ന്യൂദല്ഹി: നീണ്ട ഇടവേളകള്ക്ക് ശേഷം മിഗ്21 ജെറ്റ് വീണ്ടും പറപ്പിക്കാനൊരുങ്ങി പോര്മുഖത്തെ ഇന്ത്യയുടെ ഹീറോ വിംഗ് കമാന്ഡര് അഭിനന്ദന് വര്ത്തമാന്. സെപ്റ്റംബര് മൂന്നിന് പത്താന്കോട്ട് വ്യോമതാവളത്തില് നടക്കുന്ന ബോയിംഗ് എഎച്ച്64 ഇ അപ്പാച്ചെ ഗാര്ഡിയന് അറ്റാക്ക് ഹെലികോപ്റ്ററുകളുടെ ഉദ്ഘാടന ചടങ്ങിനോടനുബന്ധിച്ചാണ് വിമാനം പറത്തിക്കുക. കഴിഞ്ഞ ആഴ്ച രാജസ്ഥാനിലെ വ്യോമസേനയുടെ ബേസില് വച്ച് മിഗ് 21 വിമാനം അദ്ദേഹം പറത്തിയിരുന്നു. എന്നാല്, പത്താന്കോട്ടിന് മുകളിലൂടെ സര്വീസില് തിരിച്ചെത്തിയശേഷം ആദ്യമായാണ് അഭിനന്ദന് വിമാനം പറപ്പിക്കുക.
ലോകത്തിലെ ഏറ്റവും മാരകമായ ആക്രമണ ഹെലികോപ്റ്ററായ ബോയിംഗ് എഎച്ച് 64 ഇ അപ്പാച്ചെ ഗാര്ഡിയന് അറ്റാക്ക് ഹെലികോപ്റ്ററുകള് ഇന്ത്യയില് അവതരിപ്പിക്കുന്നതിന്റെ ഭാഗമായാണ് പത്താന്കോട്ട് പരിപാടി നടത്തുന്നത്. നിരവധി പരീക്ഷണ പറപ്പിക്കലിനു ശേഷമാണ് അപ്പാച്ചെ ഹെലികോപ്റ്ററുകള് പത്താന്കോട്ട് എയര് ബേസില് എത്തിച്ചിരിക്കുന്നത്. ഈ അപ്പാച്ചെ ഹെലികോപ്റ്ററുകള്ക്കൊപ്പമാണ് അഭിനന്ദന് വര്ത്തമാന് മിഗ്21 ജെറ്റ് വിമാനം പറത്തുന്നത്.
ഫെബ്രുവരിയില് പാക്കിസ്ഥാനുമായുണ്ടായ വ്യോമ ആക്രമണത്തിനിടെ കോക്പിറ്റില് നിന്ന് സ്വയം ഇജക്ട് ചെയ്ത് രക്ഷപ്പെട്ട അഭിനന്ദനെ പാക് സൈന്യം പിടികൂടിയിരുന്നു. പിന്നീട് ഇദ്ദേഹത്തെ ഇന്ത്യക്ക് തന്നെ കൈമാറുകയും ചെയ്തു. തുടര്ന്ന് മാസങ്ങളോളം ചികിത്സയില് കഴിഞ്ഞ ഇദ്ദേഹത്തിന് ബെംഗളുരുവിലെ ഐഎഎഫ് എയ്റോസ്പേസ് മെഡിസിന് വിഭാഗം പറക്കുന്നതിനുള്ള സര്ട്ടിഫിക്കറ്റ് അനുവദിച്ചു.
പുല്വാമ ഭീകരാക്രമണത്തിന് പിന്നാലെ ഇന്ത്യന് വ്യോമസേന പാക് അതിര്ത്തി ലംഘിച്ച് ബാലകോട്ടെ ജയ്ഷെ മുഹമ്മദ് എന്ന ഭീകരസംഘടനയുടെ ക്യാംപുകള് ബോംബിട്ട് തകര്ത്തിരുന്നു. ഇതിന് തിരിച്ചടി നല്കാന് എഫ്16 വിമാനങ്ങളുമായി ഇന്ത്യന് സൈനിക ക്യാംപുകള് ലക്ഷ്യമാക്കിയാണ് പാക് വ്യോമസേന വന്നത്. എന്നാല് ഈ ശ്രമമാണ് അഭിനന്ദന് വര്ധമാന് അടക്കമുള്ള ഇന്ത്യന് വ്യോമസേന സംഘത്തിന്റെ പ്രത്യാക്രമണത്തില് പരാജയപ്പെട്ടത്. സംഘര്ഷത്തിനിടെ പാക്കിസ്ഥാന്റെ ഒരു എഫ് 16 വിമാനം അഭിനന്ദന് വര്ധമാന് തകര്ത്തിരുന്നു. ഇതിന് അഭിനന്ദന് രാജ്യം വീര് ചക്ര ബഹുമതി നല്കി.
