കൊച്ചി: ജയില് വിഭവങ്ങളായ ചപ്പാത്തിയും ചിക്കന് കറിയും ബിരിയാണിയുമുള്പ്പെടെ ഇഷ്ട ഭക്ഷണങ്ങള് ഇനി ഊബര് ഈറ്റ്സിലും ലഭിക്കും. കാക്കനാട് ജില്ലാ ജയിലിലെ തടവുകാരുണ്ടാക്കുന്ന രുചിയേറിയ ഭക്ഷ്യവിഭവങ്ങളാണ് ഓണ്ലൈനിലൂടെ നിമിഷനേരത്തിനുള്ളില് വീട്ടുപടിക്കല് എത്തുക. ജയില് വിഭവങ്ങളുടെ ഓണ്ലൈന് വില്പ്പനയുടെ ഉദ്ഘാടനം ജയില് ഡിജിപി ഋഷിരാജ് സിങ് നിര്വഹിച്ചു.
അഞ്ച് ചപ്പാത്തി, ചിക്കന് കറി, ചിക്കന് ബിരിയാണി (സാലഡും അച്ചാറുമുള്പ്പെടെ), ഒരു ലിറ്റര് കുടിവെള്ളവും കൂടി 125 രൂപ മാത്രം. ഓണ്ലൈന് വില്പ്പനയുടെ ഭാഗമായ ‘ഫ്രീഡം കോമ്പോ ലഞ്ച്’ ഓഫറിന്റെ വിലയാണിത്. ജയിലിലെ ജനറല് അടുക്കളയ്ക്ക് പുറമെ തടവുകാര് തന്നെ പാചകക്കാരായ പ്രത്യേക അടുക്കളയിലാണ് ഫ്രീഡം ഫുഡ് വിഭവങ്ങളൊരുക്കുന്നത്. യൂബര് ഈറ്റ്സിന് 17.5 ശതമാനം കമ്മീഷന് നല്കിയാണ് ജയില് വിഭവങ്ങള് ആവശ്യക്കാരിലെത്തിക്കുന്നത്. പത്ത് ചപ്പാത്തിക്ക് 24 രൂപയും ചില്ലി ചിക്കന് 48 രൂപയുമാണ് ഓണ്ലൈന് വില.
ഇനം, വില ക്രമത്തില്: ചില്ലി ഗോബി- 24, ചിക്കന് 65- 50, ചിക്കന് ബിരിയാണി- 72, നെയ്ചോറ്-42, വെജിറ്റബിള് കറി- 18, മുട്ടക്കറി-18, ചിക്കന് 30 രൂപ. ജില്ലാ ജയിലിന്റെ എട്ട് കിലോമീറ്റര് പരിധിയിലാണ് ആദ്യഘട്ടത്തില് ഓണ്ലൈന് വില്പ്പന. രാവിലെ 11 മുതല് വൈകിട്ട് നാലുവരെയാണ് ഓണ്ലൈന് വില്പന. പത്ത്ചപ്പാത്തിക്ക് 20 രൂപയും ചിക്കന് ബിരിയാണിക്ക് 60 രൂപയുമാണ് വില. ചിക്കന് 65- 50, ചിക്കന് കറി- 25, ചില്ലി ചിക്കന്- 40, ചില്ലി ഗോപി- 20, മുട്ടക്കറി-15, നെയ്ചോറ്-35, വെജിറ്റബിള് കറി- 15 രൂപ. രാവിലെ 6.30 മുതല് രാത്രി 9.30വരെ ഇവിടെ നിന്നും വിഭവങ്ങള് ലഭിക്കും.
തൃക്കാക്കര നഗരസഭ ചെയര്പേഴ്സണ് ഷീല ചാരു, കൗണ്സിലര്മാരായ ലിജി സുരേഷ്, കെ.എ നജീബ്, ജയില് സൂപ്രണ്ട് കെ.വി. ജഗദീശന്, അസിസ്റ്റന്റ് സൂപ്രണ്ട് കെ.വി. ബിജു, അസി. പ്രിസണ് ഓഫീസര് കെ. ആര് കിരണ് എന്നിവര് പങ്കെടുത്തു. തടവുകാര് നിര്മിക്കുന്ന കരകൗശല ഉല്പ്പന്നമായ നെറ്റിപ്പട്ടത്തിന്റെ വില്പ്പനയുടെ ഉദ്ഘാടനവും ഋഷിരാജ് സിങ് നിര്വഹിച്ചു.
