ന്യൂദല്ഹി : ലെജിസ്ലേറ്റീവ് കൗണ്സില് ചെയര്മാന് ഉള്പ്പടെ കാര്ഗിലില് നിന്നുള്ള എട്ട് നേതാക്കള് ബിജെപിയില് അംഗമായി. ജമ്മു കശ്മീര് ലെജിസ്ലേറ്റീവ് കൗണ്സില് ചെയര്മാന് ഹാജി അനായത് അലി, ലഡാക് ഓട്ടോണമസ് ഹില് ഡെലവപ്മെന്റ് എക്സിക്യൂട്ടിവ് കൗണ്സിലര് മുഹമ്മദ് അലി ഹസന് എന്നിവരുടെ നേതൃത്വത്തിലാണ് എട്ട് പേര് ബിജെപിയില് ചേര്ന്നിരിക്കുന്നത്. ഇതില് അനായത്ത് അലി ഉള്പ്പടെയുള്ളവരില് ചിലര് പീപ്പിള്സ് ഡെമോക്രാറ്റിക് പാര്ട്ടി നേതാക്കളാണ്.
ബിജെപി വര്ക്കിങ് പ്രസിഡന്റ് ജെ.പി. നദ്ദയുമായും ഇവര് കൂടിക്കാഴ്ച്ച നടത്തി. കശ്മീരിലും, ലഡാക്കിലും കേന്ദ്ര ഭരണം ഏര്പ്പെടുത്തിയതില് സംസ്ഥാനത്തെ ജനങ്ങള് അംഗീകരിക്കുകയാണ് ചെയ്തിട്ടുള്ളത്. മറ്റ് സംസ്ഥാനങ്ങള്ക്കൊപ്പം വികസന പ്രവര്ത്തനങ്ങളും വേണ്ടത്ര വളര്ച്ചയും നേടാന് സാധിക്കുമെന്നാണ് പൊതു ജനാഭിപ്രായമെന്നും ലഡാക് എംപി ജമ്യാങ് സെരിങ് നാംങ്യാല് അറിയിച്ചു.
ലഡാകിനെ കശ്മീരില് നിന്ന് വിഘടിപ്പിച്ച് കേന്ദ്രഭരണപ്രദേശമാക്കിയതിനുള്ള പിന്തുണച്ചാണ് കാര്ഗില് നേതാക്കള് ബിജെപിയില് ചേര്ന്നത്. പ്രത്യേക പദവിയില് ഇരുന്ന് വികസനമെത്താതെയുള്ള സംസ്ഥാനത്തെ ജനങ്ങളുടെ അതൃപ്തി കൂടിയാണ് ഇതോടെ പുറത്തുവരുന്നത്.
കേന്ദ്ര ഭരണ പ്രദേശമായതോടെ മുസ്ലിം ഭൂരിപക്ഷ മേഖലയായ കാര്ഗിലില് വികസന പദ്ധതികള് നടപ്പിലാക്കാന് ഇനി അനായാസം സാധിക്കുമെന്ന് അനായത് അലി അറിയിച്ചു. കാര്ഗിലില് നിന്നുള്ള മെഹ്സിന് അലി, സഹീര് ഹുസൈന് ബാബര്, ഗുല്സാര് ഹുസൈന്, അസദുള്ള മുന്ഷി, മുഹമ്മദ് ഇബ്രാഹിം, താഷി സെരിങ് എന്നിവരും, ലേയില് നിന്നുള്ള ടി. ഗ്യാപ്ലു, സി.ഡി കേരായ്, എന്.ടി. ചുമതാങ് എന്നിവരുമാണ് ബിജെപിയില് അംഗത്വമെടുത്തത്.
ലഡാക്കിലെ ബുദ്ധിസ്റ്റ് മേഖലകളില് കേന്ദ്രഭരണപ്രദേശമാക്കിയതിന് പിന്തുണച്ച് നിരവധി പേരാണ് ബിജെപിയില് ചേരുന്നത്. സംസ്ഥാനം വികസന പാതയില് എത്തുമെന്നും ജീവിത നിലവാരവും ഉയരുമെന്നാണ് ഇവിടുത്തെ ജനങ്ങള് വിലയിരുത്തുന്നത്.
