന ആവശ്യവുമായി രംഗത്തെത്തിയിരിക്കുന്നത്. നിരവധിപേരാണ് വാളയാര് പെണ്കുട്ടികള്ക്ക് നീതി വേണമെന്ന ആവശ്യവുമായി രംഗത്തെത്തിയിരിക്കുന്നത്. കേസില് പ്രതികളെ വെറുതെ വിട്ടതിനെതിരെ അപ്പീല് പോകുന്നത് ആലോചിക്കാമെന്ന് മാത്രം സര്ക്കാര് വിശദീകരിക്കുന്ന സാഹചര്യത്തില് കൂടിയാണ് കേസ് പുനരന്വേഷിക്കണമെന്നും പെണ്കുട്ടികള്ക്ക് നീതി ലഭിക്കണമെന്നുമുള്ള ആവശ്യം ശക്തമാവുന്നത്.
പോസ്റ്റ്മോര്ട്ടം റിപ്പോര്ട്ടില് പീഡനം നടന്നതായി വ്യക്തമായിട്ടും വാളയാര് കേസില് പ്രതികളെ വെറുതെ വിട്ടത് പൊലീസിന്റെയും പ്രോസിക്യൂഷന്റെയും വീഴ്ച മൂലമാണെന്നു തെളിഞ്ഞിരുന്നു. സാക്ഷികളെ എത്തിക്കുന്നതിലും, അറസ്റ്റ് ചെയ്യപെട്ട പ്രതികളാണ് കുറ്റം ചെയ്തതെന്ന് കോടതിയില് തെളിയിക്കുന്നതിലും പ്രോസിക്യൂഷന് പരാജയപെട്ടു.
വാളയാറില് 2017 ജനുവരിയിലും മാര്ച്ചിലുമായാണ് പതിമൂന്നും ഒന്പതും വയസ് പ്രായമുള്ള പെണ്കുട്ടികള് ദുരൂഹ സാഹചര്യത്തില് മരിക്കുന്നത്. രണ്ട് പെണ്കുട്ടികളും ലൈംഗിക ചൂഷണത്തിന് ഇരയായിരുന്നതായി പോസ്റ്റുമോര്ട്ടം റിപ്പോര്ട്ടില് ഉണ്ടായിരുന്നു. അഞ്ചുപ്രതികളുണ്ടായിരുന്ന കേസില് പോക്സോ, ബലാത്സംഗം, ആത്മഹത്യാപ്രേരണ തുടങ്ങി ഒട്ടേറെ വകുപ്പുകള് ചുമത്തിയിരുന്നെങ്കിലും തെളിവ് ശേഖരണത്തില് പാളിച്ചയുണ്ടായി. 2017 മാര്ച്ച് 4നാണ് ഒമ്പത് വയസുകാരിയെ വീടിനകത്ത് തൂങ്ങി മരിച്ച നിലയില് കണ്ടെത്തിയത്. പ്രകൃതി വിരുദ്ധ പീഡനത്തിന് പെണ്കുട്ടി ഇരയായതായി പോസ്റ്റ്മോര്ട്ടം റിപ്പോര്ട്ടില് വ്യക്തമാക്കുന്നു. പെണ്കുട്ടിയുടെ മലദ്വാരത്തില് ഉണ്ടായ ഗുരുതര മുറിവുകളുടെ ചിത്ര സഹിതമാണ് പോസ്റ്റ്മോര്ട്ടം റിപ്പോര്ട്ട് ഫോറന്സിക്ക് സര്ജന് തയ്യറാക്കിയത്. കുട്ടി പീഡനത്തിന് ഇരയായി എന്നതില് ഇതില്പരം തെളിവുകളുടെ ആവശ്യമില്ലെന്ന് പ്രതികള്ക്ക് വേണ്ടി ഹാജരായ രഞ്ജിത്ത് കൃഷ്ണ എന്ന അഭിഭാഷകന് തന്നെ പറയുന്നു.
പൊലീസ് അന്വേഷണത്തിലെ വീഴ്ച്ച മൂലം പല തെളിവുകളും കണ്ടെത്താനായില്ല. കൃത്യമായ സാക്ഷിമൊഴികളും ഉണ്ടാവാത്തതിനാലാണ് പ്രതികളെ വെറുതെ വിട്ടത്. പോസ്റ്റ്മോര്ട്ടം റിപ്പോര്ട്ടിന്റെ നമ്പറടക്കം കോടതിയില് പൊലീസ് മാറി നല്കിയ സംഭവവും ഉണ്ടായിരുന്നു. ഒമ്പതു വയസുകാരിക്ക് ഒറ്റക്ക് തൂങ്ങിമരിക്കാന് കഴിയാത്ത രൂപത്തിലാണ് മൃതദേഹം കാണപെട്ടതെന്നും അതിനാല് കൊലപാതക സാധ്യതകള് പരിശോധിക്കണമെന്നും പോസ്റ്റ്മോര്ട്ടം റിപ്പോര്ട്ടിലുണ്ടായിരുന്നു. എന്നാല് ആത്മഹത്യയാണെന്നാണ് പൊലീസ് നിഗമനം. ശക്തമായ തെളിവുകളോടെ ഹൈക്കോടതിയെ സമീപിക്കണമെന്നാണ് രക്ഷിതാക്കളുടെ ആവശ്യം
