ഹൈദരാബാദ് : ഹജ്ജ്- ജറുസലേം തീര്ത്ഥാടനത്തിന്റെ പരസ്യവുമായി തിരുപ്പതിയിലെ ആന്ധ്രാ പ്രദേശ് റോഡ് ട്രാന്സ്പോര്ട് കോര്പ്പറേഷന്റെ ബസ് ടിക്കറ്റുകള്. ഇത് വിവാദമായതോടെ ടിക്കറ്റുകള് പിന്വലിച്ച് എപിആര്ടിസി. കഴിഞ്ഞ ദിവസം ക്ഷേത്രനഗരമായ തിരുപ്പതിയില് നിന്നും തിരുമലയിലേക്ക് എപിആര്ടിസി ബസില് യാത്ര ചെയ്തവര്ക്കാണ് ഈ ടിക്കറ്റ് ലഭിച്ചത്.
ടിക്കറ്റിന്റെ ഒരുവശത്ത് ഹജ്ജ്, ജറുസലേം തീര്ത്ഥയാത്രയുടെ സര്ക്കാര് പരസ്യമാണ് ഉണ്ടായിരുന്നത്. ഇത് ശ്രദ്ധയില്പ്പെട്ട ഒരാള് ട്രാന്സ്പോര്ട്ട് കോര്പ്പറേഷന്റെ ശ്രദ്ധയില്പ്പെടുത്തുകയായിരുന്നു. എന്നാല് പ്രിന്റ് ചെയ്ത ടിക്കറ്റിന്റെ കെട്ട് മാറിപ്പോയതാണെന്ന ഒഴുക്കന് മറുപടി മാത്രമാണ് അദ്ദേഹം നല്കിയത്. ഗതാഗതവകുപ്പ് എക്സിക്യൂട്ടീവ് ഡയറക്ടറും സമഗ്രമായ അന്വേഷണത്തിന് ഉത്തരവിട്ടിട്ടുണ്ട്.മുമ്പുണ്ടായിരുന്ന ടിഡിപി സര്ക്കാരിന്റെ കാലത്ത് പ്രിന്റ് ചെയ്തതാണ് ഈ ടിക്കറ്റുകളെന്ന മറുപടിയാണ് സര്ക്കാര് നല്കിയത്. ലോക്സഭാ- നിയമസഭാ തെരഞ്ഞെടുപ്പ് പെരുമാറ്റച്ചട്ടം മൂലം ഈ ടിക്കറ്റുകളൊന്നും ഉപയോഗിച്ചിരുന്നില്ല. പിന്നീട് സര്ക്കാര് അധികാരത്തില് എത്തിയശേഷം ഈ ടിക്കറ്റുകള് ഉപയോഗിക്കാന് തീരുമാനിക്കുകയായിരുന്നെന്ന് വെഎസ്ആര്സിപി നേതാവ് വെള്ളാംപള്ളി ശ്രീനിവാസ് അറിയിച്ചു.
സര്ക്കാര് ബസ് സര്വീസ് ടിക്കറ്റുകളില് മത വിശ്വാസങ്ങളെ വ്രണപ്പെടുത്തുന്ന വിധത്തില് പരസ്യങ്ങള് പതിച്ചിട്ടുള്ളത് സംബന്ധിച്ച് സര്ക്കാര് അന്വേഷണത്തിന് ഉത്തരവിട്ടിട്ടുണ്ട്. കുറ്റക്കാര്ക്കെതിരെ തക്ക നടപടി കൈക്കൊള്ളുമെന്നും വെള്ളാംപള്ളി അറിയിച്ചു.
വൈഎസ് ജഗന് മോഹന് റെഡ്ഡി ഹിന്ദു മത വിശ്വാസങ്ങള്ക്ക് എതിരാണ്. അതിനാല് സമുദായത്തെ തകര്ക്കുന്നതിനായുള്ള പ്രത്യേക അജണ്ടയാണ് ഇതെന്നും ഈആരോപണം ഉയര്ന്നിട്ടുണ്ട്. ഇത്തരത്തില് സര്ക്കാര് ഗതാഗത സര്വീസിലെ ടിക്കറ്റുകളില് പരസ്യം നല്കുന്നതിനെതിരെ ബിജെപിയും രംഗത്ത് എത്തിയിട്ടുണ്ട്. ഹിന്ദു വിശ്വാസികള് ധാരാളമായി പോകുന്ന റൂട്ടില് ഇത്തരത്തിലുള്ള ടിക്കറ്റുകള് നല്കുന്നത് ഗൂഢാലോചനയാണെന്നും, ഹിന്ദു വിരുദ്ധ അജണ്ടകള് ജനങ്ങള്ക്ക് മേല് അടിച്ചേല്പ്പിക്കുകയാണെന്നും പാര്ട്ടി ആരോപിച്ചു.
