കരുനാഗപ്പള്ളി: പ്രൗഢസദസിനെ സാക്ഷിനിര്ത്തി 33 വധൂവരന്മാര്ക്ക് മംഗല്യഭാഗ്യം ഒരുക്കി ഓച്ചിറ ക്ഷേത്രഭരണസമിതി. ഓച്ചിറ ക്ഷേത്രത്തിന്റെ പരിധിയില് വരുന്ന 52 കരകളിലെ നിര്ധനരായ യുവതികളെ കണ്ടെത്തി അവര്ക്ക് രണ്ടുലക്ഷം രൂപയും താലിയും വധൂവരന്മാര്ക്ക് വിവാഹവസ്ത്രവും നല്കിയാണ് ക്ഷേത്രഭരണസമിതി മാംഗല്യം 2019 ഒരുക്കിയത്.
ഓച്ചിറ ക്ഷേത്രത്തിന്റെ മേല്നോട്ടത്തില് ഇത് രണ്ടാമത്തെ സമൂഹവിവാഹമാണ്. കഴിഞ്ഞവര്ഷം 32 യുവതികള്ക്കാണ് മംഗല്യസൗഭാഗ്യമുണ്ടായത്. ഈ വര്ഷം 52 വിവാഹം നടത്താനാണ് ഭരണസമിതി തീരുമാനിച്ചതെങ്കിലും അപേക്ഷ ലഭിച്ച 42 എണ്ണത്തില് നിന്ന് 33 പേരെ തിരഞ്ഞെടുക്കുകയായിരുന്നെന്ന് ഭരണസമിതി പ്രസിഡന്റ് പ്രൊഫസര് എ. ശ്രീധരന്പിള്ള പറഞ്ഞു.
മാംഗല്യം 2019 ന്റെ ഉദ്ഘാടനം റവന്യൂമന്ത്രി ഇ. ചന്ദ്രശേഖരന് നിര്വഹിച്ചു. ഭരണസമിതി പ്രസിഡന്റ് പ്രൊഫ. എ. ശ്രീധരന്പിള്ളയുടെ അധ്യക്ഷതയില് എന്.കെ. പ്രേമചന്ദ്രന് എംപി, എംഎല്എമാരായ ആര്. രാമചന്ദ്രന്, ആര്. രാജേഷ്, തിരുവിതാംകൂര് ദേവസ്വംബോര്ഡ് കമ്മീഷണര് എം. ഹര്ഷന്, ബ്ലോക്ക് പഞ്ചായത്ത് പ്രസിഡന്റ് എ. മജീദ്, ഓച്ചിറ പഞ്ചായത്ത് പ്രസിഡന്റ് ആര്. രാജേഷ്, ജില്ലാ പഞ്ചായത്തംഗങ്ങളായ കുമാരി അനിതാബാബു, അനില് എസ്. കല്ലേലിഭാഗം ക്ഷേത്ര ഭരണസമിതി ഭാരവാഹികളായ കളരിക്കല് ജയപ്രകാശ്, ആര്.ഡി. പദ്മമകുമാര്, കെ. ജയമോഹന്, കെ. ജ്യോതികുമാര്, എലമ്പടത്ത് രാധാകൃഷ്ണന്, എസ്. ശശിധരന്പിള്ള, ചൂനാട് വിജയന്പിള്ള, എം.ആര്. ബിമല് ഡാനി, മുന്ഭരണസമിതി ഭാരവാഹികളായ വി.പി.എസ്. മേനോന്, വി. സദാശിവന് തുടങ്ങിയവര് വധൂവരന്മാര്ക്ക് ആശംസ നേര്ന്നു.
ക്ഷേത്രത്തില് പ്രത്യേകം തയ്യാറാക്കിയ മണ്ഡപത്തിലായിരുന്നു വിവാഹം. വധൂവരന്മാരുടെ ക്ഷണം സ്വീകരിച്ചെത്തിയ ബന്ധുക്കളടക്കമുള്ളവര്ക്ക് വിഭവസമൃദ്ധമായ സദ്യയും ഭരണസമിതി ഒരുക്കിയിരുന്നു.
