കൊല്ക്കത്ത: ഡ്യൂറന്ഡ് കപ്പില് വീണ്ടും ഗോകുലം കേരള എഫ്സിയുടെ ഗോളടിമേളം. ഗ്രൂപ്പ് ഡിയിലെ അവസാന മത്സരത്തില് ഇന്നലെ ഗോകുലം ട്രാവു ഫുട്ബോള് ക്ലബിനെ ഒന്നിനെതിരെ നാല് ഗോളുകള്ക്ക് തകര്ത്തു. ക്യാപ്റ്റന് മാര്ക്കസ് ജോസഫിന്റെ ഹാട്രിക്ക് കരുത്തിലാണ് ഗോകുലം ട്രാവുവിനെ തകര്ത്തത്. ടൂര്ണമെന്റില് മാര്ക്കസിന്റെ രണ്ടാം ഹാട്രിക്കാണിത്. ആദ്യ കളിയില് ചെന്നൈയിന് എഫ്സിക്കെതിരെയും മാര്ക്കസ് ഹാട്രിക് നേടിയിരുന്നു. രണ്ടാം മത്സരത്തില് ഇന്ത്യന് എയര്ഫോഴ്സിനെതിരെ രണ്ട് ഗോളുകളും. ഇതോടെ മുന്ന് കളികളില് നിന്ന് എട്ട് ഗോളുകളാണ് ട്രിനിഡാഡ് ടുബാഗോ താരമായ മാര്ക്ക്സ് ജോസഫ് അടിച്ചുകൂട്ടിയത്.41-ാം മിനിറ്റില് ട്രാവു ഗോള്കീപ്പര് ഗുര്പ്രീത് സിങ് ചുവപ്പുകാര്ഡ് കിട്ടി പുറത്തുപോയതിനുശേഷം 10 പേരുമായാണ് അവര് കളിച്ചത്.
നേരത്തെ തന്നെ സെമി ഉറപ്പിച്ചിരുന്ന ഗോകുലത്തിന് ഈ മത്സരം പ്രസക്തമല്ലായിരുന്നു. എന്നാല് തുടര്ച്ചയായ മൂന്നാം ജയം ലക്ഷ്യമിട്ട് മൈതാനത്തിറങ്ങിയ ഗോകുലം ട്രാവുവിനോട് യാതൊരു ദയയും കാണിച്ചില്ല. ബുധനാഴ്ച കൊല്ക്കത്ത സാള്ട്ട്ലേക്ക് സ്റ്റേഡിയത്തില് നടക്കുന്ന സെമിയില് ഇൗസ്റ്റ് ബംഗാളാണ് ഗോകുലത്തിന്റെ എതിരാളികള്.
തുടക്കം മുതല് ഗോകുലം താരങ്ങള് എതിര്ബോക്സിലേക്ക് തുടര്ച്ചയായി മുന്നേറ്റങ്ങള് നടത്തിയെങ്കിലും ആദ്യപകുതി ഗോള്രഹിതമായിരുന്നു. രണ്ടാം പകുതിയിലാണ് കളിയിലെ അഞ്ച് ഗോളുകളും പിറന്നത്. 57-ാം മിനിറ്റില് ബ്രൂണോയുടെ ക്രോസില് നിന്ന് മാര്ക്കസ് ഗോകുലത്തിന് ലീഡ് നല്കി. 64-ാം മിനിറ്റില് പെനാല്റ്റിയിലൂടെ മാര്ക്കസ് വീണ്ടും ലക്ഷ്യം കണ്ടു. പിന്നീട് 71-ാം മിനിറ്റില് ട്രിനിഡാഡ് പ്രതിരോധനിരതാരം ആന്ദ്രെ എറ്റിനെ ലീഡ് മൂന്നാക്കി. എട്ടു മിനിറ്റിനുള്ളില് മലയാളി താരം രാഹുല്. കെ.പിയുടെ അസിസ്റ്റില് മാര്ക്കസ് ഹാട്രിക്കും തികച്ചു. നിശ്ചിത സമയത്തിന് ഒരു മിനിറ്റ് ശേഷിക്കെ റോജര് ട്രാവുവിന്റെ ആശ്വാസഗോള് നേടി.
