മലപ്പുറം: ക്ഷേത്രത്തില് ബോംബ് നിര്മാണത്തിനിടെ സ്ഫോടനം നടന്നെന്ന് പോപ്പുലര് ഫ്രണ്ടും എസ്ഡിപിഐയും നടത്തുന്ന വ്യാജപ്രചാരണം വര്ഗീയലഹള ലക്ഷ്യമിട്ട്. തിങ്കളാഴ്ച മലപ്പുറം കൊളത്തൂരിനടുത്ത് കടന്നമ്പറ്റ നരസിംഹമൂര്ത്തി ക്ഷേത്ര പരിസരം വൃത്തിയാക്കി മാലിന്യങ്ങള് കത്തിക്കുന്നതിനിടെ തീ ആളിപടര്ന്ന് അമ്പലപ്പറമ്പ് സ്വദേശി രാമദാസിന് പൊള്ളലേറ്റിരുന്നു. വെടിവഴിപാടിന് സൂക്ഷിച്ചിരുന്ന വെടിമരുന്നിന്റെ അംശം ഉള്പ്പെട്ടതിനാലാണ് തീ ആളിപ്പടര്ന്നത്. കൈകാലുകളില് പൊള്ളലേറ്റ രാമദാസ് സ്വകാര്യ ആശുപത്രിയില് ചികിത്സയിലാണ്. ഈ സംഭവത്തില് അസ്വഭാവികതയൊന്നുമില്ലെന്ന് പോലീസ് തന്നെ വ്യക്തമാക്കുകയും ചെയ്തിട്ടുണ്ട്. എന്നാല് ഈ സംഭവമാണ് പോപ്പുലര് ഫ്രണ്ട്-എസ്ഡിപിഐ സംഘം സ്ഫോടനമായി ചിത്രീകരിക്കുന്നത്.
സംഭവം നടന്ന് നിമിഷങ്ങള്ക്കകം ബോംബ് നിര്മാണത്തിനിടെയുള്ള സ്ഫോടനമാണെന്ന് വരുത്തി തീര്ക്കാനാണ് ഇക്കൂട്ടര് ശ്രമിച്ചത്. ക്ഷേത്രവിശ്വാസി മാത്രമായ രാമദാസിനെ ആര്എസ്എസ് പ്രവര്ത്തകനായി ചിത്രീകരിച്ച് എസ്ഡിപിഐയുടെ തേജസ് ഓണ്ലൈനില് വാര്ത്ത നല്കുകയും ചെയ്തു. അതിന് ശേഷം ക്ഷേത്രത്തിനെതിരെ പോര്വിളി മുഴക്കി എസ്ഡിപിഐ മൂര്ക്കനാട് പഞ്ചായത്ത് കമ്മറ്റി അമ്പലപ്പടിയില് പ്രകടനം നടത്തി. വിജയദശമി ദിവസം കൊളത്തൂരില് നടക്കുന്ന ആര്എസ്എസ് പഥസഞ്ചലനം അലങ്കോലപ്പെടുത്താനും സമാധാനാന്തരീക്ഷം തകര്ക്കാനുമുള്ള ഗൂഢാലോചനയുടെ ഭാഗമാണ് ഈ വ്യാജപ്രചാരണമെന്ന് പരിസരവാസികള് ആരോപിക്കുന്നു.
ആക്രമണങ്ങളുടെയും വിവിധ സ്ഫോടനങ്ങളുടെയും കണക്കുകള് നിരത്തി കഴിഞ്ഞ ദിവസം എസ്ഡിപിഐ നേതാവ് പി.പി. റഫീഖ് ജില്ലാ പോലീസ് മേധാവിക്ക് പരാതി നല്കിയിരുന്നു. കേസുകളില് സമഗ്രമായ അന്വേഷണം വേണമെന്നാണ് പരാതിയില് ആവശ്യപ്പെടുന്നത്. പോപ്പുലര് ഫ്രണ്ടിനും എസ്ഡിപിഐക്കും നിരോധിത സംഘടനയായ എന്ഡിഎഫിനും നേരിട്ടും അല്ലാതെയും ബന്ധമുള്ള കേസുകളാണ് ഈ പട്ടികയിലുള്ള പലതും.
ഇതെല്ലാം മറ്റൊരു ലഹളയുടെ മുന്നൊരുക്കമാണോയെന്ന സംശയം ജനങ്ങളില് ബലപ്പെടുകയാണ്. മാസങ്ങള്ക്ക് മുമ്പ് മഞ്ചേരിയില് തങ്ങളുടെ നേതാവിന് നേരെ ആക്രമണം നടന്നതായി എസ്ഡിപിഐ വ്യാജപ്രചാരണം നടത്തിയിരുന്നു. ഇതിന് തൊട്ടടുത്ത ദിവസം മഞ്ചേരി പയ്യാനാട് വെച്ച് ആര്എസ്എസ് പ്രവര്ത്തകന് നേരെ എസ്ഡിപിഐയുടെ വധശ്രമമുണ്ടായി. സമാനമായ ലക്ഷ്യം ഈ സംഭവത്തിലുമുണ്ടെന്ന ആശങ്കയിലാണ് ജനങ്ങള്.
