ന്യൂദല്ഹി: മുന് കേന്ദ്ര ധനകാര്യ മന്ത്രിയും ബിജെപി നേതാവുമായ അരുണ് ജെയ്റ്റ്ലി അന്തരിച്ചു. ഐസിയുവില് കഴിയുന്ന അരുണ് ജെയ്റ്റ്ലി വെന്റിലേറ്ററിന്റെ സഹായത്തോടെയാണ് ജീവന് നിലനിര്ത്തിയിരുന്നത്. ഇന്നു ഉച്ചയ്ക്ക് 12 മണിയോടെ അവസ്ഥ കൂടുതല് ഗുരുതരമാവുകയായിരുന്നു. കഴിഞ്ഞ 9 നാണ് അദ്ദേഹത്തെ ആശുപത്രിയില് പ്രവേശിപ്പിച്ചത്. ആശുപത്രിയിലെ കാര്ഡിയോന്യൂറോ വിഭാഗം വാര്ഡില് നിരീക്ഷണത്തിലായിരുന്നുഅദ്ദേഹം. എന്ഡോക്രിനോളജിസ്റ്റ്, വൃക്കരോഗ ഹൃദ്രോഗ വിദഗ്ധര് എന്നിവരുടെ സംഘവും നിരീക്ഷിച്ചു വരികയായിരുന്നു. അദ്ദേഹത്തിന്റെ ചികിത്സയും ആരോഗ്യനിലയും സംബന്ധിച്ച് കഴിഞ്ഞ ഓഗസ്റ്റ് 9നാണ് അവസാനമായി മെഡിക്കല് ബുള്ളറ്റിന് പുറത്തുവന്നത്.
അണുബാധയും ശ്വാസതടസ്സവുമാണ് നിലവിലെ മുഖ്യ ആരോഗ്യ പ്രശ്നമായി ഡോക്ടര്മാര് ചൂണ്ടിക്കാണിക്കുന്നത്. അദ്ദേഹത്തിന്റെ ശ്വാസകോശത്തില് നീര്ക്കെട്ട് ഉണ്ടെന്നാണ് സൂചന. ശ്വാസകോശത്തിലെ നീര്ക്കെട്ട് മൂലം ശ്വാസതടസ്സം നേരിട്ടിരുന്നു. രാഷ്ട്രപതി രാംനാഥ് കോവിന്ദ് , അമിത് ഷാ അടക്കം കേന്ദ്രമന്ത്രിമാര് അദ്ദേഹത്തെ സന്ദര്ശിച്ചിരുന്നു.
