സൗദി: വിനോദ സഞ്ചാരികള് അടക്കമുള്ള സ്ത്രീകള് ഇറുകിയ വസ്ത്രങ്ങള് ധരിച്ചാലും പൊതുസ്ഥലത്ത് ചുംബിച്ചാലും കനത്തപിഴ ചുമത്തുമെന്ന് സൗദി അറേബ്യ. ഇന്നു രാവിലെയാണ് ഇതുസംബന്ധിച്ച ഉത്തരവ് സൗദി ആഭ്യന്തരമന്ത്രാലയം പുറത്തിറക്കിയതെന്ന് വിദേശമാധ്യമങ്ങള് റിപ്പോര്ട്ട് ചെയ്യുന്നു. രാജ്യം വിദേശ വിനോദ സഞ്ചാരികള്ക്ക് തുറന്നുകൊടുത്ത് ഒരു ദിവസത്തിനുശേഷം ആണ് പ്രഖ്യാപനം ഉണ്ടായിരിക്കുന്നത്. ഇത്തരത്തിലുള്ള 19 കുറ്റകൃത്യങ്ങള് പട്ടികപ്പെടുത്തിയിട്ടുണ്ടെന്നും എന്നാല് പിഴകള് വ്യക്തമാക്കിയിട്ടില്ലെന്നും ആഭ്യന്തര മന്ത്രാലയം അറിയിച്ചു. എണ്ണയെ ആശ്രയിക്കുന്ന സമ്പദ്വ്യവസ്ഥയെ വൈവിധ്യവത്കരിക്കാനുള്ള നീക്കത്തിന്റെ ഭാഗമായി തീവ്ര യാഥാസ്ഥിതിക ഇസ്ലാമിക രാജ്യം ആദ്യമായി ടൂറിസ്റ്റ് വിസ നല്കാന് തുടങ്ങിയതിന് തൊട്ടുപിന്നാലെയാണ് പുതിയ നിയമം.
പുതിയ ചട്ടങ്ങളില് പുരുഷന്മാരും സ്ത്രീകളും എളിമയോടെ വസ്ത്രം ധരിക്കണമെന്നും പരസ്യമായി സ്നേഹം കാണിക്കരുതെന്നും ആവശ്യപ്പെടുന്നു. സ്ത്രീകള്ക്ക് എളിമയുള്ള വസ്ത്രങ്ങള് തിരഞ്ഞെടുക്കാന് സ്വാതന്ത്ര്യമുണ്ട്. പുരുഷന്മാരും സ്ത്രീകളും ഇറുകിയ വസ്ത്രങ്ങള് അല്ലെങ്കില് അശ്ലീല ഭാഷയോ ചിത്രങ്ങളോ ഉള്ള വസ്ത്രങ്ങള് ഒഴിവാക്കണം. സ്ത്രീകള് തോളും കാല്മുട്ടും മൂടുന്ന വസ്ത്രങ്ങള് അണിയണമെന്നും ആഭ്യന്തരമന്ത്രാലയത്തിന്റെ ഉത്തരവില് പറയുന്നു. അമേരിക്ക, ഓസ്ട്രേലിയ, നിരവധി യൂറോപ്യന് രാജ്യങ്ങള് ഉള്പ്പെടെ 49 രാജ്യങ്ങളില് നിന്നുള്ള പൗരന്മാര്ക്ക് ഓണ്ലൈന് ഇവിസകള് അല്ലെങ്കില് വിസകള് ലഭിക്കാന് അര്ഹതയുണ്ടെന്ന് സൗദി അറേബ്യ വെള്ളിയാഴ്ച പറഞ്ഞിരുന്നു.
