പള്ളുരുത്തി: സഹോദരിയുടെ മകളെ ശല്യം ചെയ്തത് ചോദ്യം ചെയ്തതിന്റെ വൈരാഗ്യത്തില് ഡിസിസി ജനറല് സെക്രട്ടറി എന്.ആര്. ശ്രീകുമാറിനെ കുത്തിപരിക്കേല്പ്പിച്ച പ്രതിയെ രക്ഷപ്പെടുത്താന് ശ്രമം നടത്തുന്നതായി ആക്ഷേപം.
ഇടക്കൊച്ചിയില് സഹോദരിയുടെ മകള് പഠിക്കുന്ന കോളേജിലെ വിദ്യാര്ഥിയാണ് പെണ്കുട്ടിയെ നിരന്തരം ശല്യം ചെയ്തിരുന്നതെന്ന് പറയുന്നു. പെണ്കുട്ടി വീട്ടില് പരാതി പറഞ്ഞതിനെ തുടര്ന്ന് ശല്യക്കാരനായ വിദ്യാര്ഥിയെ ശ്രീകുമാര് താക്കീത് ചെയ്തയച്ചിരുന്നു. ഇതറിഞ്ഞ വിദ്യാര്ഥിയുടെ പിതാവാണ് ശ്രീകുമാറിന് നേരെ ആക്രമണം നടത്തിയത്. തിങ്കളാഴ്ച രാത്രി 9.30 ഓടെയാണ് ആക്രമണം. കുമ്പളങ്ങി വഴിയിലുള്ള ശ്രീകുമാറിന്റെ വീട്ടിലെത്തിയ അക്രമി വരാന്തയില് വെച്ച് ശ്രീകുമാറിനെ കുത്തി വീഴ്ത്തുകയായിരുന്നു.
വയറിലും മുതുകിലും ആഴത്തില് മുറിവേറ്റ ശ്രീകുമാര് എറണാകുളത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില് ചികിത്സയിലാണ്. ആക്രമണം നടത്തിയത് കുമ്പളങ്ങി പുഴയോരം റിസോര്ട്ടിനു സമീപം താമസിക്കുന്ന വില്ഫ്രെഡ് എന്നയാളാണെന്ന് തിരിച്ചറിഞ്ഞിട്ടുണ്ടെന്ന് പോലീസ് പറഞ്ഞു. ഇയാള് പ്രദേശത്തെ കോണ്ഗ്രസ് അനുഭാവിയും ഇയാളുടെ മകന് കോളേജിലെ എസ്എഫ്ഐ അംഗവുമാണ്. ആക്രമണം നടന്ന സമയം തന്നെ പോലീസ് സ്ഥലത്ത് എത്തിയെങ്കിലും അന്വേഷണം കാര്യക്ഷമമല്ലെന്നാണ് ആക്ഷേപം.
പ്രതി ഉണ്ടാകാന് സാധ്യതയുള്ള സ്ഥലങ്ങള്പോലീസിനെ അറിയിച്ചുവെങ്കിലും ഇവിടെയൊന്നും അന്വേഷിക്കാന് പോലീസ് തയ്യാറായിട്ടില്ല. ഇരുപതോളം തുന്നലുകള് ശ്രീകുമാറിന്റെ ശരീരത്തിലുണ്ട്. അതേ സമയം കോടതിയില് കീഴടങ്ങാന് പ്രതികള്ക്ക് പോലീസ് സൗകര്യമൊരുക്കുന്നതായും ആക്ഷേപമുണ്ട്.
