ന്യൂദല്ഹി: ഐഎന്എക്എസ് മീഡിയ അഴിമതി കേസില് മുന് കേന്ദ്രമന്ത്രിയും മുതിര്ന്ന കോണ്ഗ്രസ് നേതാവുമായ പി.ചിദംബരത്തെ അറസ്റ്റ് ചെയ്തതില് സന്തോഷമുണ്ടെന്ന് ഇന്ദ്രാണി മുഖര്ജി. ചിദംബരത്തെ അറസ്റ്റ് ചെയ്തത് നല്ല വാര്ത്തയാണെന്ന് എന്ഫോഴ്സ്മെന്റ് ഡയറക്ടറേറ്റിനോട് ഇന്ദ്രാണി മുഖര്ജി പറഞ്ഞു. ഐഎന്എക്സ് മീഡിയ കേസില് മാപ്പുസാക്ഷിയാണ് ഇന്ദ്രാണി മുഖര്ജി.
അഞ്ച് ദിവസത്തെക്ക് ചിദംബരത്തെ കസ്റ്റഡിയില് വിട്ടു നല്കിയാല് നിര്ണായകമായ തെളിവുകള് ലഭിക്കുമെന്ന് സിബിഐ കോടതിയില് ആവശ്യപ്പെട്ടത്തിനെ തുടര്ന്ന ഇപ്പോള് പി.ചിദംബരം സിബിഐ കസ്റ്റഡിയിലാണ്. കസ്റ്റഡി കാലാവധി ഈ മാസം 30 വരെ നീട്ടിയിട്ടുണ്ട്. ഡല്ഹി റോസ് അവന്യൂവിലുള്ള പ്രത്യേക കോടതി സിബിഐയുടെ വാദം അംഗീകരിച്ചതിനെ തുടര്ന്നാണ് ചിദംബരത്തെ വെള്ളിയാഴ്ച വരെ സിബിഐ കസ്റ്റഡിയില് വിട്ടത്. ഐഎന്എക്സ് മീഡിയയ്ക്ക് എഫ്ഐപിബിയുടെ അംഗീകാരം ലഭിക്കാന് ചിദംബരവുമായി ഒരു മില്യണ് ഡോളറിന്റെ ഇടപാട് ഉണ്ടായിരുന്നതായി ഷീന ബോറ കേസില് കഴിയുന്ന ഇന്ദ്രാണി മുഖര്ജി സിബിഐയോട് വെളിപ്പെടുത്തിയിരുന്നു.
ഐഎന്എക്സ് മീഡിയ എന്ന മാധ്യമ കമ്പനിക്ക് വഴിവിട്ട് വിദേശഫണ്ട് സ്വീകരിക്കാന് വഴിയൊരുക്കിയതിന് പ്രതിഫലമായി പി ചിദംബരത്തിന്റെ മകന് കാര്ത്തി ചിദംബരത്തിന് കോഴപ്പണവും പദവികളും ലഭിച്ചുവെന്നതാണ് കേസ്. ഐഎന്എക്സ് മീഡിയ കമ്പനിക്ക് 2007ല് വിദേശഫണ്ട് ഇനത്തില് ലഭിച്ചത് 305 കോടി രൂപയാണ്.
