പെരുമ്പാവൂര്: ജില്ലയില് വിവധ ഇടങ്ങളിലായി ലഹരിവേട്ട. പെരുമ്പാവൂരില് ആഡംബര ബൈക്കില് 15 കിലോയോളം കഞ്ചാവുമായി തമിഴ്നാട്ടിലെ തിരുപ്പൂരില് നിന്നും വന്ന ദമ്പതികളെ പോലീസ് പിടികൂടി. മാരക ലഹരി മരുന്നായ ലിസര്ജിക് ആസിഡ് ഡൈത്തെലായെമെയ്ഡ് (എല്എസ്ഡി) സ്റ്റാമ്പുമായി പിടിയിലായത് ഐടി പ്രൊഫഷണലാണ്. കുമ്പളങ്ങിയില് കഞ്ചാവ് വില്പന നടത്തിയ യുവാവും പിടിയിലായി.
ആഡംബര ബൈക്കില് കറങ്ങി കഞ്ചാവ് വില്പന നടത്തെവെയാണ് കുമാരമംഗലം വില്ലേജ് ഏഴല്ലൂര് മദ്രസ കവല ഭാഗത്ത് കളരിക്കല് വീട്ടില് സബിര്(31), ഇയാളുടെ രണ്ടാം ഭാര്യ തൊടുപുഴ പുറപ്പുഴയില് പുറപ്പുഴ സ്വദേശിനി ആതിര (26) എന്നിവരെയാണ് പെരുമ്പാവൂര് പോലീസ് പിടികൂടിയത്. എറണാകുളം റൂറല് ജില്ലാ പോലീസ് മേധാവി കെ. കാര്ത്തികിന് ലഭിച്ച രഹസ്യവിവരത്തെ തുടര്ന്ന് ഡാന്സാഫ്ടീമും പെരുമ്പാവൂര് പോലീസും ചേര്ന്നാണ് പിടികൂടിയത്. പാലിയേക്കര മുതല് പെരുമ്പാവൂര് വരെയുള്ള വിവിധ സ്ഥലങ്ങളില് 24 മണിക്കൂറിലെറെ നിരീക്ഷണം നടത്തിയാണ് പ്രതികളെ കുടുക്കിയത്.
പെരുമ്പാവൂര് ഡിവൈഎസ്പി കെ. ബിജുമോന്, പെരുമ്പാവൂര് ഇന്സ്പെക്ടര് പി.എ. ഫൈസല്, എസ്ഐമാരായ ബേസില് തോമസ്, കെ.പി. എല്ദോസ്, എഎസ്ഐമാരായ നിസാര്, പി.എം. ഷാജി, രാജേന്ദ്രന്, സജീവ്ചന്ദ്രന്, എസ്സിപിഒമാരായ ദീലിപ്, രാജിവ്, വിനോദ്, സുനില് സിപിഒ മാരായ ശ്യാംകുമാര്, ജാബിര്, രഞ്ജിത്ത്, മനോജ് കുമാര്, ഡബ്ള്യൂസിപിഒ അഞ്ജു സുധീഷ് എന്നിവര് ചേര്ന്നാണ് പ്രതികളെ പിടികൂടിയത്. ആറ് മാസത്തിലേറെയായി നിരവധിതവണ തിരിപ്പൂരില് നിന്നും കഞ്ചാവ് കൊണ്ടുവന്ന് സംസ്ഥാനത്തിന്റെ വിവിധ ഭാഗങ്ങളില് മൊത്ത വിതരണം ചെയ്യുന്നതായി ചോദ്യം ചെയ്യലില് പ്രതികള് സമ്മതിച്ചു. പ്രതികളെ പെരുമ്പാവൂര് കോടതിയില് ഹാജരാക്കി.
എല്എസ്ഡി സ്റ്റാമ്പുമായി ടെക്കി പിടിയില്
മാരക ലഹരി മരുന്നായ ലിസര്ജിക് ആസിഡ് ഡൈത്തെലായെമെയ്ഡ് (എല്എസ്ഡി) സ്റ്റാമ്പുമായി ഐടി പ്രൊഫഷണല് പിടിയില്. പെരുമ്പാവൂര് കൂവപ്പടി അനന്തപുരത്തില് വിഷ്ണു(29)വിനെയാണ് കളമശ്ശേരി ഭാഗത്തു നിന്ന് എല്എസ്ഡി സ്റ്റാമ്പുമായി പോലീസ് പിടികൂടിയത്. ഗോവ, ബാംഗ്ലൂര് കേന്ദ്രീകരിച്ചുള്ള ലഹരി മരുന്ന് ശൃംഖലയുടെ കണ്ണിയാണ് വിഷ്ണുവെന്ന് പോലീസ് സ്ഥിരീകരിച്ചു. വിഷ്ണുവിന്റെ പെണ് സുഹൃത്തിനെയും, ഇവരെ കച്ചവടത്തിന് സഹായിക്കുന്ന ട്രാന്സ്ജന്റേഴ്സിനെ കുറിച്ചും വ്യക്തമായ വിവരങ്ങള് ലഭിച്ചിട്ടുണ്ട്.
എല്എസ്ഡിയുടെ തീവ്രത നിശ്ചയിക്കുന്നത് ഇതില് അടങ്ങിയിരിക്കുന്ന രാസവസ്തുക്കളുടെ മൈക്രോഗ്രാം അളവിലാണ്. ഡപ്യൂട്ടി കമ്മീഷ്ണര് പൂങ്കുഴലിയുടെ നേതൃത്വത്തില് നര്ക്കോട്ടിക്ക് സെല് എസിപി. രാജേഷ്, ഷാഡോ എസ്.ഐ. ജോസഫ് സാജന്, കളമശ്ശേരി എസ്ഐ. അമൃതരംഗന് തുടങ്ങിയവരുടെ സംഘമാണ് പ്രതിയെ പിടകൂടിയത്.
കഞ്ചാവുമായി യുവാവ് പിടിയില്
കുമ്പളങ്ങിയില് കഞ്ചാവുമായി യുവാവ് പിടിയില്. എഴുപുന്ന ലെജു നിലയത്തില് ലെജു മോന് (34) ആണ് പിടിയിലായത്. കുമ്പളങ്ങി പോലീസ് ഔട്ട് പോസ്റ്റിന് മുന്നില് എസ്ഐ നസറുദ്ദീന്, എഎസ്ഐ അനില് കുമാര്, അന്വാസ് എന്നിവരുടെ നേതൃത്വത്തില് നടത്തിയ വാഹന പരിശോധനയ്ക്കിടയിലാണ് കഞ്ചാവ് പിടിച്ചെടുത്തത്. ഇയാള്ക്കെതിരെ എന്ഡിപിഎസ് ആക്ട് പ്രകാരം കേസെടുത്തതായി പോലീസ് പറഞ്ഞു.
