കോട്ടയം: പാലാ സിന്തറ്റിക് സ്റ്റേഡിയത്തില് നടന്ന സംസ്ഥാന ജൂനിയര് അത്ലറ്റിക് ചാമ്പ്യന്ഷിപ്പ് മത്സരങ്ങള്ക്കിടെ ഹാമര് തലയില് വീണ് കോട്ടയം മെഡിക്കല് കോളേജ് ആശുപത്രിയില് ചികിത്സയിലായിരുന്ന വിദ്യാര്ത്ഥി മരിച്ചു. സെയ്ന്റ് തോമസ് സ്കൂളിലെ പ്ലസ് വണ് വിദ്യാര്ഥിയായിരുന്നു ഏബെല് ജോണ്സനാണ് (17).
ഈ മാസം നാലിനു നടന്ന ഹാമര്ത്രോ മത്സരത്തിനിടെയാണ് മൂന്നുകിലോയുടെ ഹാമര് തലയില് വീണ് വൊളന്റിയറായ ഏബെലിന് ഗുരുതരമായി പരിക്കേറ്റത്. ഉച്ചയ്ക്ക് 12 മണിക്കാണ് സംഭവം. ബോധംകെട്ട് കമിഴ്ന്ന് വീണ വിദ്യാര്ത്ഥിയെ പാലാ ജനറല് ആശുപത്രിയിലും പിന്നീട് കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിക്കുകയായിരുന്നു. കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ച ഏബെലിന് അടിയന്തരശസ്ത്രക്രിയ നടത്തിയെങ്കിലും നില ഗുരുതരമായി തുടരുകയായിരുന്നു.
ജാവലിന് മത്സരത്തില് സഹായിയായി നില്ക്കുകയായിരുന്നു ഏബെല്. ജാവലിന് കോര്ട്ടിന് സമാന്തരമായിത്തന്നെ ഹാമര്ത്രോ മത്സരവും നടന്നിരുന്നു. ജാവലിനുകള് എടുത്തുമാറ്റുന്നതിനായി മൈതാനത്തേക്ക് ഓടിവന്ന ഏബെല് ഹാമര് കോര്ട്ട് മുറിച്ചുകടക്കാന് ശ്രമിക്കവേയാണ് അപകടം ഉണ്ടായത്. സംഭവത്തെ തുടര്ന്ന് ചാമ്പ്യന്ഷിപ്പ് മാറ്റിവെക്കുകയും ചെയ്തു. മികച്ച ഫുട്ബാള് താരമായ ഏബെലിന് കേരള ബ്ലാസ്റ്റേഴ്സ് ടീമിന്റെ നേതൃത്വത്തില് നടത്തുന്ന കോച്ചിംഗ് ക്യാമ്പിലേക്ക് സെലക്ഷന് ലഭിച്ചിരുന്നു.
