ആലപ്പുഴ: ചരിത്രപ്രസിദ്ധവും ചിരപുരാതനവുമായ മുല്ലയ്ക്കല് ക്ഷേത്രത്തിന്റെ പടിഞ്ഞാറേ ഗോപുരം റോഡ് വികസനത്തിന്റെ പേരില് പൊളിച്ചുനീക്കുവാന് ശ്രമിക്കുന്ന പൊതുമരാമത്ത് വകുപ്പ് നീക്കത്തില് വിശ്വഹിന്ദു പരിഷത്ത് ജില്ലാ സമിതി പ്രതിഷേധിച്ചു.
ആലപ്പുഴയിലെ ഹൈന്ദവ വിശ്വാസത്തിന്റെ അടിസ്ഥാന കേന്ദ്രമായ മുല്ലയ്ക്കല് ക്ഷേത്രത്തെ തകര്ക്കുവാന് ഭരണകൂടങ്ങളും, മതമൗലിക വാദികളും നീക്കം തുടങ്ങിയിട്ട് നാളുകള് എറെയായി. ചിറപ്പ് സമയത്ത് ബീച്ച് ഫെസ്റ്റ് സംഘടിപ്പിച്ചിരുന്നത് ഇതിന്റെ തുടക്കമായിരുന്നു. അതിന്റെ തുടര്ച്ചയാണ് റോഡ് വികസനത്തിന്റെ പേരില് ക്ഷേത്രഗോപുരം തകര്ക്കുവാനും എതിരേല്പ്പ് ആല് മരം പിഴുതുമാറ്റുവാനുള്ള ഗൂഢ നീക്കങ്ങള് നടക്കുന്നത്. മുല്ലയ്ക്കല് തെരുവ് വണ്വേ ട്രാഫിക്ക് സംവിധാനം ഏര്പ്പെടുത്തി ഗതാഗത തടസം ഒഴിവാക്കാമെന്നിരിക്കേ, ഹൈന്ദവ ജനതയുടെ വിശ്വാസത്തേയും വികാരത്തെയും തകര്ക്കുവാനുള്ള ഈ നീക്കം എന്തു വില കൊടുത്തും തടയുമെന്ന് വിശ്വഹിന്ദു പരിഷത്ത് ജില്ലാ സമിതി പറഞ്ഞു.
യോഗത്തില് ജില്ലാ പ്രസിഡന്റ് വി.കെ. സുരേഷ് ശാന്തി അധ്യക്ഷനായി. ജില്ലാ സെക്രട്ടറി എം. ജയകൃഷ്ണന്, സുരേഷ് ബാബു, സുരേഷ് കാവ്യ, പൊന്നപ്പന് തുടങ്ങിയവര് സംസാരിച്ചു.
