ശ്രീനഗര്: ഇന്ത്യന് വ്യോമസേനത്താവളങ്ങള് ലക്ഷ്യമിട്ട് പത്തംഗ ജയ്ഷെ ഇ മുഹമ്മദ് ഭീകകര് അതിര്ത്തി കടന്നതായി രഹസ്യാന്വേഷണ വിഭാഗം. ജമ്മു കശ്മീരിലേയും സമീപ സംസ്ഥാനങ്ങളിലേയും വ്യോമസേനത്താവളങ്ങളില് ചാവേറാക്രമണമാണ് ഇവരുടെ ലക്ഷ്യമെന്നാണ് റിപ്പോര്ട്ട്. ഇതേത്തുടര്ന്ന് ജമ്മു കശ്മീരിലെ വ്യോമസേനത്താവളങ്ങളായ ശ്രീനഗര്, അവന്തിപോര, പഞ്ചാബിലെ പത്താന്കോട്ട്, യുപിയിലെ ഹിന്ഡോന് എന്നിവിടങ്ങളില് അതീവജാഗ്രത നിര്ദേശം നല്കി. ഓറഞ്ച് ലെവല് അലെര്ട്ടാണ് ഇപ്പോള് നല്കിയിരിക്കുന്നത്. ഭീകരാക്രമണ ഭീഷണിയെ തുടര്ന്ന് വ്യോമസേന ഉന്നത ഉദ്യോഗസ്ഥര് അതാതു മേഖലകളില് സുരക്ഷാമേല്നോട്ടത്തിനായി എത്തിയിട്ടുണ്ട്. ജയ്ഷെ ഭീകരരുടെ സന്ദേശങ്ങള് രഹസ്യാന്വേഷണ വിഭാഗം ചോര്ത്തിയതോടെയാണു ഇവര് ലക്ഷ്യമിടുന്നത് വ്യോമസനേത്താവളങ്ങളാണെന്നു വ്യക്തമായത്. എട്ടു മുതല് പത്തുവരെ ഭീകരര് ഉള്പ്പെട്ട സംഘമാണ് അതിര്ത്തി കടന്നതെന്നാണു ലഭിക്കുന്ന വിവരം.
പ്രധാനമന്ത്രി നരേന്ദ്ര മോദിയേയും ദേശീയ സുരക്ഷ ഉപദേഷ്ടാവ് അജിത് ദോവലിനെയും വധിക്കാന് ജെയ്ഷ ഇ മുഹമ്മദ് ഭീകരര് പദ്ധതിയിടുന്നതായി രഹസ്യാന്വേഷണം വിഭാഗം നേരത്തേ റിപ്പോര്ട്ട് നല്കിയിരുന്നു. കേന്ദ്ര ആഭ്യന്തര മന്ത്രാലയത്തിന് നല്കിയ റിപ്പോര്ട്ടിലാണ് ഇക്കാര്യം അറിയിച്ചിരിക്കുന്നത്. ആര്ട്ടിക്കിള് 370 റദ്ദാക്കിയതില് പ്രതിഷേധിച്ചുകൊണ്ടാണ് ജെയ്ഷ പദ്ധതി തയ്യാറാക്കിയതെന്നാണ് സൂചന.
പ്രധാനമന്ത്രിയെയും അജിത് ദോവലിനെയും അപായപ്പെടുത്താന് പാക്കിസ്ഥാന് ചാരസംഘടനയായ ഐഎസ്ഐ ജയ്ഷെ ഇ മുഹമ്മദുമായി സഹകരിക്കുന്നുണ്ടെന്നും രഹസ്യാന്വേഷണ വിഭാഗത്തിന്റെ റിപ്പോര്ട്ടില് പറയുന്നുണ്ട്. ഇതിനെ തുടര്ന്ന് രാജ്യത്തെ 30 നഗരങ്ങളില് സുരക്ഷ കര്ശനമാക്കുകയും ജാഗ്രത നിര്ദ്ദേശം നല്കുകയും ചെയ്തിട്ടുണ്ട്. രാജ്യത്തിന്റെ പല ഭാഗത്തും കശ്മീരിലെ സൈനിക വ്യൂഹങ്ങള്ക്കും സേനയുടെ താവളങ്ങള്ക്കും ചെക്ക് പോസ്റ്റുകള് അടക്കമുള്ള ഇടങ്ങളില് ആക്രമണം നടത്താന് വേണ്ടിയുള്ള ചാവേറുകളെ തയ്യാറാക്കിയതായാണ് റിപ്പോര്ട്ട് പുറത്ത് വന്നത്. ജമ്മു, അമൃത്സര്, പത്താന്കോട്ട, ജയ്പൂര്, ഗാന്ധി നഗര്, കാണ്പൂര്, ലഖ്നൗ അടക്കമുള്ള നഗരങ്ങളിലാണ് ജാഗ്രതാ നിര്ദ്ദേശം നല്കിയിരിക്കുന്നത്.
