തിരുവനന്തപുരം: മാലിന്യ സംസ്കരണത്തിലെ അലംഭാവം കാരണം തിരുവനന്തപുരം കോര്പറേഷനു 14.59 കോടി രൂപ പിഴയിട്ടു. നഗരത്തില് മാലിന്യ കൂമ്പാരം കുന്നുകൂടുന്നതിനെതിരെ നടപടി സ്വീകരിക്കാത്തതിന് സംസ്ഥാന മലിനീകരണ നിയന്ത്രണ ബോര്ഡാണ് പിഴയിട്ടത്. കേരളത്തില് ഇതാദ്യമായാണു മാലിന്യസംസ്കരണ രംഗത്തെ വീഴ്ചകള്ക്കു തദ്ദേശ സ്ഥാപനത്തിന് ഇത്രയും വലിയ പിഴയിടുന്നത്.
വിളപ്പില്ശാലയിലെ പ്ലാന്റ് അടച്ചുപൂട്ടിയതോടെ വീടുകളില് നിന്നുള്ള മാലിന്യശേഖരണത്തിലും സംസ്കരണത്തിലും കോര്പറേഷന് ഗുരുതര വീഴ്ചയാണ് വരുത്തിയതെന്ന് ബോര്ഡിന്റെ നോട്ടിസില് പറയുന്നു. ഇതുസംബന്ധിച്ച് നോട്ടിസു കിട്ടി 15 ദിവസത്തിനകം മറുപടി നല്കണമെന്നും കോര്പറേഷനെ അറിയിച്ചിട്ടുണ്ട്. തിരുവന്തപുരം നഗരപരിധിയിലെ 2.72 ലക്ഷം വീടുകളില് നിന്നു പ്രതിദിനം 383 ടണ് മാലിന്യമുണ്ടാകുന്നുണ്ട്. നിലവില് ഇതില് 175 ടണ് മാത്രമേ ശേഖരിക്കുകയും സംസ്കരിക്കുകയും ചെയ്യുന്നുള്ളൂ.
2018 നവംബര് 22 മുതല് 2019 ജൂലൈ 31 വരെയുള്ള പിഴയാണ് 14.59 കോടി രൂപ. കേന്ദ്ര ഗ്രീന് ട്രൈബ്യൂണല് ചട്ടപ്രകാരം പരിസ്ഥിതി നഷ്ടപരിഹാരമായാണു പിഴയിടാക്കിയിരിക്കുന്നത്. ഇതിനു മുന്പ് കേന്ദ്ര സര്ക്കാര് നഗരങ്ങളിലെ ശുചിത്വത്തിന്റെ നിലവാരമറിയാന് നടത്തിയ സര്വേയില് 425 നഗരങ്ങളില് 365ാം സ്ഥാനമാണു തിരുവനന്തപുരത്തിനു ലഭിച്ചത്. തിരുവനന്തപുരത്തെ സംബന്ധിച്ച് ഇത് ലജ്ജാകരമാണെന്നും റിപ്പോര്ട്ടില് പറയുന്നു.
