തിരുവനന്തപുരം: പാറശ്ശാല സ്വദേശിയായ ശ്രീജിവിന്റേത് കസ്റ്റഡി മരണം അല്ലെന്ന സിബിഐയുടെ റിപ്പോര്ട്ട് കോടതി തള്ളി. ചീഫ് ജുഡീഷ്യല് മജിസ്ട്രേറ്റ് കോടതിയാണ് റിപ്പോര്ട്ട് തള്ളിയത്. ശ്രീജിവ് ആത്മഹത്യ ചെയ്താണെന്നും സംഭവത്തില് അന്വേഷണം അവസാനിപ്പിക്കുകായാണെന്നുമാണ് സിബിഐ കോടതിയില് അറിയിച്ചത്.
എന്നാല് കേസ് അവസാനിപ്പിക്കുമ്പോള് സമര്പ്പിക്കേണ്ടിയിരുന്ന രേഖകളൊന്നും കോടതിയില് ഹാജരാക്കിയില്ല. ഇത് ചൂണ്ടിക്കാട്ടിയാണ് സിബിഐ റിപ്പോര്ട്ട് തള്ളിയത്. പോലീസ് കസ്റ്റഡിയില് ഇരിക്കേ ശ്രീജീവ് വിഷം കഴിച്ചു മരിക്കുകയായിരുന്നെന്ന പോലീസിന്റെ റിപ്പോര്ട്ട് സിബിഐ അന്വേഷണത്തിലും ശരിവെയ്ക്കുകയാണ് ചെയ്തത്. അതേസമയം ശ്രീജിവിന്റേത് കൊലപാതകം ആണെന്നാണ് ബന്ധുക്കള് ആരോപിക്കുന്നത്. ശ്രീജിവിനു നീതി ലഭ്യമാക്കണമെന്നാവശ്യപ്പെട്ട് സഹോദരന് ശ്രീജിത്ത് വര്ഷങ്ങളായി സെക്രട്ടേറിയറ്റിനു മുന്നില് സമരം ചെയ്യുകയാണ്. ഇത് സമൂഹ മാധ്യമങ്ങളില് വാര്ത്തയായതോടെ ഹൈക്കോടതി നിര്ദ്ദേശ പ്രകാരമാണ് സിബിഐ അന്വേഷണം ഏറ്റെടുക്കുന്നത്.
2014 മേയ് 21-നാണ് ശ്രീജിവ് മരിച്ചത്. പോലീസ് ലോക്കപ്പിലായിരുന്ന പ്രതി, അടിവസ്ത്രത്തിനുള്ളില് ഒളിച്ചുകടത്തിയ വിഷം കഴിച്ചു മരിച്ചതായാണ് അന്വേഷണ സംഘത്തിന്റെ നിഗമനം.
