തിരുവനന്തപുരം: കെ.എസ്.ഇ.ബിയുടെ കൈവശഭൂമി രാജാക്കാട് സഹകരണ ബാങ്കിന് കൈമാറിയ സംഭവത്തില് റവന്യൂമന്ത്രിക്ക് അന്വേഷണത്തിന് ഉത്തരവിടാന് അധികാരമില്ലെന്ന് മന്ത്രി എം.എം.മണി. നിലവില് അന്വേഷണം തുടരട്ടെയെന്നും ബാക്കി കാര്യം താന് നോക്കിക്കൊള്ളാമെന്നും മന്ത്രി പറഞ്ഞു. തന്റെ മരുമകനും സി.പി.എം ഇടുക്കി ജില്ല കമ്മിറ്റി അംഗവുമായ വി.എ. കുഞ്ഞുമോനല്ല അനുമതിക്കായി സമീപിച്ചതെന്നും സഹകരണബാങ്ക് മുന് പ്രസിഡന്റാണെന്നും മണി ന്യായികരിച്ചു. നല്ല രീതിയില് പ്രവര്ത്തിക്കുന്നതുകൊണ്ടാണ് അനുമതി കൊടുത്തതെന്നും എം.എം.മണി പറഞ്ഞു.
റവന്യു മന്ത്രി ഇ. ചന്ദ്രശേഖരന്റെ നിര്ദ്ദേശപ്രകാരമാണ് ജില്ലാ കളക്ടര് ഭൂമി ഇടപാടില് അന്വേഷണം നടത്തുന്നത്. ഒരാഴ്ചയ്ക്കകം റിപ്പോര്ട്ട് സമര്പ്പിക്കണമെന്ന് മന്ത്രി കളക്ടറോട് നിര്ദ്ദേശിച്ചിട്ടുണ്ട്. ഫെബ്രുവരി 28നു ചേര്ന്ന കെ.എസ്.ഇ.ബി ഫുള് ബോര്ഡ് യോഗമാണ് പൊന്മുടി അണക്കെട്ടിനു സമീപമുള്ള വൈദ്യുതി ബോര്ഡിന്റെ 21 ഏക്കര് ഭൂമി എം.എം. മണിയുടെ മകളുടെ ഭര്ത്താവ് പ്രസിഡന്റായ രാജക്കാട് സഹകരണ ബാങ്കിനു നല്കാന് തീരുമാനമെടുത്തത്. മന്ത്രി അധ്യക്ഷനായ യോഗങ്ങളിലായിരുന്നു തീരുമാനം.
