: ആജീവാനന്ത വിലക്ക് നീക്കിയതില് ദൈവത്തിന് നന്ദി പറഞ്ഞ് ക്രിക്കറ്റ് താരം ശ്രീശാന്ത്. ടെസ്റ്റ് ക്രിക്കറ്റില് ഇന്ത്യയ്ക്കുവേണ്ടി കളിക്കുകയെന്നതാണ് തന്റെ ലക്ഷ്യമെന്നും അദ്ദേഹം പറഞ്ഞു. ആജീവാനന്ത വിലക്ക് ബിസിസിഐ ഓംബുഡ്സ്മാന് ഏഴു വര്ഷമായി ചുരുക്കിയതിനെ തുടര്ന്ന് കൊച്ചിയില് മാധ്യമ പ്രവര്ത്തകരോട് സംസാരിക്കുകയായിരുന്നു അദ്ദേഹം.
ടെസ്റ്റില് നൂറുവിക്കറ്റ് തികയ്ക്കണമെന്നത് തന്റെ ആഗ്രഹമാണ്. നിലവില് 87 വിക്കറ്റുണ്ട്. ഇനി 13 വിക്കറ്റു കൂടി. അത് നേടാന് കഴിയുമെന്നാണ് വിശ്വാസം. എല്ലാവരോടും വളരെ നന്ദിയുണ്ട്. ക്രിക്കറ്റിലേക്കുള്ള തന്റെ മടങ്ങിവരവ് എല്ലാവരും ആഗ്രഹിച്ചിരുന്നു. തന്റെ കുടുംബവും സുഹൃത്തുക്കളും വലിയ പിന്തുണയാണ് നല്കിയത്. 2015 മുതല് തനിക്ക് വലിയ പ്രതീക്ഷയുണ്ടായിരുന്നു. 2019 ആയപ്പോഴേക്കും അത് യാഥാര്ഥ്യമാകുന്നു.
വിലക്കേര്പ്പെടുത്തിയതോടെ പരിശീലനത്തിനു പോലും മൈതാനം ലഭിക്കാത്ത അവസ്ഥയുണ്ടായിരുന്നു. എന്നാല് ലക്ഷ്യത്തില് നിന്നും പിന്മാറാന് തയാറായിരുന്നില്ല. ഇതിനു കാരണം കുടുംബത്തില് നിന്നും സുഹൃത്തുക്കളില് നിന്നും ലഭിച്ച പിന്തുണയാണ്. ഇനി കൂടുതല് നന്നായി പരിശീലനം ആരംഭിക്കണം. തന്റെ സ്വന്തം ടീമിനൊപ്പമാണ് പരിശീലനം. കൊച്ചിയില് ഉള്ളപ്പോള് എല്ലാ ദിവസവും അവര്ക്കൊപ്പം പരിശീലനം നടത്തുന്നുണ്ട്.
ക്രിക്കറ്റില് നിന്നും വിലക്കിയപ്പോള് സിനിമയിലേക്ക് തിരിഞ്ഞതിനാല് സാമ്പത്തിക ബുദ്ധിമുട്ട് നേരിട്ടില്ല. നാലു സിനിമയില് അഭിനയിച്ചു. അഞ്ചാമത്തെ സിനിമയില് അഭിനയിക്കാന് പോകുകയാണ്. ഇപ്പോള് 36 വയസുണ്ട്. അടുത്ത വര്ഷം വിലക്ക് തീരൂമ്പോള് 37 വയസാകും. ഈ ഒരു വര്ഷത്തിനിടയില് നല്ല രീതിയില് പ്രാക്ടീസ് ചെയ്ത് അടുത്ത സപ്തംബറില് കായിക ക്ഷമത തെളിയിക്കാന് സാധിക്കും. രഞ്ജിട്രോഫിയില് കളിച്ച് കേരളത്തെ ജയിപ്പിക്കണമെന്ന് തനിക്ക് ആഗ്രഹമുണ്ട്. ശ്രീശാന്ത് പറഞ്ഞു.
