ഗാലെ: ന്യൂസിലാന്‍ഡിനെതിരായ ആദ്യ ക്രിക്കറ്റ് ടെസ്റ്റില്‍ ശ്രീലങ്കയ്ക്ക് ആറ് വിക്കറ്റിന്റെ ഉജ്ജ്വല വിജയം. രണ്ടാം ഇന്നിങ്ങ്‌സില്‍ ജയിക്കാനാവശ്യമായ 267 റണ്‍സ് നാല് വിക്കറ്റ് നഷ്ടത്തില്‍ ശ്രീലങ്ക മറികടന്നു. തകര്‍പ്പന്‍ സെഞ്ചുറി നേടിയ ഓപ്പണര്‍ ദിമുത് കരുണരത്‌നെ (122)യുടെ പ്രകടനമാണ് ശ്രീലങ്കയ്ക്ക് അനായാസ വിജയം സമ്മാനിച്ചത്. ജയത്തോടെ ടെസ്റ്റ് ക്രിക്കറ്റ് ചാമ്പ്യന്‍ഷിപ്പില്‍ നിര്‍ണായകമായ 60 പോയിന്റ് നേടാനും ശ്രീലങ്കക്കായി.
സ്‌കോര്‍ ചുരുക്കത്തില്‍: ന്യൂസിലന്‍ഡ് 249, 285. ശ്രീലങ്ക: 267, 268/4.
രണ്ടാം ഇന്നിങ്‌സിന്റെ ഒന്നാം വിക്കറ്റില്‍ തിരിമന്നെയെ കൂട്ടുപിടിച്ച് ശ്രീലങ്കന്‍ ക്യാപ്റ്റന്‍ പടുത്തുയര്‍ത്തിയ 161 റണ്‍സിന്റെ കൂട്ടുകെട്ടാണ് ശ്രീലങ്കന്‍ ജയത്തിന് അടിത്തറ നല്‍കിയത്. തിരിമന്നെ 64 റണ്‍സും എടുത്താണ് പുറത്തായത്. തിരിമന്നെ പുറത്തായശേഷം ക്രീസിലെത്തിയ മെന്‍ഡിസ് 10 റണ്‍സെടുത്ത് പുറത്തായി. കുശല്‍ പെരേര 23 റണ്‍സെടുത്തു മടങ്ങി. 28 റണ്‍സെടുത്ത എയ്ഞ്ചലോ മാത്യൂസിനൊപ്പം 14 റണ്‍സെടുത്ത ധനഞ്ജയ ഡിസില്‍വയായിരുന്നു ലങ്ക വിജയത്തിലെത്തുമ്പോള്‍ ക്രീസില്‍.
നേരത്തെ ആദ്യ ഇന്നിങ്‌സില്‍ 249 റണ്‍സിന് ഓള്‍ ഔട്ടായ ന്യൂസിലാന്‍ഡിന് മറുപടിയായി ശ്രീലങ്ക 267 റണ്‍സാണ് എടുത്തത്. ആദ്യ ഇന്നിങ്‌സില്‍ 18 റണ്‍സിന്റെ ലീഡ് വഴങ്ങിയ ന്യൂസിലന്‍ഡ് 285 റണ്‍സ് എടുത്ത് എല്ലാവരും പുറത്തായി. രണ്ടാം ഇന്നിങ്‌സില്‍ സെഞ്ചുറി നേടി ശ്രീലങ്കന്‍ വിജയത്തിന് അടിത്തറ നല്‍കിയ ക്യാപ്റ്റന്‍ കരുണരത്‌നെയാണ് മാന്‍ ഓഫ് ദി മാച്ച്. രണ്ടാം ടെസ്റ്റ് 22 മുതല്‍ കൊളംബോയില്‍ തുടങ്ങും.
