കണ്ണൂര് : സംസ്ഥാനത്ത് മദ്യത്തിന്റെ ലഭ്യത ഘട്ടം ഘട്ടമായി കുറയ്ക്കുമെന്ന പ്രഖ്യാപനവും വാക്കില് മാത്രം. കഴിഞ്ഞ ഒമ്പത് മാസത്തിനിടെ കേരളത്തില് 32 പുതിയ ബാറുകള്ക്കാണ് ലൈസന്സുകള് നല്കിയത്. ലോക്സഭയിലേക്കും, ആറ് നിയമസഭാ മണ്ഡലങ്ങളിലേക്കും തെരഞ്ഞെടുപ്പ് നടക്കുന്ന ഈ ഒരു വര്ഷത്തിനിടയിലാണ് ഇത്രയും പുതിയ ബാര് ലൈസന്സുകള് സംസ്ഥാന സര്ക്കാര് അനുവദിച്ചിരിക്കുന്നത്.
ലൈസന്സിനായി ഈ വര്ഷം സമര്പ്പിച്ച 31 അപേക്ഷകളിലും കഴിഞ്ഞവര്ഷത്തെ ഒരു അപേക്ഷയിലുമാണ് സര്ക്കാര് അനുമതി നല്കിയിരിക്കുന്നത്. അതേസമയം ബിയര് ആന്ഡ് വൈന് പാര്ലറുകള്ക്കു വീണ്ടും ബാര് ആക്കി അനുവദിച്ചതിന്റെ കണക്ക് ലഭ്യമല്ല. അതു കൂടി ചേര്ത്താല് ഈ വര്ഷം പ്രവര്ത്തിച്ചുതുടങ്ങിയ ബാറുകളുടെ എണ്ണം എഴുപതോളം വരും. പുതിയ ബാറുകള് ഏറെയും എറണാകുളം, തൃശൂര് ജില്ലകളിലാണ്.
എട്ട് ബിയര് ആന്ഡ് വൈന് പാര്ലറുകലും ഈ വര്ഷം പുതിയതായി അനുവദി്ച്ചിട്ടുണ്ട്. എന്നാല് ബ്രൂവറി വിവാദത്തിനുശേഷം പുതിയ ബ്രൂവറി അപേക്ഷയൊന്നും ലഭിച്ചിട്ടില്ല.കഴിഞ്ഞ സര്ക്കാരിന്റെ കാലത്തു പൂട്ടിയതോ ബീയര് ലൈസന്സിലേക്ക് ഒതുങ്ങിയതോ ആയ ഹോട്ടലുകള്ക്കു ബാര് അനുവദിക്കുമെന്നു സര്ക്കാര് വ്യക്തമാക്കിയിരുന്നു.
ത്രീസ്റ്റാറോ അതിനു മുകളിലോ പദവിയുള്ള ഹോട്ടലുകള്ക്കു ബാര് അനുവദിക്കാമെന്നാണു നയമെങ്കിലും, മദ്യത്തിന്റെ ലഭ്യത ഘട്ടം ഘട്ടമായി കുറയക്കുമെന്നാണു സര്ക്കാരിന്റെ പ്രഖ്യാപനം. ഇത് നിലനില്ക്കേയാണ് ഇത്രയും ബാറുകള്ക്ക് സംസ്ഥാന സര്ക്കാര് തന്നെ അനുമതി നല്കിയിരിക്കുന്നത്.
